Read Samoan Old Version Bible – O LE TUSI PAIA RUTA, 4 Bible Online

RUTA, 4 - Samoan Old Version Bible – O LE TUSI PAIA bible

RUTA, 4

¹Ua alu ae Poasa i le faitotoa o le aai, ua nofo ai; faauta i le tagata o lo latou aiga na fai atu ai Poasa, ua alu ane. Ona fai atu lea o ia, Le alii e, ina afe mai ia, ma e nofo i le mea nei; ona afe ane lea o ia, ua nofo ai.

²Ua aami e ia toeaina o le aai e toasefulu, ua fai atu i ai, Ina nonofo ia outou i le mea nei; ona latou nonofo ai lea.

³Ona fai atu lea o ia i le tagata o lo latou aiga, O le fāsi fanua sa i lo ta uso o Elimeleka o le a faatau e Naomi, ua foi mai nai le nuu o Moapi;

⁴na ou fai ane foi, ou te ta‘u atu ia te oe, o loo faapea, Ina faatau ia i luma o e nonofo mai, ma luma o toeaina o lo‘u nuu; afai e te faatau ai; ina faatau ia; afai e te le faataulia, ina fai mai ia ia te au ina ia ou iloa; auā e leai se tasi e muamua ia te oe i le faatau; o a‘u foi ou te aupito atu ia te oe. Ona fai mai lea o ia, Ou te faataulia lava.

⁵Ua fai atu Poasa, O le aso e te faatau ai le fanua nai le lima o Naomi, e te faatau foi nai ia Ruta le fafine Moapi, le avā a le ua oti; e faatumau ai le igoa o le ua oti i lona tofi.

⁶Ona fai mai lea o le tagata o le aiga, Ou te le mafaatau ai mo‘u, ne‘i ou faaleaoga i lo‘u tofi; ia e faatau mo oe le fanua, auā ou te le mafai ona faataulia.

⁷O lenei le masani i Isaraelu anamua i le faatau mai ma faatau atu, e faamau a‘i mea uma; ua tatala e le tasi tagata lona seevae, ua avatu i le tasi, o le tu lava lea a Isaraelu.

⁸Ua fai mai le tagata o lo latou aiga ia Poasa, Faatau ia mo oe; ona tatala ai lea e ia o lona seevae.

⁹Ona fai atu lea o Poasa i toeaina ma le nuu uma, O molimau outou i lenei aso, ua ou faatau mea uma sa ia Elimeleka, ma mea uma sa ia Kiliona ma Maalona nai le lima o Naomi;

¹⁰o Ruta foi le fafine Moapi, le avā a Maalona, ua ou faatau ia te ia e fai ma‘u avā, e faatumau ai le igoa o le ua oti i lona tofi, ia le galo le igoa o le ua oti ai lona au uso, ma le faitotoa o lona aai; o molimau i ai outou i lenei aso.

¹¹Ua fai mai tagata uma sa i le faitotoa, atoa ma toeaina, O molimau lava i ai i matou; ia avea e Ieova lenei fafine, o le a alu i lou aiga, pei o Rasela ma Lea sa la ati ae le aiga o Isaraelu; ia e malosi i Efarata, ma ia viia oe i Peteleema;

¹²ia avea foi lou aiga pei o le aiga o Faresa na fanau mai e Tamara ia Iuta, nai le fanau e foai mai e Ieova ia te oe i lenei teine.

¹³Ua ave e Poasa ia Ruta, ua fai mana avā; ua alu atu o ia ia te ia, ona to ai lea o ia i le pule a Ieova, ua fanau mai lana tama tane.

¹⁴Ua fai mai fafine ia Naomi, Faafetai ia Ieova ina ua foai atu ia te oe i lenei aso se tasi e auga i ai lou aiga, ia viia lona igoa i Isaraelu.

¹⁵E fai o ia ia te oe ma faamalosi o lou ola, ma tausi i lou loomatua, auā o le avā a lau tama, o lē alofa ia te oe, ua fanau; ua lelei o ia ia te oe e sili i tama tane e toafitu.

¹⁶Ua tago Naomi i le tama, ua tuu i lona fatafata, ma tausi ia te ia.

¹⁷O fafine e na tuaoi ma ia, ua latou faaigoa ia te ia, ua faapea; ua fanau mai se tama ia Naomi, ua latou faaigoa ia te ia, o Opeta, o le tamā o ia o Iese, o le tamā o Tavita.

¹⁸O le gafa lenei o Faresa; na fanaua e Faresa o Esarona;

¹⁹na fanaua e Esarona o Rama; na fanaua e Rama o Aminatapu;

²⁰na fanaua e Aminatapu o Naasona; na fanaua e Naasona o Salemona;

²¹na fanaua e Salemona o Poasa; na fanaua e Poasa o Opeta; na fanaua e Opeta o Iese;

²²na fanaua e Iese o Tavita.