Read Samoan Old Version Bible – O LE TUSI PAIA I. SAMUELU, 2 Bible Online

I. SAMUELU, 2 - Samoan Old Version Bible – O LE TUSI PAIA bible

I. SAMUELU, 2

¹Ua tatalo foi Hana, ua faapea, Ua olioli lava lo‘u loto ia Ieova; ua faamaualugaina lo‘u nifo e Ieova; ua ou mautali ai i e ita mai, auā ou te fiafia i le olataga mai ia te oe.

²E leai sē paia e tusa ma Ieova; auā ua leai se tasi ua na o oe; e leai foi se papa e tusa ma lo tatou Atua.

³Soia tou te faatele a outou upu faamaualuga naua, e alu ae ai le faaonoono i o outou gutu; auā o Ieova, o le Atua sisila mai o ia, o ia foi le na te fuatia amio.

⁴Ua gauia aufana a tagata malolosi; a o e na tautevateva, ua fusi o latou sulugātiti i le malosi.

⁵O e sa maoona, ua fai ma auauna i latou ia maua ai mea e ‘ai; a o e sa fia aai, ua mapu i latou; o le na pa ua iu ina fanau mai se toafitu; a o ia ua toatele ana fanau, ua vaivai o ia.

⁶O Ieova na te fasioti, ma faaola; na te faaoo ifo i le tuugamau, ma faafoi ae.

⁷O Ieova na te faamativaina, ma faatamaoaigaina; o ia na te faamaulaloina, ma faamaualugaina;

⁸na te faatulaiina le tagatālautele nai le eleele, na te faaeaina foi le tagata mativa nai le faatăfuna, ia nofo faatasi ma alii, ia fai foi mo latou tofi le nofoālii mamalu; auā o loo ia Ieova faavae o le lalolagi, ua na faaee ai le atu laulau.

⁹E leoleo e ia vae o ona tagata paia, a e faalologo tagata agasala i le pouliuli; auā e le malo le tagata i le malosi.

¹⁰O e ua finau ia Ieova e faamomomoina i latou; e faapa mai e ia le faititili mai le lagi i o latou luga; e pule Ieova i tuluiga o le lalolagi; na te foai atu le malosi i lana tupu, e faamaualugaina foi e ia le nifo o le na ia faauuina.

¹¹Ua alu Elekana i Rama i lona fale, a e nofo le tama e auauna ia Ieova i luma o Eli le faitaulaga.

¹²A o atalii o Eli, o tagata ulavavale i laua, ua la le iloa Ieova.

¹³O le tu lenei a faitaulaga e fai i le nuu; a avatu e se tasi le taulaga, pe a tunu tufaaga, ona alu atu ai lea o le auauna a le faitaulaga ma le tui mata tolu i lona lima;

¹⁴ona tutu‘i atu lea i le tanoa, po o le pani, po le ulo, po o se tasi mea e tunu a‘i mea, o mea uma na avae i le tui ua ave e le faitaulaga mana; ua faapea lava ona fai e i laua ia Isaraelu uma na o ae i Sailo.

¹⁵Ua alu le auauna a le faitaulaga, a o lei susunuina e i latou le ga‘o, ma na fai atu i le tagata e ana le taulaga, Au mai ia se tufaaga e tunu mā le faitaulaga; auā na te le talia mai ia te oe se tufaaga ua vale, a o se tufaaga mata lava;

¹⁶i le, a fai mai le tagata ia te ia Seia latou luai susunu le ga‘o, ona ave ai lea mā oe le mea e te loto i ai; ona fai atu lea o ia ia te ia, E leai, a ia e au mai nei lava, a leai ou te faoa.

¹⁷O lea sa matuā tele ai le agasala a nei taulelea i luma o Ieova, auā na ‘ino‘ino ai tagata i taulaga ia Ieova.

¹⁸A o Samuelu, na auauna o ia i luma o Ieova; ua ofu le tama i le efota ie lino.

¹⁹Na faia e lona tinā se ofu itiiti mona, na avea ai ia te ia i lea tausaga ma lea tausaga, pe a la o ae ma lana tane e avatu ai le taulaga e fai i tausaga.

