Read Samoan Old Version Bible – O LE TUSI PAIA I. SAMUELU, 17 Bible Online

I. SAMUELU, 17 - Samoan Old Version Bible – O LE TUSI PAIA bible

I. SAMUELU, 17

¹Ua faapotopoto e Filisitia a latou ‘au e tau. Ua faapotopoto i latou i Suka o i sa Iutā; ua latou to lauapi i le va o Suka ma Aseka i Efesetame.

²Ua faapotopoto foi Saulo ma tagata Isaraelu, ua to lauapi i le vanu o le tapeneto, ua latou tofi ai le taua e o atu e tau ma Filisitia.

³Ua tutū mai foi Filisitia i le mauga i le tasi itu, a ua tu ū atu Isaraelu i le mauga i le tasi itu, a e va a‘i le vanu.

⁴Ona alu ane lea o le toa nai le togālauapi a Filisitia, o Koliata lona igoa, mai Kata; o lona maualuga e ono kupita ma le āga e tasi.

⁵Sa i lona ulu le pulou ‘apa memea, sa ofu i le ufifatafata faauna o i‘a; o le mamafā o lona ufifatafata ua lima gaafe o sekeli o ‘apa memea.

⁶Sa fai foi ufivae ‘apa memea i ona vae, ma le tao ‘apa memea i lona vaitau‘au.

⁷O le fuata o lona tao e pei o le laau faalava o lē lalaga ie, o le matatao o lona tao e ono galau sekeli o uamea; ua muamua atu i ona luma le na ave le tali pupuni.

⁸Ua tu o ia ma valaau i le itutaua a Isaraelu, ua faapea mai ia te i latou, O le a le mea tou te omai ai e tofi le taua? E le o a‘u ea le Filisitia, a o outou o auauna a Saulo outou? Filifili ia e outou se tagata e alu ifo ia te au;

⁹afai na te mafaia ona ma tau, ma fasi ia te au, matou te fai ma auauna ia te outou; a e afai ou te malo ia te ia, ma ou fasi ia te ia, ona fai lea o outou ma a matou auauna, e auauna mai ia te i matou.

¹⁰Ua fai mai le Filisitia, O a‘u nei, ou te faamasiasi i le itu taua a Isaraelu i le aso nei; tuu mai ia te au se tagata ma te tau.

¹¹Ua faalogo Saulo ma Isaraelu uma i nei upu a le Filisitia, ona matatau ai lea, ma fefefe tele i latou.

¹²O Tavita o le atalii ia o le tasi tagata o Efarata, o Peteleema o Iuta, ua igoa ia Iese, e toavalu ona atalii; na ta‘utoeaina o ia e tagata i ona aso o Saulo.

¹³O atalii o Iese e toatolu e na matutua ua latou ō ma Saulo i le taua; o igoa nei o ona atalii e toatolu na o i le taua, o Eliapo le ulumatua, o le aupito ane i ai o Apinatapa, o lona toatolu o Sama.

¹⁴O Tavita o le uii ia; a o le toatolu na matutua ua latou mulimuli ia Saulo.

¹⁵Ua alu Tavita, ua foi atu nai ia Saulo e leoleo mamoe a lona tamā i Peteleema.

¹⁶Ua faalatalata mai le Filisitia i le taeao ma le afiafi, ua tu mai i aso e fagafulu.

¹⁷Ua fai mai Iese ia Tavita lona atalii, Ina avatu ia i ou uso o lenei efa o saito tunu, ma potoi areto nei e fuagafulu, ma ē momo‘e atu i ou uso i le togālauapi.

¹⁸Ave foi nei tufaaga a suāsusu maaa e sefulu i le alii o lo latou toaafe, ma ia e asiasi i ou uso po ua manuia, ma ia au mai so latou faamaoni.

¹⁹O Saulo, ma i latou, ma tagata Isaraelu uma sa i le vanu o le tapeneto i latou, o loo tau ma Filisitia.

²⁰Ona tulai lea o Tavita i le taeao, ua tuuina atu mamoe i se leoleo, ua ia ave mea, ua alu foi ia pei ona poloai mai o Iese ia te ia; ua oo atu ia i le ‘olo o le a ō ‘au i le taua, ua pa le alaga o le a tau.

²¹Auā na tofi le taua a Isaraelu ma Filisitia, ma ua fesagai itu taua.

