Read Samoan Old Version Bible – O LE TUSI PAIA I. SAMUELU, 21 Bible Online

I. SAMUELU, 21 - Samoan Old Version Bible – O LE TUSI PAIA bible

I. SAMUELU, 21

¹Ua alu atu Tavita i Nove ia Aimeleka le faitaulaga; a ua fefe Aimeleka ina ua na iloa Tavita; ua fai mai ia te ia, O le a le mea ua e maliu taotasi mai ai oe, a e leai se tasi lua te toalua?

²Ona fai atu lea o Tavita ia Aimeleka le faitaulaga, Na fetalai mai le tupu ia te au i le feau, ua faapea mai, Aua ne‘i iloa se tasi le feau ou te auina atu ai oe, ma ou fai atu ai ia te oe; ua ou faatonu atu foi i auauna i le mea latou te o i ai.

³O lenei, pe se a se mea ua ia te oe? Au mai ia te au ni areto e lima, po o se mea ua e maua.

⁴Ua tali mai le faitaulaga ia Tavita, ua faapea mai, E leai se areto lē sa ia te au, ua na o le areto e sa; afai lava ua nofo ese taulelea ma a latou avā e mafai ai.

⁵Ua tali atu Tavita i le faitaulaga, ua faapea atu ia te ia, E moni, ua po tolu o nofo ese ai a matou avā ma i matou, talu lo‘u sau; ua paia foi mea a taulelea, ua peiseai ua le sa foi le areto, i le ma lea foi ua faapaiaina nisi areto i le aso nei i le ipu.

⁶Ona avatu lea e le faitaulaga ia te ia le areto sa; auā e lei i ai ni areto, na o areto e laulauina i luma, na aveesea nai luma o Ieova e tuuina ai areto vevela i le aso e ave ese ai.

⁷(Sa i ai i lea aso le tasi auauna a Saulo, na taofia o ia i luma o Ieova; o lona igoa o Toeka le sa Etomā, le pule i leoleo mamoe a Saulo.)

⁸Ua fai atu foi Tavita ia Aimeleka, E lei i ai ea ia te oe se tao po o se pelu? aua foi na ou le aumaia la‘u pelu ma a‘u auupega, auā o le feau a le tupu ua faataalise.

⁹Ona fai mai lea o le faitaulaga, O le pelu a Koliata le Filisitia, na e fasia i le vanu o le tapeneto, faauta, o loo taataaia i le ofu i tua ole efota; afai e te ave lea, ina ave ia, auā e leai se tasi na o lea. Ona fai atu lea o Tavita, E leai se tasi e tusa ma lena; au mai ia ia te au.

¹⁰Ua tulai Tavita, ua sola i lea aso nai ia Saulo; ua oo atu ia Akisa le tupu o Kata,

¹¹Ua fai atu auauna a Akisa ia te ia, E le o Tavita ea lenei, le tupu o le nuu? E le o lenei ea le tagata na latou lagi fetaliai ai i a latou siva, o loo faapea, Ua fasia e Saulo ana afe, a o Tavita ana sefulu o afe?

¹²Ua tuu e Tavita nei upu i lona loto, ua matuā fefe i luma o Akisa le tupu o Kata.

¹³Ua na liliu lana amio i o latou luma, ua faatagā valea i o latou lima; ua ia tusitusi i puipui o le faitotoa, ma faasisina lona feanuga i lana ‘ava.

¹⁴Ona fai mai ai lea o Akisa i ana auauna, Faauta, ua outou iloa le tagata, o loo valea; o le a ea le mea ua outou au mai ai o ia ia te au?

¹⁵Ou te oge vale ea a‘u, ua outou au mai ai lena tagata e faavalevalea i o‘u luma? E sau ea lena tagata i lo‘u fale?