Read Samoan Old Version Bible – O LE TUSI PAIA RUTA, 3 Bible Online

RUTA, 3 - Samoan Old Version Bible – O LE TUSI PAIA bible

RUTA, 3

¹Ua fai mai Naomi le tinā o lana tane ia te ia, La‘u tama e, ou te le saili ea se mapusaga mo oe ina ia manuia ai oe?

²O lenei, e le ua tatou aiga ea ma Poasa, sa outou i ai ma ana auauna fafine? faauta, o loo faasavili e ia le karite i le po nei, i le mea e sasa ai saito.

³Taele ia oe, ma uu, ma ofu i ou ofu, ma alu ifo i le mea e sasa ai saito; aua ne‘i iloa oe e le tagata seia uma ona ‘ai o ia ma inu.

⁴A taoto ia, e te vaai atu i le mea e taoto ai, e te alu ma susue i le mea e ufiufi a‘i ona vae, ma e taoto ai; ona faaali mai lea e ia ia te oe le mea e te faia.

⁵Ua fai atu o ia ia te ia, O mea uma ua e fai mai ai ia te au oe te faia lava.

⁶Ona alu ifo lea o ia i le mea e sasa ai saito, ua faia e ia e tusa ma mea uma na fai mai ai le tinā o lana tane ia te ia.

⁷Ua ‘ai Poasa ma inu, ua fiafia lona loto, ona alu lea o ia e taoto i tafatafa o le faaputugā-karite. Ona alu lemu lea o ia, ua susue le mea na ufiufi a‘i ona vae, ua taoto ai.

⁸Ua oo i le tulua o po ma ao, ua fefe le tagata, ua liliu, faauta, o le fafine o loo taoto i ona vae.

⁹Ona fai mai lea o ia, O ai ea oe? Ua tali atu ia, O a‘u o Ruta lau auauna fafine; faaafu mai ia lou pito ofu i lau auauna fafine, auā o ia te oe le tausi tama.

¹⁰Ua fai mai o ia, Lo‘u afafine e, ia faamanuia Ieova ia te oe; ua faasilisili lou alofa mulimuli nei i le na muamua, ina ua e le alu e mulimuli atu i taulelea, po o sē mativa po o sē mauoa.

¹¹O lenei, lo‘u afafine, aua e te fefe; o mea uma ua e fai mai ai ou te faia lava mo oe; auā ua iloa e le aai uma o lo‘u nuu, o le fafine amio lelei lava oe.

¹²O lenei, e moni o ia te au le tausi tama; peitai o le tasi tagata o le aiga, e muamua o ia ia te au.

¹³Nofo pea ia oe i lenei po, a oo i le taeao, afai e fai o ia ma tausi tama ua lelei, ina tausi tama ia o ia; a le mafai o ia ona tausi tama ia te oe, ou te tausi tama ia te oe; o loo soifua Ieova; ina taoto ia oe seia ao.

¹⁴Ona taoto ai lea o ia i ona vae, ua oo i le ao; ona tulai lea o ia, a o le feiloai tagata; ua fai atu Poasa, Aua ne‘i iloa e se tasi ua sau se fafine i le mea e sasa ai saito.

¹⁵Ua fai mai o ia, Tala mai ia o lou pulupulu, ma fofola mai; ua fofola e ia, ona fua mai lea e ia o fua o karite e ono, ua tuu i luga ia te ia; ona alu ai lea o ia i le aai.

¹⁶Ona alu atu lea o ia i le tinā o lana tane, ua fai mai o ia, La‘u tama e, o ai ea oe? Ua ta‘u atu o ia ia te ia i mea uma na faia e le tagata ia te ia.

¹⁷Ua fai atu foi o ia, O fua nei e ono o karite ua na foai mai ia te au, auā ua fai mai, Aua le alu fua i le tinā o lau tane.

¹⁸Ona fai mai lea o ia, La‘u tama e, nofo ia, seia e iloa se mea e tupu ai; auā e le mapu le tagata seia faaiu lava le mea i le asō.