Read Samoan Old Version Bible – O LE TUSI PAIA FAAALIGA, 8 Bible Online

FAAALIGA, 8 - Samoan Old Version Bible – O LE TUSI PAIA bible

FAAALIGA, 8

¹Ua tatalaina foi e ia o lona fitu o faamaufaailoga, ona lologo ai lea o e i le lagi pe atoa le vaeluagalemu o le itu aso e tasi.

²Na a‘u iloa foi agelu e toafitu o e tutū i luma o le Atua, ua avatu foi ia te i latou pu e fitu.

³Ua sau foi le tasi agelu, ma tu mai i le fata faitaulaga, ua ia te ia le ipu auro e faamu ai mea manogi; ua avatu ia te ia mea manogi e tele, ina ia avatu ai atoa ma talosaga a le au paia uma i luga o le fata auro ua i luma o le nofoālii.

⁴O le asu foi o le mea manogi ua i le lima o le agelu ua alu ae, atoa ma talosaga a le au paia, i luma o le Atua.

⁵Ua tago foi le agelu i le ipu e faamu ai mea manogi, ua ia faatumuina ai i le afi ai le fata faitaulaga, ua lafo ifo ai i le lalolagi; ona i ai lea o leo, ma faititili, ma uila, ma le mafuie.

⁶O agelu e toafitu ua i ai pu e fitu, ua latou sauniuni e ili.

⁷Ua ili foi e le agelu muamua le pu, ona i ai lea o le uato‘a ma le afi ua fefiloi ma le toto, ua lafo ifo i le lalolagi; ona susunuina ai lea o lona tolu o vaega o laau, ma ua susunuina vao iti lauolaola uma lava.

⁸Ua ili foi e lona toalua o agelu le pu, ona i ai lea peiseai se mauga tele ua mu i le afi, ua lafo ifo i le sami; ona liu toto lea o lona tolu o vaega o le sami.

⁹Ona mamate ai lea o lona tolu o vaega o mea ola o i le sami, atoa ma lona tolu o vaega o vaa ua faaumatia.

¹⁰Ua ili foi e lona toatolu o agelu le pu, ona paū ai lea nai le lagi o le fetu tele, ua mu e pei o se lamepa, ma ua paū ifo i lona tolu o vaega o vaitafe, atoa ma puna o vai.

¹¹Ua igoa le fetu o le Oona; ona faaoonaina ai lea o lona tolu o vaega o vai, ua oti foi tagata e toatele i le vai, ina ua faaoonaina.

¹²Ua ili foi e lona toafa o agelu le pu, ona taia ai lea o lona tolu o vaega o le la, ma lona tolu o vaega o le masina, atoa ma lona tolu o vaega o fetu, ina ia faapouliuligia o lona taitolu o latou vaega, e lei malamalama foi o lona tolu o vaega o le ao, ua faapea foi ma le po.

¹³Na ou iloa, ma ou faalogo i le tasi agelu ua lele i le taulotoaiga o le lagi, ua faapea mai ma le leo tele, Aue, aue, aue i e o nonofo i le lalolagi, ona o isi iligāpu a agelu e toatolu o le a ilia mai.