Read Samoan Old Version Bible – O LE TUSI PAIA I. SAMUELU, 16 Bible Online

I. SAMUELU, 16 - Samoan Old Version Bible – O LE TUSI PAIA bible

I. SAMUELU, 16

¹Ua fetalai mai Ieova ia Samuelu, E te faanoanoa ia Saulo seia afea?Auā o a‘u, ua ou lafoai ia te ia, ina ia le fai ma tupu o Isaraelu; faatumu ia lau fagu nifo i le suāuu, i le e alu, ou te auina atu oe ia Iese le Peteleema, auā ua ou iloa i ona atalii, le tasi ou te faia ma tupu.

²Ua fai atu Samuelu, Pe faapefea ona ou alu atu ai? A faalogo ai Saulo, ona fasioti ai lea o ia ia te au. Ua fetalai mai Ieova, Ia e avatu se tamai povi, ma fai ane, Ua ou sau e fai le taulaga ia Ieova.

³E te fai atu foi ia Iese e alu ane i le taulaga; a o a‘u, ou te faailoa ia te oe le mea e te faia, ona e faauu lea i le ou te fai atu ai ia te oe.

⁴Ona faia lea e Samuelu le mea na fetalai mai ai Ieova; ua alu i Peteleema, ona fefefe ai lea o toeaina o le aai i lona alu atu, ua fi mi, E te maliu mai ea ma le filemu?

⁵Ona tali atu ai lea o ia, Ua ou sau ma le filemu e fai ai taulaga ia Ieova; ina faapaia outou ia te outou, ma o mai ia te au e fai le tauluga. Ua ia faapaia ia Iese ma ona atalii, ma fai atu ia te i latou e o mai i le taulaga.

⁶Ua o mai i latou, ona vaai lea o ia ia Eliapo, ua fai ane, E moni lava, o loo i luma o Ieova le a faauuina e ia.

⁷A ua fetalai mai Ieova ia Samuelu, Aua e te vaai i lona tino, po o le maualuga o lona tino, auā ua ou tetee ia te ia; auā e le vaai Ieova pei o le vaai o tagata, auā e vaai tagata i le tino, a e vaai Ieova i le loto.

⁸Ona valaau lea o Iese ia Apinatapa, ia alu ane o ia i luma o Samuelu; a ua fai atu ia, E lei filifilia foi e Ieova lenei tagata.

⁹Ona fai atu lea o Iese ia alu ane o Sama; ua fai atu ia, E lei filifilia foi e Ieova lenei tagata.

¹⁰Ua fai atu Iese ia o ane ona atalii e toafitu i luma o Samuelu. Ua fai atu foi Samuelu ia Iese, E lei filifilia e Ieova i latou nei.

¹¹Ona fai atu lea o Samuelu ia Iese, Ua atoa mai ea taulealea? Ua fai mai o ia, Ua toe lava o le uii; faauta foi, o loo leoleo ia i mamoe. Ona fai atu lea o Samuelu ia Iese, Ia aami atu ia te ia, auā tatou te le vagavagai le laoai seia sau o ia iinei.

¹²Ua ia aami atu ia te ia, ona sau ai lea o ia; o ia foi ua enaenamūmū lona lauulu, ua manaia foi ona mata, ma ua aulelei lava. Ua fetalai mai Ieova, Tulai ia, ina faauu ia te ia, auā o ia lava lena.

¹³Ona tago lea o Samuelu i le fagu nifo o suāuu, ua faauu a‘i ia te ia i luma o ona uso; ona osofia lea o Tavita e le Agaga o Ieova, na afua mai i lea lava aso. Ona tulai lea o Samuelu, ua alu i Rama.

¹⁴Ua te‘a le Agaga o Ieova ia Saulo, ona osofia lea o ia e le agaga leaga mai ia Ieova.

¹⁵Ua fai atu auauna a Saulo ia te ia, Faauta mai, ua osofia oe e le agaga leaga mai le Atua;

¹⁶ia fetalai mai nei lo matou alii i au auauna i ou luma, matou te sailia se tagata ua poto e ta i le kitara; i le a oo mai le agaga leaga mai le Atua ia te oe, ona ta ai lea e ia i lona lima, e te lelei ai.

¹⁷Ona fai mai lea o Saulo i ana auauna, Saili mai ia mo a‘u se tagata poto e ta i le kitara, ma outou aumaia o ia ia te au.

¹⁸Ona tali atu lea o le tasi o le au taulealea, ua faapea atu, Silasila mai ea, ua ou iloa le atalii o Iese le Peteleema, ua poto ia e ta i le kitara; o le tagata malosi tele, ma le toa, ma le mau upu, o le tagata aulelei, o loo ia te ia foi Ieova.

¹⁹Ona auina atu lea e Saulo o le sāvali ia Iese, ua fai atu ai, Ia e auina mai ia te au lou atalii o Tavita, o loo i ai i mamoe.

²⁰Ona ave lea e Iese o le asini ma le avega o areto, ma le fagu pa‘u o uaina, ma le tamai ‘oti e tasi; ua tuu atu ai i le lima o Tavita lona atalii na te ave ia Saulo.

²¹Ua oo atu Tavita ia Saulo, ua tu atu i ona luma; ona alofa tele mai lea o ia ia te ia; ua fai foi o ia ma ona soātau.

²²Ua alu atu foi le feau a Saulo ia Iese, ua faapea, Ia tu Tavita i o‘u luma, auā ou te alofa ia te ia.

²³A oo mai le agaga mai le Atua ia Saulo, ona tago ai lea o Tavita i le kitara, ua ta i lona lima; ona mapu ai lea o Saulo, ua lelei ai o ia, ua alu ese ai le agaga leaga ia te ia.