²⁰Ua faamanuia foi Eli ia Elekana ma lana avā, ma ua fai atu, Ia foai mai e Ieova ia te oe fanau i lenei fafine e sui a‘i lana na ia tuu mai ia Ieova. Ona la o ai lea i lona nuu.

²¹O lea na asiasi ai Ieova ia Hana, ua to ia, ona fanau mai lea; o ana tama tane e toatolu ma tama teine e toalua. Ua tupu le tama o Samuelu i luma o Ieova.

²²Sa matuā toeaina Eli, ua faalogo foi o ia i mea uma na faia e ona atalii ia Isaraelu uma, ma latou momoe ma fafine e na faapotopoto atu i le faitotoa o le fale fetafai o le faapotopotoga.

²³Ua fai atu ia ia te i laua, Se a le mea lua te fai ai nei mea? Auā ou te faalogo i le nuu nei uma lava i a oulua amio leaga;

²⁴o‘u atalii e, soia, auā e le se tala lelei ou te faalogo ai ia te oulua, ina ua oulua faasese i le nuu o Ieova;

²⁵afai e agasala se tasi tagata i le tasi tagata e faamasino le Atua ia te ia; a e afai e agasala se tagata ia Ieova, o ai ea sē fai ma puluvaga ia te ia? A ua la le faalogo i le upu a lo la tamā, auā ua finagalo Ieova e fasioti ia te i laua.

²⁶Ua tupu pea lava le tama o Samuelu, ma ua faapelepeleina e Ieova atoa foi ma tagata.

²⁷Ua alu atu se tasi tagata o le Atua ia Eli, ua fai atu ia te ia, Ua faapea ona fetalai mai o Ieova, Na ou le matuā faaali ea a‘u i le aiga o lou tamā ina o i ai i latou i Aikupito i le aiga o Farao?

²⁸Na ou le filifili ea ia te ia nai itu aiga uma o Isaraelu ia fai ma faitaulaga ia te au, ia alu ae i lo‘u fata faitaulaga, ia susunu i mea manogi, ia ofu i le efota i o‘u luma? Na ou le foai ea i le aiga o lou tamā taulaga uma lava a le fanauga a Isaraelu e fai i le afi?

²⁹Se a le mea e faaleaoga ai e outou le taulaga e fai ia te au ma mea e foai mai, na ou poloai e fai i lo‘u fale; ma ua e faasili i ou atalii ia te au, e faapuputa a‘i outou ia te outou i tufaaga sili i mea foai mai uma lava a Isaraelu lo‘u nuu?

³⁰O le mea lea ua fetalai mai ai Ieova le Atua o Isaraelu, Na ou fai atu lava i lou aiga ma le aiga o lou tamā, latou te feoai i o‘u luma e faavavau; a o lenei, ua fetalai mai Ieova, Ia mamao lea mea ia te au, a o e faasili ia te au, ou te faasili ia te i latou; a o e ‘ino‘ino mai ia te au, e ta‘u faatauvaaina i latou.

³¹Faauta, o le a oo mai aso ou te gagau ai lou lima ma lima o le aiga o lou tamā, ina ia le toe ai se toeaina i lou aiga.

³²E te iloa atu se fili i le malumalu i mea uma e faamanuia ai Isaraelu; o lea e leai se toeaina i lou aiga i aso uma lava.

³³O le tagata o lou aiga ou te le vavaeeseina i lo‘u fata faitaulaga, e faatauasoina ai ou mata, ma vaivai ai lou loto; a o le vao tagata uma o lou aiga e oti i latou o taulelea.

³⁴O lenei foi le faailoga ia te oe e oo ai i ou atalii e toalua o Hofeni ma Fineaso, e oti i laua i le aso e tasi.

³⁵Ou te faatuina mo a‘u se faitaulaga faamaoni, na te faia e tusa ma lo‘u loto ma la‘u manatu, ou te ati ae foi se fale tumau mona; e savali o ia i aso uma lava i luma o lē ua au faauuina.

³⁶O e ua totoe uma lava i lou aiga e taitasi ma sau ma faatoga ia te ia i si tupe ario, po o se potoi areto, e fai ane foi, Ou te aioi ia te oe, ia e tofi mai ia te au i sina faiva o faitaulaga, ina ia ou ‘ai ai sina mea e ‘ai.