Read Samoan Old Version Bible – O LE TUSI PAIA I. SAMUELU, 22 Bible Online

I. SAMUELU, 22 - Samoan Old Version Bible – O LE TUSI PAIA bible

I. SAMUELU, 22

¹Ua alu ese Tavita i lea mea, ua sola atu i le ana i Atulama; ua faalogo ai ona uso atoa ma le aiga uma o lona tamā, ona latou o ifo ai lea ia te ia i lea mea.

²Ua faapotopoto atu foi ia te ia tagata uma o e na tigaina, ma tagata uma e na aitalafu, ma tagata uma o e ua tiga le loto, sa fai o ia ma alii ia te i latou; sa ia te ia pe atoa se toafa galau o tagata.

³Ua alu atu Tavita nai lea mea i Mesepa o Moapi, ua fai atu i le tupu o Moapi, Se‘i o mai lo‘u tamā ma lo‘u tinā ia te outou, seia ou iloa pe faapefea se mea e faia e le Atua ia te au.

⁴Ua ia au mai ia te i laua i luma o le tupu o Moapi ua latou nonofo ma ia i aso uma na i ai Tavita i le ‘olo.

⁵Ua fai mai Kato le perofeta ia Tavita, Aua le nofo i le ‘olo; alu ia, ina e alu atu i le nuu o Iuta. Ona alu ai lea o Tavita, ua oo atu i le vao matua o Hareta.

⁶Ua faalogo Saulo, ua iloa Tavita ma tagata ua ia te ia; a o nofo Saulo i Kipea i lalo o le laau tele i Rama, ma lona tao i lona lima; o ana auauna uma foi na tutū i latou i ona luma.

⁷Ua fai mai Saulo i ana auauna na tutū i ona luma, Faalogo mai ia o outou sa Peniaminā e! E foai atu ea ia te outou taitasi uma e le atalii o Iese o fanua ma tovine? Na te tofia ea outou uma e fai ma alii o toaafe ma alii o toaselau,

⁸ina ua outou foua a‘u e outou uma lava, ma ua le faaali mai ia te au le feagaiga a lo‘u atalii ma le atalii o Iese? Ua le alolofa foi outou ia te au, ma faaali mai ia te au ina ua faaoso e lo‘u atalii i la‘u auauna e tanu ‘au ia te au pei ona fai i lenei aso.

⁹Ona tali atu lea o Toeka le sa Etomā, (o ia foi na tofia e pule i auauna a Saulo,) ua fai atu, Na ou iloa le atalii o Iese, ua alu atu i Nove ia Aimeleka le atalii o Akitopo;

¹⁰na ia fesili ia Ieova mo ia, ma na avatu ia te ia mea e ‘ai, ua avatu foi ia te ia le pelu a Koliata le Filisitia.

¹¹Ona auina atu lea nisi e le tupu e aami ia Aimeleka le atalii o Akitopo le faitaulaga, atoa ma le aiga uma o lona tamā, o faitaulaga i latou i Nove; ona latou o uma mai lea i le tupu.

¹²Ua fai mai Saulo, Faalogo mai ia le atalii o Akitopo e. Ua fai atu o ia, Le alii e, o a‘u lava lenei.

¹³Ona fai mai lea o Saulo ia te ia, O le a ea le mea ua oulua foua ai a‘u, o oe atoa ma le atalii o Iese? Ina ua e avatu ia te ia mea e ‘ai ma le pelu, ma e fesili atu i le Atua mo ia, e tu mai ai o ia ia te au e tanu ‘au, pei ona fai i lenei aso?

¹⁴Ona tali atu lea o Aimeleka i le tupu, ua faapea atu, O ai ea se tasi o au auauna uma e tusa ma Tavita ona faamaoni? O loo nofo foi le afafine o le tupu ia te ia, ma ua alu i lau feau, o loo ta‘uleleia foi i lou aiga.

¹⁵Na ou amata ea i lea aso ona fesili i le Atua mo ia? E mamao lava ia te au; aua ne‘i tuu mai e le tupu le mea nei i lana auauna ma le aiga uma o lo‘u tamā, auā na le iloa e lau auauna se mea itiiti, po o se mea tele o nei mea uma.

¹⁶Ua fai mai le tupu, E te oti lava Aimeleka, o oe atoa ma le aiga uma o lou tamā.

¹⁷Ona fai mai lea o le tupu i le ‘au e faafeao na tutū i ona luma, Ina liliu atu ia, ma fasioti i faitaulaga a Ieova, auā ua ‘au i latou ma Tavita; auā foi na latou iloa ua sola o ia, a e lei ta‘u mai ia te au. A ua le mafafai auauna a le tupu ona faaoo o latou lima e fasi ai i faitaulaga a Ieova.

¹⁸Ona fai mai lea o le tupu ia Toeka, Ina liliu atu ia oe, ma e fasi i faitaulaga. Ona liliu atu ai lea o Toeka le sa Etomā, ma na fasi i faitaulaga; na ia fasioti ai i lea aso o tagata e toavalugafulu ma le toalima o e na oofu i efota o ie lino.

¹⁹O Nove foi le aai o faitaulaga na ia fasi ai i le pelu; o tane atoa ma fafine, o tama iti atoa ma tama meamea, o povi, ma asini, atoa ma mamoe ua ia fasi i le pelu.

²⁰A ua sao le tasi atalii o Aimeleka le atalii o Akitopo, o Aviata lona igoa, ua sola atu ia Tavita.

²¹Ua ta‘u mai e Aviata ia Tavita, Ua fasia e Saulo o faitaulaga a Ieova.

²²Ona fai atu lea o Tavita ia Aviata, Na ou iloa i lea aso ina ua i ai o Toeka le sa Etomā, na te ta‘ua lava ia Saulo; talu a‘u ua oo ai le oti i le aiga uma o lou tamā.

²³Ina ta nonofo ia ma a‘u, aua e te fefe; aua o lē saili ina ia ou oti, o loo saili foi o ia ina ia ē oti, a e saogalemu oe ina ua ta faatasi ma a‘u.