Read Samoan Old Version Bible – O LE TUSI PAIA I. SAMUELU, 24 Bible Online

I. SAMUELU, 24 - Samoan Old Version Bible – O LE TUSI PAIA bible

I. SAMUELU, 24

¹Ua foi mai Saulo ina ua tulia Filisitia, ona ta‘u atu ai lea ia te ia, ua faapea atu, Faauta ia Tavita, o loo i le vao o Enokati.

²Ona ave lea e Saulo tagata e tolu afe ua filifilia nai Isaraelu uma, ua alu atu e saili ia Tavita ma ona tagata i papa o ‘oti o le vao.

³Ua oo atu i lotoā o mamoe i le ala, ua i ai le ana, ona ulu atu ai lea o Saulo e ufiufi i ona vae, a o loo nonofo Tavita ma ona tagata i le muliana.

⁴Ona fai mai lea o tagata o Tavita ia te ia, Faauta, o le aso lenei na fetalai ai Ieova ia te oe, Faauta, ou te tuu atu le ua ita ia te oe i lou lima, e te faia ia te ia pei ona e loto i ai. Ona tulai lea o Tavita, ua ia sesele ese lemu le pito ofu o Saulo.

⁵E mulimuli ane ua tuia le loto o Tavita ia te ia, ina ua ia sesele ese le pito ofu o Saulo.

⁶Ua fai atu foi o ia i ona tagata, Ia faamamao e Ieova ia te au ona ou faia lena mea i lo‘u alii, le ua faauuina e Ieova, e faaoo ai lo‘u lima ia te ia, auā o ia ua faauuina e Ieova.

⁷Ua taofi e Tavita i ona tagata i nei upu; ma na le tuu atu i latou e laga atu ia Saulo; ua tulai atu Saulo i le ana, ua alu atu i lona ala.

⁸E mulimuli ane ona tulai lea o Tavita, ua alu atu nai le ana, ua valaau atu ia Saulo, o loo faapea, Lo‘u alii e, le tupu. Ua tepa mai Saulo i ona tua, ona punou lea o Tavita i lalo i le eleele, ma ifo atu i ai.

⁹Ona fai atu lea o Tavita ia Saulo, O le a le mea ua e faafofoga ai i upu a tagata, ua faapea, Faauta ia Tavita, o loo saili e agaleaga ia te oe.

¹⁰Faauta, o le aso nei ua e silafia e ou lava fofoga, na tuuina mai oe e Ieova i le aso nei i lo‘u lima i le ana, na fai mai foi le tasi ou te fasioti ia te oe; a ua ou alofa ia te oe, ma a‘u fai atu, ou te le faaoo lo‘u lima i lo‘u alii, auā o le faauuina a Ieova o ia.

¹¹Lo‘u tamā e, ia e silasila mai foi i lou pito ofu i lo‘u lima, auā o lo‘u sesele ese i lou pito ofu, a ua ou le fasi ia te oe, ia e iloa ai, ma e silafia, ua leai se leaga, po o se fouvale ia te au, ma a‘u le agaleaga ia te oe; a o oe, o loo e lamalama ia ou oti ia te oe.

¹²Ia faamasino e Ieova ia te i taua nei ma oe, ma ia taui atu Ieova ia te oe ona o a‘u; a o lo‘u lima, e le oo lea ia te oe.

¹³Pei ona fai mai le upu o le muāgagana mai anamua, E tupu mai le amioleaga i e amioleaga; a e le oo lo‘u lima ia te oe.

¹⁴Ua maliu mai le tupu o Isaraelu e mulimuli mai ia te ai? E te tulituliloa mai ia te ai? E mulimuli mai i le ulī mate; e mulimuli mai i le ‘utu fiti.

¹⁵Ia fai ma faamasino Ieova, ma ia faamasino ia te i taua ma oe, ma ia silasila mai, ma faatonu mai a‘u mea, ma ia laveai mai ia te au ai lou lima.

¹⁶Ua faauma e Tavita ona tautala i nei upu ia Saulo, ona fai mai lea o Saulo, O lou leo ea lea, lo‘u atalii e Tavita? Ona tagi ai lea o Saulo ua leo tele.

¹⁷Ua fai mai foi o ia ia Tavita, Ua sili lau amiotonu i la‘u, auā ua e taui mai ia te au i le lelei; a o a‘u, ua ou taui atu ia te oe i le leaga.

¹⁸Ua e faaali mai i le asō i le lelei ua e faia mai ia te au; auā na tuuina a‘u e Ieova i lou lima, a ua e le fasi ia te au;

¹⁹afai e maua le tagata e lona fili, e tuu atu ea ia te ia e alu ma le lelei? Ia taui atu e Ieova le lelei ia te oe, ona o le mea ua e faia ia te au i lenei aso.

²⁰O lenei, faauta, ua ou iloa e fai lava oe ma tupu; e faatumauina le malo o Isaraelu ia te oe.

²¹O lenei, ia e tauto mai ia te au ia Ieova, e te le faauma la‘u fanau pe a mavae atu a‘u, ma e le tinei lo‘u igoa i le aiga o lo‘u tamā.

²²Ua tauto Tavita ia Saulo, ona alu ai lea o Saulo i lona fale; ua o ae foi Tavita ma ona tagata i le ‘olo mauga.