Read Samoan Old Version Bible – O LE TUSI PAIA I. SAMUELU, 6 Bible Online

I. SAMUELU, 6 - Samoan Old Version Bible – O LE TUSI PAIA bible

I. SAMUELU, 6

¹Sa i ai le atolaau a Ieova i le nuu o Filisitia i masina e fitu.

²Ona aami ai lea e Filisitia o faitaulaga ma taulāitu, ua faapea atu, Se a se mea matou te faia i le atolaau a Ieova? Ina ta‘u mai ia, pe faapefea ona matou momoli atu ai i lona nuu?

³Ona latou fai mai lea, Afai tou te momoli atu le atolaau a le Atua o Isaraelu, aua le molifuaina ia te ia, a ia matuā avatu ia te ia se togiola, ona faamaloloina ai lea outou, e iloa foi e outou po o le a le mea ua le te‘a ese ai lona aao ia te outou.

⁴Ua fai atu i latou, O le a le togiola matou te avatu ai ia te ia? Ona fai mai lea o i latou, O silailalo auro e lima, ma imao auro e lima, ia tusa ma le faitau o alii Filisitia; auā sa tasi le mala ia te outou uma ma o outou alii.

⁵Ia fai foi faatusa o outou silailalo, ma faatusa o outou imoa ua leaga ai lo outou eleele, ma ia avatu le viiga i le Atua o Isaraelu; atonu e faamāmā ai e ia lona aao ai o outou luga, ma luga o outou atua, ma luga o lo outou laueleele.

⁶Se a foi le mea tou te faamaaa ai o outou loto, pei o Aikupito ma Farao ona faamaaa o latou loto? Na latou le tuuina atu ea i latou e o, ina ua uma ona faia e ia o mea mamana ia te i latou, ona latou o ai lava lea?

⁷O lenei, ina fau ia se fata faataavalevale fou, ma avane i ai ni povi fananau se lua, e lei faaee i ai se amo; ia nonoa povi i le fata faataavalevale, ma ia faafoi mai i le fale a la fanau nai ia te i laua.

⁸Ona outou ave ai lea o le atolaau a Ieova, ma faaee atu ai i le fata faataavalevale, atoa ma mea ua fai i auro, o le a outou avatu ia te ia e fai ma togiola, ia fafao i se ato i lona itu, ma tuuina atu ai e alu.

⁹A ia outou vaavaai, pe afai e alu ae i le ala o lona nuu o Petesemesa, o ia lava ua faaoo lenei malaia tele ia te i tatou; a e afai e leai, ona tatou iloa lea e lei pāia tatou i lona aao; o le mea ua tupu fua mai lava ia te i tatou.

¹⁰Ua faapea lava ona fai e le nuu, ua avane povi fananau e lua, ua latou nonoa ai i le fata faataavalevale, a e pupuni a la fanau i le fale.

¹¹Ona latou faaee lea o le atolaau a Ieova i le fata faataavalevale, atoa foi ma le ato, ma imoa auro, ma faatusa o silailalo.

¹²Ua o ae povi i le ala e ui ai i Petesemesa, ua savali loa i le ala tele, o loo tagi fano, a e lei afe i le itu taumatau po o le itu tauagavale; ua mulimuli atu ia i laua alii o Filisitia, ua oo i le tuaoi o Petesemesa.

¹³O loo fai e Petesemesa le seleselegāsaito i le vanu; ua tetepa ae i latou, ona iloa ai lea o le atolaau, ua latou fiafia ina ua iloa.

¹⁴Ua oo le fata faataavalevale i le fanua o Iosua le Petesemesa, ua tu ai. Sa i ai le maa tele; ua latou taisi laau o le fata faataavalevale, ma saunia le taulaga mu ia Ieova i povi.

¹⁵Ona ave ifo lea e sa Levī le atolaau a Ieova ma le ato sa i ai, ua i ai mea na fai i auro, ua latou faaee ai i luga o le maa tele. Ua sauni e tagata o Petesemesa i lea aso o taulaga mu, ma latou osi taulaga ia Ieova.

¹⁶Ua iloa e alii Filisitia e toalima, ona foi ai lea o i latou i Ekerona i lea lava aso.

¹⁷O silailalo auro nei na avatu e Filisitia e fai ma togiola ia Ieova, mo Asetota le tasi, mo Kasa le tasi, mo Asekelona le tasi, mo Kata le tasi, mo Ekerona le tasi;

¹⁸o imoa auro foi e tusa ma le faitua o aai uma o Filisitia, o aai o alii e toalima, o aai i loto ‘olo, atoa lava ma faoa aai, e oo i le maa tele sa faaee i ai le atolaau a Ieova; ua oo i lenei aso o loo i ai lea maa i le fanua o Iosua le Petesemesa.

¹⁹Ua ia fasia tagata o Petesemesa, auā na latou maimoa i totonu o le atolaau a Ieova; na ia fasia i lea nuu o le toafitugafulu o tagata, o tagata o limagafulu o afe. Ua faanoanoa le nuu ona ua fāsia le nuu e Ieova i le fasi tele.

²⁰Ua fai ane tagata o Petesemesa, O ai se na te mafaia ona tu i luma o lenei Atua paia, o Ieova? E avae ea ia te ai le atolaau ai ia te i tatou?

²¹Ua latou auina atu le sāvali i e ua nonofo i Kiriata-iarima, ua faapea atu, Ua faafoi mai e Filisitia le atolaau a Ieova, ina maliu mai ia e avatu ai ia te outou.