Read Samoan Old Version Bible – O LE TUSI PAIA FAAALIGA, 3 Bible Online

FAAALIGA, 3 - Samoan Old Version Bible – O LE TUSI PAIA bible

FAAALIGA, 3

¹Ia e tusi foi i le agelu a le ekalesia, o i Sarataisa, O mea nei ua fai mai ai le ua i ai Agaga e toafitu o le Atua, ma fetu e fitu, Ua ou iloa au galuega, ua ia te oe le igoa ua e ola, a ua e oti.

²Ia e mataala, ma ia e faatumauina mea ua totoe o le a mate; auā ou te lei iloa au galuega ona atoatoa i luma o le Atua.

³O lea foi ia e manatu ai i mea ua e maua ma ua e faalogo ai, ma ia e taofiina ai, ma ia e salamo. Afai foi e te le mataala, ou te alu atu ia te oe e pei o se gaoi, e te le iloa foi le itu aso ou te alu atu ai ia te oe.

⁴Ua ia te oe ni nai tagata i Sarataisa lava, o e ua le faaeleelea o latou ofu; latou te savavali ma a‘u i ofu sisina, auā ua tatau ai i latou.

⁵O lē manumalo, e faaofuina o ia i ofu sisina; ou te le sōloiesea foi lona igoa i le tusi o le ola, a e ou te ta‘u atu lona igoa i luma o lo‘u Tamā, ma luma o ana agelu.

⁶O le ua i ai taliga, ina faalogo mai ia o ia i le mea ua fetalai mai ai le Agaga i ekalesia.

⁷Ia e tusi foi i le agelu a le ekalesia o i Filatelefaia, O mea nei ua fai mai ai le Paia, o le faamaoni ia, o le ua i ai le ki a Tavita, o le na te talā, a e leai se na te faamauina; o le na te faamauina foi, a e leai se na te tatalaina;

⁸ua ou iloa au galuega; faauta, ua ou tuuina atu i ou luma le faitotoa ua avanoa, e leai foi se na te mafaia ona punitia; auā ua ia te oe sina malosi itiiti, ma ua e tausia la‘u upu, ma ua e le faafitia lo‘u igoa.

⁹Faauta, ou te tuuina atu i latou o i le sunako o Satani, o e o fai mai o Iutaia i latou, a e leai lava, a ua pepelo i latou; faauta, ou te ta‘ita‘i ia te i latou ina ia latou o atu i ou luma, ma ifo atu i ou vae; latou te iloa foi o a‘u ua ou alofa atu ia te oe.

¹⁰Ua e tausia le upu o lo‘u onosai, o lea foi ou te tausi ai ia te oe i le itu aso e tofotofoina ai, a oo mai i le lalolagi uma, e tofotofo ai i e o nonofo i le lalolagi.

¹¹Faauta, ou te vave alu atu; ia e taofi mau i le mea ua ia te oe, ne‘i avea e se tasi lou pale.

¹²O lē manumalo, ou te faia lea ma pou tu i le malumalu o lo‘u Atua, e le toe ulufafo lava ia, ou te tusi foi i ai le suafa o lo‘u Atua, ma le igoa o le aai a lo‘u Atua, o Ierusalema fou lea e alu ifo nai le lagi mai lo‘u Atua, atoa foi ma lo‘u igoa fou.

¹³O le ua i ai taliga, ina faalogo mai ia o ia i le mea ua fetalai mai ai le Agaga i ekalesia.

¹⁴Ia e tusi foi i le agelu a le ekalesia o i Laotikaia, O mea nei ua fai mai ai le Amene, o le molimau moni ma le faamaoni, o le amataga o mea na faia e le Atua,

¹⁵Ua ou iloa au galuega, e te le maalili, e te le vevela foi; ou te loto ina ia e maalili, pe vevela;

¹⁶o lenei, ua e faaleogalua, e te le maalili, e te le vevela foi, o le mea lea ou te luai atu ai ia te oe i lo‘u gutu

¹⁷Auā ua e fai mai, Ou te se mauoa, ua faatamaoaigaina a‘u, ou te le mativa foi i se mea e tasi; a ua e le iloa o oe o le malaia, ma le pagatia, ma le mativa, ma le tauaso, ma le le lavalava;

¹⁸ou te fai atu ai ia te oe, ia e faatau atu ia te au le auro ua faamamāina i le afi, ina ia e tamaoaiga ai; ma ofu sisina ina ia e ofu ai, ina ne‘i iloa le mā o lou le lavalavā; ma le vaimata e nini a‘i ou mata, ina ia e pupula ai.

¹⁹Ou te aoai ma sasa ia i latou uma ou te alofa i ai; o lenei, ia e vilivilitai, ma ia e salamo.

²⁰Faauta, ou te tu atu i le puipui ma tu‘itu‘i atu; ai se tasi e faalogo mai i lo‘u leo, ma tatala mai le puipui, ou te ulufale atu ia te ia, ma te tali sua foi ma ia, o ia foi ma a‘u.

²¹O lē manumalo ou te avatua i te ia ma te nonofo faatasi ma a‘u i lo‘u nofoālii, e pei o a‘u foi ona ou manumalo, ua ma nonofo foi faatasi ma lo‘u Tamā i lona nofoālii.

²²O le ua i ai taliga, ina faalogo mai ia o ia i le mea ua fetalai mai ai le Agaga i ekalesia.