Read Samoan Old Version Bible – O LE TUSI PAIA RUTA, 1 Bible Online

RUTA, 1 - Samoan Old Version Bible – O LE TUSI PAIA bible

RUTA, 1

¹O ona aso na faamasino ai faamasino, sa i ai le oge i le nuu; ona alu ai lea o le tasi tagata nai Peteleema o Iuta e āumau i le nuu o Moapi, o ia, ma lana avā, ma ona atalii e toalua.

²O Elimeleka le igoa o le tagata, o le igoa o lana avā o Naomi, o igoa foi o ona atalii e toalua o Maalona ma Kiliona, o sa Efaratā i latou mai Peteleema o Iuta; ua o atu i latou i le nuu o Moapi, ua nonofo ai.

³Ua oti Elimeleka le tane a Naomi; ua totoe o ia ma ana tama e toalua.

⁴Ua la fai avā i fafine o Moapi, o le igoa o le tasi o Orepa, o le igoa o le tasi o Ruta; ua latou nonofo i lea mea pe sefulu ni tausaga.

⁵Ua oti foi o i laua o Maalona ma Kiliona; ona toe lea o le fafine, ua oti ana tama e toalua atoa ma lana tane.

⁶Ua tu i luga o ia ma avā a ana tama, ia toe foi nai le nuu o Moapi, auā ua ia faalogo i le nuu o Moapi, ua asiasi Ieova i lona nuu, ma na foai atu mea e ‘ai ia te i latou.

⁷Ona alu ese ai lea o ia i le mea sa i ai, o ia ma avā a ana tama e toalua faatasi ma ia; ua latou ui i le ala e foi mai ai i le nuu o Iuta.

⁸Ona fai mai lea o Naomi i avā a ana tama e toalua, O ia oulua, ina foi atu taitasi i le aiga o lona tinā; ia agalelei Ieova ia te oulua, pei ona faia e oulua i e ua oti atoa ma a‘u;

⁹ia foai mai e Ieova ia te oulua ina ia maua e oulua le mapusaga taitoatasi i le aiga o lana tane. Ua sogi atu o ia ia te i laua, ona fetagisi ai lea o i latou ua leo tetele.

¹⁰Ua la fai atu ia te ia, Tatou te foi atu lava ma oe i lou nuu.

¹¹A ua fai mai Naomi, Ina foi atu ia, la‘u fanau e; se a le mea tatou te o ai ma oulua? Ua toe ea ni tama i lo‘u manava e fai ma a oulua tane?

¹²Ina foi ia, la‘u fanau e, ina o ia oulua; ua ou loomatua, ua siliga ona ou toe nofo tane; e ui lava ina ou fai atu, Atonu e maua; afai foi e ia te au se tane nanei po,

¹³ma ou fanaua ni tama tane, lua te faatali ea seia matutua i laua? Lua te nofo fua ea e faatali ia te i laua? La‘u fanau e, aua, auā ua sili lo‘u tiga i lo oulua, ina ua oo mai ia te au le aao o Ieova.

¹⁴Ona latou toe fetagisi ai lea ua leo tetele; ua sogi Orepa i le tinā o lana tane, a ua pipii atu Ruta ia te ia.

¹⁵Ua fai mai o ia, Faauta, ua foi le avā a le uso o lau tane i lona nuu ma ona atua, ina e mulimuli atu i le avā a le uso o lau tane.

¹⁶A ua fai atu Ruta, Aua e te finau ia te au ina ia ou tuulafoai ia te oe, ia le mulimuli atu ia te oe; auā o le mea e te alu i ai, ou te alu ai foi; o le mea e te nofo ai, ou te nofo ai, e fai lou nuu mo‘u nuu; e fai lou Atua mo‘u Atua;

¹⁷o le mea e te oti ai, ou te oti ai, e tanu ai foi a‘u; ia faapea ona faia e Ieova ia te au, ma ia faaopoopo i ai, pe afai e tuueseeseina i taua ma oe i se tasi mea se‘i vagana le oti.

¹⁸Ua iloa ua faamalosi o ia e o ma ia, ona le toe fai atu ai lea ia te ia.

¹⁹Ua o ane i lana, ua oo mai i Peteleema; o loo ua oo mai foi i Peteleema, ona vevesi lea o le aai uma ia te i laua, ua fai ane i latou, O Naomi ea lenei?

²⁰A ua fai atu o ia ia te i latou, Aua tou te ta‘ua a‘u o Naomi, a ia ta‘ua a‘u o Mara; auā ua matuā oona mea ua faia ia te au e Lē ona le malosi uma lava.

²¹Na ou alu atu ua tamaoaiga, ua faafoiina mai a‘u e Ieova ua mativa; se a le mea tou te ta‘ua a‘u, o Naomi? auā ua faatigaina a‘u e Ieova, ua malaia a‘u i Lē ona le malosi uma lava.

²²Ua foi mai Naomi atoa ma Ruta le Moapi, le avā a lana tama, faatasi ma ia, o le na foi mai mai le nuu o Moapi; ua la oo mai i Peteleema i le amataga a le seleselegākarite.