Read Samoan Old Version Bible – O LE TUSI PAIA I. SAMUELU, 30 Bible Online

I. SAMUELU, 30 - Samoan Old Version Bible – O LE TUSI PAIA bible

I. SAMUELU, 30

¹Ua oo Tavita ma ona tagata i Sekeleka i le aso tolu, a ua uma le osofia le itu i toga ma Sekeleka e Amaleka; ua fasia foi Sekeleka, ma ua faamuina i le afi.

²Ua tāfea foi fafine sa i ai, o e iti atoa ma e matutua; e lei fasiotia se tasi, a ua avea i latou, ma ua latou o.

³Ua oo atu Tavita ma ona tagata i le aai, faauta, ua mu i le afi, a o a latou avā, ma o latou atalii, ma o latou afafine ua tāfea i latou.

⁴Ona fetagisi ai lea o Tavita ma le nuu sa ia te ia, ua leo tetele, ua oo ina le toe lavā ona tagi.

⁵Ua tāfea foi avā a Tavita e toalua, o Ainoama le Isereelu, ma Apikaila le avā a Napalu le Karamelu.

⁶Ua atuatuvale tele lava Tavita, auā na tautala le nuu e fetogi ia te ia i maa, ina ua tiga loto o le nuu uma taitasi i ona atalii ma ona afafine; a ua faamalosi Tavita lona loto ia Ieova lona Atua.

⁷Ua fai atu Tavita ia Aviata le faitaulaga, le atalii o Aimeleka, Ina au mai ia ia te au le efota; ona avatu ai lea e Aviata o le efota ia Tavita.

⁸Ona fesili lea o Tavita ia Ieova, ua faapea atu, Ou te tuliloa ea i lena ‘au? Ou te maua atu ea ia te i latou? Ona fetalai mai lea o ia ia te ia, Tuliloa ia, auā e te maua atu ai lava, ma e maua mai lava mea uma.

⁹Ua alu atu Tavita, o ia ma tagata e toaono galau sa ia te ia, ua oo i le alia o Pesora, ua nonofo ai e na nonofo.

¹⁰Ua tulituliloa e Tavita ma tagata e toafa galau, a ua nonofo le toalua selau na le lavā e o atu i le la itu o le alia o Pesora.

¹¹Ona latou maua lea le tagata Aikupito i le vao, ua avatu o ia ia Tavita; ua latou avane ia te ia se areto ua ‘ai ai, ma latou faainu ia te ia i le vai.

¹²Ua latou avatu foi ia te ia se fasi potopotogāmati mamago ma fuifui vine mamago e lua, ua ‘ai o ia, ona toe foi mai lea o lona malosi ia te ia; auā e tolu ao e tolu foi po ua ia le ‘ai ni areto, ua le inu foi se vai.

¹³Ona fai atu lea o Tavita ia te ia, O ai ea oe? Mai fea foi oe? Ona fai mai lea o le taulealea, O a‘u le Aikupito, le auauna a le tagata Amaleka; na tuulafoai mai lo‘u alii ia te au, auā na maua a‘u i le ma‘i anapo luā.

¹⁴Na matou osofia le itu i toga o tagata Kereti, ma le laueleele o Iuta, ma le itu i toga o Kalepo; na matou faamu foi Sekeleka i le afi.

¹⁵Ona fai atu lea o Tavita ia te ia, E te ta‘ita‘i ifo ea ia te au i lena ‘au? Ona fai mai lea o ia, Ina tauto ia i le Atua ia te au, e te le fasioti ia te au, e te le tuuina atu foi a‘u i le lima o lo‘u alii, ona ou ta‘ita‘i ifo lea ia te oe i lena ‘au.

¹⁶Ua ia ta‘ita‘i ifo ia te ia, faauta, o loo salalau i latou i le fogāeleele uma, o loo ai, ma feinu, ma sisiva, ona o le vete e tele ua latou aumaia mai le nuu o Filisitia, ma le nuu o Iuta.

¹⁷Ona fāsia lea o i latou e Tavita e afua i le segisegi o le taeao ua oo i le afiafi o le tasi aso; ua le sao so latou e toatasi, na o taulelea e toafa galau se tietie i kamela, ma latou sosola.

¹⁸Ona maua lea e Tavita mea uma na ave e Amaleka, ma ana avā e toalua ua maua e Tavita.

¹⁹Ua leai sa latou mea ua le iloa, o se mea itiiti po o se mea tele, o atalii ma afafine, o vete ma mea uma na ave e i latou, ua toe au mai uma e Tavita.

²⁰Ua ave e Tavita mamoe uma ma povi, ua latou tutuli atu i luma o le tasi lafu, ma ua latou fai ane, O vete nei a Tavita.

²¹Ua oo atu Tavita i tagata e lua selau se le lavā ona mulimuli atu ia Tavita, sa nonofo i le alia o Pesora; na o mai i latou e faafetaiai ia Tavita, e faafetaiai foi i le nuu sa ia te ia; ua faalatalata atu Tavita i le nuu, ona alofa atu lea o ia ia te i latou.

²²Ona fai atu ai lea tagata agaleaga uma ma e ulavavale o le nuu na o ma Tavita, ua faapea, Ona ua le ō i latou ma i tatou, o le mea lea tatou te le avatu ai ia te i latou ni vete na matou fao mai, na ona taitasi ma ta‘ita‘i atu lana avā ma ana fanau, ma ia latou ō.

²³A ua fai atu Tavita, O‘u uso e, aua le faapea ona fai i mea ua foai mai e Ieova ia te i tatou; ma na leoleo ia te i tatou, ma tuuina mai i o tatou lima le ‘au na o mai ia te i tatou.

²⁴O ai foi se faalogo ia te outou i lenei mea? Auā e tusa le vaegāoa o le na alu ifo i le taua, ma le vaegāoa o lē na faamuli i oa, e faagatasi lava o latou vaegāoa.

²⁵Na afua mai i lea aso, ua faatuina lenei mea e fai ma tulafono ma masani ia Isaraelu, ua oo i le aso nei.

²⁶Ua oo atu Tavita i Sekeleka, ona avatu ai lea e ia o mea o le vete i toeaina o Iuta o ana uo, ua faapea atu, Faauta, o le mea alofa ia te outou ai le vete na maua i fili o Ieova;

²⁷mo e i Peteli, mo e i Ramota i le itu i toga, mo e i Iatira,

²⁸mo e i Aroeru, mo e i Sefemo, mo e i Esetemoa,

²⁹mo e i Rakala, mo e i aai o sa Ieramaelū, mo e i aai o sa Kenī,

³⁰mo e i Horema, mo e i Koroasa,

³¹mo e i Ataka, mo e i Heperona, ma mea uma sa fealuai ai Tavita, o ia ma ona tagata.