Read Samoan Old Version Bible – O LE TUSI PAIA I. SAMUELU, 18 Bible Online

I. SAMUELU, 18 - Samoan Old Version Bible – O LE TUSI PAIA bible

I. SAMUELU, 18

¹Ua uma atu ana upu ia Saulo, ona pii mau lea o le loto o Ionatana i le loto o Tavita, ua alofa Ionatana ia te ia, pei ona alofa o ia ia te ia lava.

²Ua ave e Saulo ia te ia i lea aso, ua ia le mafai lava ina ia toe foi i le aiga o lona tamā.

³Ua osi e Ionatana le feagaiga ma Tavita, auā ua alofa ia te ia, pei ona alofa o ia ia te ia lava.

⁴Ua to ese foi e Ionatana lona ofu talaloa nai ia te ia, ua foai atu ai ia Tavita, ma lona ofu tino, atoa ma lana pelu, ma lana aufana, atoa ma lona fusi.

⁵Ua alu atu Tavita i mea uma ua auina ai o ia e Saulo, ua faautauta i lana amio; ua tofia foi o ia e Saulo e pule i ‘au; ua fiafia ia te ia le nuu uma, atoa ma auauna a Saulo.

⁶Ua o mai i latou ina ua foi mai Tavita nai le fasiga o le Filisitia, ona o atu ai lea o fafine mai aai uma o Isaraelu ua pepese, ma sisiva, e faafetaiai i le tupu o Saulo, ma topa, ma le olioli, ma ‘apa tagitagi.

⁷Ua lagi fetaliai fafine i a latou siva, ua fai ane, Ua fasia e Saulo aua toaafe, a o Tavita ana sefulu o afe.

⁸Ua ita tele ai Saulo, ua leaga ia te ia ia upu; ua fai ane, Ua latou tuu atu ia Tavita o sefulu o afe, a o a‘u ua tuu mai ia te au na o afe; ua toe lava ona ave ia te ia o le malo.

⁹Na afua mai i lea lava aso ona lamalama o Saulo ia Tavita.

¹⁰Ua oo i le taeao, ona osofia ai lea o Saulo e le agaga leaga mai le Atua, ua perofeta ane ai o ia i lona fale; a o Tavita, na ta e ia i le kitara i lona lima, pei ona fai i lea aso ma lea aso; sa i ai le tao i le lima o Saulo.

¹¹Ua velo le tao e Saulo, ua fai ane, Ou te fasi ia Tavita ia tuilua ma le pa o le fale; a ua ‘alo faalua Tavita i ona luma.

¹²Ua mata‘u Saulo ia Tavita, auā sa ia te ia Ieova, a ua te‘a ma Saulo.

¹³Ona auina atu ai lea o ia e Saulo ia alu ese ia te ia, ma na tofia o ia e fai ma alii o le toaafe; ua alu atu o ia ma toe sau i luma o le nuu.

¹⁴Sa faautauta foi Tavita i lana amio uma; sa ia te ia foi o Ieova.

¹⁵Ua vaai Saulo ua matuā faautauta o ia, ona fefe ai lea o ia ia te ia.

¹⁶A ua alolofa Isaraelu uma atoa ma Iuta ia Tavita, auā na alu atu o ia ma toe sau i o latou luma.

¹⁷Ua fai mai Saulo ia Tavita, Faauta, o lo‘u afafine matua, o Merapa, ou te avatu o ia ia te oe e fai mau avā, tau lava ina ia e fitafita mo a‘u, e tau ai i taua o Ieova; auā ua faapea Saulo, Aua ne‘i oo lo‘u lima ia te ia, a ia oo i ai lima o Filisitia.

¹⁸Ua fai atu Tavita ia Saulo, O ai ea a‘u nei? O le a foi lo‘u ola, ma le aiga o lo‘u tamā i Isaraelu, ina ia ou fai avā i le afafine o le tupu?

¹⁹Ua oo i ona po a avane ai Merapa le afafine o Saulo ia Tavita, a ua avatu o ia ia Atarielu le Meola e fai mana avā.

²⁰Ua manamea Mekala le afafine o Saulo ia Tavita; ua ta‘u atu ai ia Saulo, ua tatau lava lea mea ia te ia.

²¹Ua fai ane Saulo, Ou te avatu o ia ia te ia e fai ma mailei ia te ia, ia oo ai lima o Filisitia ia te ia. Ua fai mai Saulo ia Tavita, O le tasi o i laua tā te aiga ai i le asō.

²²Ua fai atu Saulo i ana auauna, latou te tautala lemu atu ia Tavita, o loo faapea, Faauta, a loo fiafia le tupu ia te oe, ua alolofa foi ana auauna uma ia te oe; o lenei, ia e fai avā i le afafine o le tupu.

²³Ua tautala atu auauna a Saulo i nei upu i taliga o Tavita; ona fai mai lea o Tavita, O se mea faatavaa ea i lo outou manatu ona fai avā i le afafine o le tupu, o a‘u foi o le tagata mativa ma le faatauvaa?

²⁴Ona ta‘u atu ai lea o auauna a Saulo ia te ia, ua faapea, O upu faapenei ua fai mai ai Tavita.

²⁵Ua fai mai Saulo, Ia faapea ona outou fai atu ia Tavita, E le manao le tupu i se faatau, na o muāpa‘u o Filisitia e selau, ina ia taui atu i fili o le tupu; a o le manatu o Saulo ia oti ai Tavita i lima o Filisitia.

²⁶Ua ta‘u mai ana auauna i nei upu ia Tavita; ona tatau lava lea o le upu ia Tavita, ia fai avā o ia i le afafine o le tupu. Ua le atoa foi ona aso;

²⁷ona tulai lea o Tavita, ua alu atu o ia atoa ma ona tagata; ua fasia tagata o Filisitia e lua selau, ua au mai e Tavita o latou muāpa‘u, ua faaatoa mai i le tupu ina ia fai avā o ia i le afafine o le tupu. Ona au mai lea e Saulo o lona afafine o Mekala ia te ia e fai mana avā.

²⁸Ua vaai Saulo, ma ua iloa, ua i ai Ieova ia Tavita; o Mekala foi le afafine o Saulo ua fiafia o ia ia te ia.

²⁹Ua atili ai ona toe fefe o Saulo ia Tavita; ua fai Tavita ma fili o Saulo i aso uma.

³⁰Na o atu alii o Filisitia; o aso uma na o atu ai i latou, ua sili le faautauta o Tavita i auauna uma a Saulo. Ua matuā viia lona igoa.