Read Samoan Old Version Bible – O LE TUSI PAIA FAAALIGA, 22 Bible Online

FAAALIGA, 22 - Samoan Old Version Bible – O LE TUSI PAIA bible

FAAALIGA, 22

¹Ona faaali mai lea e ia ia te au le vaitafe manino o le vai o le ola, e manino e pei o le maa tioata, ua tafe ifo mai le nofoālii o le Atua ma le Tamai mamoe.

²O i le moa o lona ala tele ma itu taitasi o le vaitafe le laau o le ola, o loo fua mai i fuata e sefulu ma le lua, e taitasi le masina ma fua mai ai lona fuata; o lau foi o le laau e faamalolo ai nuu.

³E leai foi se toe faafano e tasi; e i ai foi le nofoālii o le Atua ma le Tamai mamoe, o ana auauna foi latou te auauna ia te ia;

⁴latou te vaavaai atu foi i ona fofoga, e i ai foi i o latou muaulu lona suafa.

⁵E leai lava se po i lea mea; e le aoga foi ia te i latou se lamepa, po o le malamalama o le la; auā o le Alii le Atua na te faamalamalamaina i latou; latou te fai ma tupu foi e faavavau faavavau lava.

⁶Ona fai mai lea o ia ia te au, O upu e faamaoni ia ma le moni; o le Alii foi le Atua o le au perofeta paia ua auina mai e ia lana agelu e faailoa mai i ana auauna mea e tusa ona vave oo mai.

⁷Faauta, ou te vave alu atu; amuia lē tausi i upu o le valoaga o lenei tusi.

⁸O a‘u foi o Ioane, na ou vaai ma ou faalogo i na mea; ua ou faalogo ma ou vaai, ona a‘u faapaū lea e ifo atu i vae o le agelu na na faaali mai ia te au ia mea.

⁹A ua fai mai o ia ia te au, Ia oe, aua lava; auā o a‘u o lou uso a auauna, ma lo le au perofeta ou uso, o lo latou foi o e tausi i upu o lenei tusi; ia e ifo i le Atua.

¹⁰Ua fai mai foi o ia ia te au, Aua e te faamaufaailogaina upu o le valoaga o lenei tusi; auā ua latalata ona aso.

¹¹O lē amioletonu ia amioletonu pea o ia, o lē eleelea ia eleelea pea o ia, o lē amiotonu ia amiotonu pea o ia, o lē paia ia paia pea o ia.

¹²Faauta foi, ou te vave alu atu; ua ia te au foi le taui ou te taui taitasi atu ia tusa ma lana ua fai.

¹³O a‘u le Alefa ma le Omeka, o le amataga ma le gataaga, o le muamua ma le mulimuli.

¹⁴Amuia i latou o e faia ana poloaiga, ina ia taga ia i latou le laau o le ola, ma ia latou ulu atu i le aai i ona faitotoa.

¹⁵A ua i tuapā o ulī, ma e faataulāitu, ma e faitaaga, ma e fasioti tagata, ma e ifo i tupua, atoa uma lava e ua loto i le tala pepelo ma latou faia.

¹⁶O a‘u o Iesu na ou auina atu la‘u agelu e molimau ia te outou i ia mea i ekalesia. O a‘u o le Aa ma le fanau a Tavita, o le fetu ao pupula.

¹⁷Ua fetalai mai le Agaga ma le faatoanofotane, Ina sau ia; ina fai atu foi ia o lē faalogo, Ina sau ia; o lē fia inu, ina sau ia, atoa ma lē manao i ai, ina ave fua ia le vai o le ola.

¹⁸Auā ou te ta‘utino atu ia i latou uma o e faalogo i upu o le valoaga o lenei tusi, Ai se tasi e faaopoopo mai se upu i nei upu, e faaopoopoina atu e le Atua ia te ia o mala ua tusia i lenei tusi.

¹⁹Ai se tasi foi e ave ese se upu i upu o le tusi o lenei valoaga, e aveeseina e le Atua lona tofi i le tusi o le ola, ma le aai paia, ma mea ua tusia i lenei tusi.

²⁰Ua fai mai lē molimau i nei mea, E moni, ou te vave alu atu. Amene. O lea lava, le Alii e Iesu, ia e afio mai.

²¹Ia ia te outou uma le alofa tunoa o lo tatou Alii o Iesu Keriso. Amene.