Read Samoan Old Version Bible – O LE TUSI PAIA I. SAMUELU, 9 Bible Online

I. SAMUELU, 9 - Samoan Old Version Bible – O LE TUSI PAIA bible

I. SAMUELU, 9

¹O le tasi tagata Peniamina, o lona igoa o Kiso le atalii o Avielu, o le atalii o Seroro, o le atalii ia o Pekuro, o le atalii ia o Afia, o le atalii o le tasi tagata o Iemina; o le tagata mauoa tele.

²Sa ia te ia le atalii e igoa ia Saulo, o le taulealea aulelei, e leai se tagata o le fanauga a Isaraelu e sili ona aulelei ia te ia; e gata ifo i ona tau‘au le maualuga o le nuu uma.

³Ua le iloa asini a Kiso le tamā o Saulo; ona fai mai lea o Kiso i lona atalii o Saulo, Ina o ia oulua ma se tasi taulealea, tulai ia, ma alu e saili asini.

⁴Ona ui atu lea o i laua i le mauga o Efaraima, ua ui atu foi i le nuu o Salisa, a e lei maua; ona la ui atu lea i le nuu o Saali, ua leai lava; ua ui atu i le nuu o Iemina, ua la le maua lava.

⁵Ua oo i laua i le nuu o Sufi, ona fai atu lea o Saulo i lana auauna na la o ma ia, Sau ia, ina ta foi atu, ina ne‘i tuu e lo‘u tamā lona manatu i asini, a e atuatuvale ona o i taua.

⁶A ua fai mai o ia ia te ia, Faauta mai ea, o loo i le aai nei le tagata o le Atua, o le tagata e ta‘uleleia, e matuā taunuu lava ana upu uma; ina ta o ia i ai, atonu na te ta‘u mai ia te i taua so ta ala ta te ui atu ai.

⁷Ua fai atu Saulo i lana auauna, Faauta, a ta o i ai, se a sa ta mea e avatu i le alii? Auā ua uma areto nai la ta ato; e leai se mea alofa e avatu ai i le tagata o le Atua; se a ea se mea ua ia te i taua?

⁸Ua toe tali mai le auauna ia Saulo, ua faapea mai, Faauta, ua i lo‘u lima lona vaefa o le sekeli ario ou te avatu ai i le tagata o le Atua, ina ia ta‘u mai ai ia te i taua lo ta ala.

⁹Sa faapea i Isaraelu anamua le upu a le tagata e alu e fesili i le Atua, O mai ia, ina tatou o i le tagata vaai, auā o le perofeta i nei ona po, sa ta‘ua o ia anamua o le tagata vaai.

¹⁰Ua fai atu Saulo i lana auauna, Ua lelei lau upu; sau ia, ina ta o. Ona la o lea i le aai o i ai le tagata o le Atua.

¹¹Ua o ae i laua i le aega o le aai, ona latou fetaiai lea ma teine, o loo o i latou e utu vai; ua la fai atu ia te i latou, O i ai ea le tagata vaai i le mea nei?

¹²Ona latou tali mai lea ia te i laua, ua faapea mai, O loo i ai lava, faauta, o loo i ou luma; o lenei, ia vave ia, auā na sau o ia i le aso nei i le aai, auā o le taulaga a le nuu e fai i le asō i le mea maualuga.

¹³A oulua oo i le aai, ona oulua maua loa lea o ia, a o lei alu ae i le mea maualuga e ‘ai ai; auā e le aai le nuu seia alu atu o ia, auā o ia na te fai le faafetai i le taulaga, a uma lea, ona aai lea o e ua togia; o ae ia, auā lua te maua atu ia te ia i le asō.

¹⁴Ona o ae lea o i laua i le aai; o loo o atu i totonu o le aai, faauta foi, o loo sau Samuelu ua fetaiai o ia ma i laua i lona alu ae i le mea maualuga.

¹⁵Na ta‘u atu e Ieova i taliga o Samuelu i le aso na tuaoi ma le na alu atu ai Saulo, ua faapea,

¹⁶E faapenei le itu aso taeao ou te auina atu ai ia te oe le tagata mai le nuu o Peniamina, e te faauu ia te ia e fai mai alii o lo‘u nuu o Isaraelu; na te faaola foi i lo‘u nuu nai lima o Filisitia; auā ua ou vaai atu i lo‘u nuu, ina ua oo mai ia te au lo latou alalaga.

¹⁷Ua iloa mai Saulo e Samuelu, ona ta‘u atu lea e Ieova ia te ia, Faauta, o le tagata lena na ou fai atu ai ia te oe, e pule o ia i lo‘u nuu.

¹⁸Ua soso atu Saulo ia Samuelu i totonu o le faitotoa, ua fai atu ai, Se‘i e faasino mai ia te au, po o fea le fale o le tagata vaai.

¹⁹Ua tali mai Samuelu ia Saulo, ua faapea mai, O a‘u nei le tagata vaai; muamua ae ia i o‘u luma i le mea maualaga, tatou te aai ma oulua i le aso nei; a taeao, ou te tuuina atu ai ia te oe e te alu, ma ou ta‘u atu ia te oe mea uma ua i lou loto;

²⁰a o au asini na le iloa, o le po tolu lenei, aua e te manatu i ai, auā ua maua; o loo ua ia te ai ea le manao uma o Isaraelu? E le ua ia te oe ea ma le aiga uma o lou tama?

²¹Ona tali atu ai lea o Saulo, ua faapea, E le o a‘u ea le sa Peniaminā, o le itu aiga aupito itiiti i Isaraelu, o lo‘u aiga foi ua topito ona faatauvaa i aiga uma o le itu aiga o Peniamina? O le a le mea e te fetalai mai ai upu faapena ia te au?

²²Ua ave o Samuelu ia Saulo ma lana auauna, ua latou o ma ia i le mea e aai ai, ua ia tuu atu ia te i laua le mea e sili e nonofo ai e na togia, o i latou ia pe atoa le toatolugafulu o tagata.

²³Ona fai atu lea o Samuelu i le fai umu, Au mai ia le tufaaga na ou tuu atu ia te oe, na ou fai atu ai foi, ia teu ai lava e oe.

²⁴Ona avae lea e le fai umu le alagālima ma mea ua i ai, ua laulau atu ai i luma o Saulo. Ua fai mai Samuelu, Faauta i le mea ua toe, ina tuu ia i ou luma, ma e taumafa ai; auā ua teua ma oe talu ina ou fai atu, ua ou togia le nuu. Ua la aai faatasi o Saulo ma Samuelu i lea aso.

²⁵Ua latou o ifo i le aai ai le mea maualuga; ona la tautala lea o ia ma Saulo i luga o le fale

²⁶Ua latou ala i le vave ao, ona oo lea i le malama ae o le taeao, ua valaau Samuelu ia Saulo e alu i luga o le fale, ua faapea mai, Tulai ia, ou te tuu atu ia te oe e alu. Ua tulai Saulo, ona la o lea i fafo, o ia ma Samuelu.

²⁷Ua la o ifo i le pito aai, ona fai mai lea o Samuelu ia Saulo, Fai atu i le auauna ia muamua atu ia i o ta luma, (ona alu ai lea o ia). A o oe, se‘i e tu mai nei, seia ou logologo atu ia te oe le afioga a le Atua.