Read Samoan Old Version Bible – O LE TUSI PAIA FAAALIGA, 4 Bible Online

FAAALIGA, 4 - Samoan Old Version Bible – O LE TUSI PAIA bible

FAAALIGA, 4

¹Ua mavae atu ia mea, ona ou iloa atu lea, faauta, o le faitotoa ua avanoa i le lagi, o le uluai leo foi na ou faalogo ai e pei o le pu ona tautala mai ia te au, ua faapea mai, Ina sau ia i luga nei, ou te faaali atu ai ia te oe mea e tusa ona tutupu amuli.

²Ona a‘u i le Agaga loa lea; faauta foi, ua tu mai le nofoālii i le lagi, ua tietie foi le tasi i le nofoālii;

³o lē tietie mai foi ua pei o le maa iasepi ma le salikea lona tino mai; ua siosioina foi le nofoālii e le nuanua e pei o le samaraki lona tino mai.

⁴Ua siosioina foi le nofoālii e nofoālii e luafulu ma le fa; na ou iloa foi o toeaina e toaluafulu ma le toafa o tietie i ia nofoālii, ua oofu i ofu sisina; ua i o latou ulu foi o pale auro.

⁵Ua oo mai foi uila, ma faititili, ma leo mai le nofoālii; o lamepa foi e fitu o mumū i luma o le nofoālii, o Agaga ia e toafitu o le Atua.

⁶Ua i luma foi o le nofoālii le sami tioata, e pei o le maa tioata; ua i totonu o le nofoālii ma ua liolioina le nofoālii e mea ola e fa ua tutumu i mata i luma atoa ma tua.

⁷O le mea ola muamua e pei o le leona, o lona lua o mea ola e pei o se povi taanoa, o lona tolu o mea ola e pei o le tagata ona mata, o lona fa foi o mea ola e pei o le aeto ua lele.

⁸O mea ola foi e fa e taitasi ma ona apaau e ono, ua faataaliolio ai, ma ua mata atoa i latou i totonu; latou te le mapu lava i le ao ma le po i le fai atu, E paia, e paia, e paia le Alii le Atua e ona le malosi uma lava, o le na soifua, o loo soifua foi, o le a afio mai.

⁹A vivii foi, ma faaneenee, ma faafetai atu mea ola i le o tietie i le nofoālli, o lē soifua e faavavau e faavavau lava,

¹⁰ona faapaū ai lea o toeaina e toaluafulu ma le toafa i luma o lē tietie i le nofoālii, ma ifo atu i lē soifua e faavavau e faavavau lava, ma lafo o latou pale i luma o le nofoālii, o loo faapea atu,

¹¹Le Alii e, e tatau lava oe ina ia tuu atu ia te oe le viigia, ma le faaneeneega, ma le mana; auā na e faia mea uma lava, ona o lou finagalo foi e i ai i latou ma ua faia.