²²Ona tuu atu lea e Tavita o mea na ia te ia i le lima o le leoleo i mea, ua momo‘e atu i ‘au, ua alu ma ofo atu i ona uso.

²³O loo tautala o ia ma i latou, faauta, ua alu ae le toa, o Koliata lona igoa, o le Filisitia, o le Kata, ai ‘au a Filisitia, ua tautala o ia pei o ana upu na luai fai; ua faalogo ai Tavita.

²⁴O tagata uma o Isaraelu ua latou vaai atu i le tagata, ona latou sosola lea i ona luma, ma ua latou matuā fefefe ai.

²⁵Ua fai ane le tasi tagata o Isaraelu, Ua outou iloa ea lenei tagata ua alu ae? Auā ua alu ae ia e faifai ia Isaraelu; o le tagata foi na te fasioti ia te ia, e faatamaoaigaina o ia e le tupu i le oa tele, e avatu foi lona afafine e fai mana avā, e faasaolotoina foi e ia le aiga o lona tamā ia Isaraelu.

²⁶Ua fesili atu Tavita i tagata na tutū faatasi ma ia, ua faapea, Se a se mea e avatu ma le tagata na te fasia lenei Filisitia, e galo ifo ai le faifai ia Isaraelu? Auā po o ai lenei Filisitia lē peritomeina na te faifai ai i ‘au a le Atua soifua?

²⁷Ona tali mai lea o le nuu ia te ia e tusa ma ia upu na muamua, ua faapea, E faapea ona faia i le tagata na te fasi ia te ia.

²⁸Ua faalogo Eliapo lona uso e matua i lana fesili i tagata, ona tupu ai lea o le ita o Eliapo ia Tavita, ua fai mai foi, Se a le mea ua e sau ai? Ua e tuuina atu foi ia te ai o nā mamoe itiiti i le vao? Ua ou iloa lava lou faamaualuga ma le leaga o lou loto, auā o le fia matamata i le taua ua e sau ai.

²⁹Ona fai atu lea o Tavita, O le a ea le mea ua ou faia nei?

³⁰Ua fai fua ea la‘u mea? Ua liliu ese o ia ia te ia, ua faasaga atu i le tasi, ua fai atu foi pei o na upu; ona tali mai lea o le nuu pei o le luai upu.

³¹Ua latou faalogologo i upu na fai mai ai Tavita, ona latou ta‘uina atu ai lea ia Saulo. Ona aami ai lea o ia ia te ia.

³²Ua fai mai Tavita ia Saulo, Aua ne‘i vaivai le loto o se tasi tagata ona o ia; e alu lava lau auauna e tau ma lena Filisitia.

³³Ona fai mai lea o Saulo ia Tavita, E te le lavā ona oulua tau ma lena Filisitia, auā o oe le tama itiiti, a o ia o le toa talu ona tama itiiti.

³⁴Ona tali atu lea o Tavita ia Saulo, Sa leoleo lau auauna i mamoe a lona tamā; ona alu atu lea o le leona ma le urosa, ua ave le tama‘i mamoe nai le lafu;

³⁵Ona ou tuliloa lea ia te ia, ma ou fasi ia te ia, ma segi mai le mea nai lona gutu; na tu mai o ia ia te au, ona ou tago ai lea i lana ‘ava, ma fasi ia te ia, ua mate ai.

³⁶Na fasia e lau auauna le leona atoa ma le urosa; e faapea foi lena Filisitia lē peritomeina, e pei o so laua, ina ua ia faifai i le itu taua a le Atua soifua.

³⁷Ua fai atu foi Tavita, O Ieova na ia laveai ia te au nai le lima o le leona ma le lima o le urosa, o ia lava na te laveai ia te au ai le lima o lena Filisitia. Ona fai mai lea o Saulo ia Tavita, Alu ia oe, ia ia te oe foi Ieova.

³⁸Ona faaofu lea e Saulo i Tavita i ona ofu, ua faapulouina lona ulu i le pulou ‘apa memea, ua faaofu foi ia te ia i le ufifatafata uamea.

³⁹Ua fusi e Tavita lana pelu i luga o ona ofu; ona faataitai lea o ia ona alu, auā na ia le masani ai. Ona fai mai lea o Tavita ia Saulo, Ou te le mafai ona alu ma nei mea, auā ou te lei masani ai. Ona tuu ese ai lea e Tavita o mea nai ia te ia.

⁴⁰Ua ia ave lona tootoo i lona lima, ma ua filifili i maa lamolemole e lima mai le alia, ua fafao ai i le ‘ato o le leoleo mamoe sa ia te ia, (o le taga foi lea,) ma le maatā i lona lima; ona faalatalata atu lea o ia i le Filisitia.

⁴¹Ua sau foi le Filisitia, ua faalatalata mai ia Tavita, ua muamua i ona luma le tagata sa ave lona talipupuni.

⁴²Ua vaavaai mai le Filisitia, ua na iloa atu ia Tavita, ona ‘ino‘ino ai lea ia te ia; auā o le tama itiiti o ia, ua enaenamumū lona lauulu, ua manaia foi ona mata.

⁴³Ua fai mai le Filisitia ia Tavita, Ou te se ulī ea a‘u, ina ua e sau ia te au ma tootoo? Ona fetuu lea le Filisitia ia Tavita i ona atua.

⁴⁴Ua fai mai foi le Filisitia ia Tavita, Sau ia ia te au, ou te foai atu ai lou tino i manu felelei ma manu tataa.

⁴⁵Ona tali atu lea o Tavita i le Filisitia, Ua e sau ia te au ma le pelu, ma le tao, ma le tao leoleo; a o a u, ou te alu atu ia te oe i le suafa o Ieova o ‘au, o le Atua o le itu taua a Isaraelu ua e faifai i ai.

⁴⁶O le aso nei e tuuina mai ai oe e Ieova i lo‘u lima, ou te fasi ia te oe, ma ave ese lou ulu; ou te foai atu foi tino oti o ‘au a Filisitia i lenei aso i manu felelei ma manu feai e tataa; e iloa ai le lalolagi uma, o i ai le Atua ia Isaraelu.

⁴⁷E iloa ai foi e lenei faapotopotoga uma, e le faaolaina tagata e Ieova i se pelu ma se tao; auā o loo ia Ieova le taua, na te tuuina mai outou i o matou lima.

⁴⁸Ua tulai le Filisitia, ua alu ane, ma faalatalata e faafetaiai ia Tavita; ona faataalise lea o Tavita, ua momo‘e atu i le itu tauā e faafetaiai i le Filisitia.

⁴⁹Ona tago ifo lea o Tavita i le ‘ato, ua avea ai se maa, na sasau e ia le maatā, ua lavea le Filisitia i lona muaulu, ua goto le maa i lona muaulu, ona paū faō ai lea o ia i le eleele.

⁵⁰Ua malo Tavita i le Filisitia i le maatā ma le maa; ua na fasi le Filisitia, ua oti ai, a e leai se pelu i le lima o Tavita;

⁵¹ona momo‘e atu ai lea Tavita, ua tu i luga o le Filisitia, ua tago i lana pelu, ua to ae nai lona faamoega, ua na faaoti ai ia te ia, ma vavae ai lona ulu. Ua vaai Filisitia ua oti lo latou toa, ona sosola ai lea o i latou.

⁵²Ona tutū lea o tagata o Isaraelu ma Iuta, ua sŏlovi, ma tuliloa ia Filisitia e oo atu i le vanu, ua oo foi i puipui o Ekerona. Ua pauu e na manunua o Filisitia i le ala o Saraima, ua oo i Kata, na oo foi i Ekerona.

⁵³Ua foi atu le fanauga a Isaraelu sa tulitatao ia Filisitia, ona latou vetea lea o latou togālauapi.

⁵⁴Ua ave e Tavita le ulu o le Filisitia, ua au mai i Ierusalema, a o ana mea ua tuu e ia i lona fale ie.

⁵⁵Na vaai Saulo ia Tavita ina ua alu atu e faafetaiai i le Filisitia, ona fai atu ai lea o ia ia Apineru le pule i ‘au, Apineru e, se atalii o ai lena tama? Ua fai mai Apineru, Ua e soifua, le tupu e, ou te le iloa lava.

⁵⁶Ona fai atu lea o le tupu, Ia e fesili, pe se atalii o ai lena taulealea?

⁵⁷O loo foi Tavita nai le fasiga o le Filisitia, ona ave lea o ia e Apineru, ua momoli ia te ia i luma o Saulo, o le ulu foi o le Filisitia ua i lona lima.

⁵⁸Ona fai mai lea o Saulo ia te ia, Le atalii ea oe o ai, sē? Ua fai atu Tavita, O a‘u le atalii o lau auauna o Iese le Peteleema.