Read San Blas Kuna 1 Reyes 17 Bible Online

1 Reyes 17 - San Blas Kuna bible

1 Reyes 17

¹Elías, Tisbe-neggweburginedid. Tisbe-neggwebur, Galaad-yargi siid. Elías Rey-Acabʼga weyob sognaded: “Israel-e-Bab-Dummad-Jehová dula-maid. Andi e-maiga gudiidgine, innikigwadgi an bega soged: Birgamar-danikidgi bar dii wiosulid, degine, bar boo batosurbalid. An-sogoedse, geb dii widapoed.”

²Agine, Bab-Jehová-gayaburba Elíasʼse nonikid, ega sognonikid:

³“Wegi be nao. Dad-nakwedsik be nao, Jordán-diwar-obakar, Querit-dianse be dukunao.

⁴Dian-maid be gobdii guo. Sikwisichimar bega mas-ukega an imakoed.”

⁵Degisoggu, Elías Bab-Jehová-ega-sogsadba Jordán-diwar-maidse naded, Querit-dianse megidapid.

⁶Bane-bane, wakudarbali, degi, sedogidbali, sikwisichidmar Elíasʼga madu, degi, san senonidaed. Elías dian-maid gobdabalid. Ome-Sareptaʼgined Elías-akwisad

⁷Ibagan-nasgu, dian-maid dinguded, ade, bar dii wissulid.

⁸Agine, Elíasʼse Bab-Jehová-gayaburba nonikid, ega weyob sognonikid:

⁹“Sidón-yar-naidse Sarepta-neggweburse be nao. Agi, be gudii guo. Be-gudiidgine, ome-e-ibe-sui-burgwisad masgi be-ogundii guoed. Ar ade, an deyob ega igar uksad.”

¹⁰Degisoggu, Elías Sarepta-neggweburse nade gusad. A-neggwebur-e-yawagak-noedse modapgua, Elías ome-e-ibe-sui-burgwisad sapan-aminai dakdapid. A-omese goted, ega sogded: —Wis be anga gobega dii sedage.

¹¹A-ome dii-aminadgu, Elías ega sogdebalid: —Wis be anga madu sedabalo.

¹²Ome, Elíasʼga sogdemogad: —Bab-Jehová-Dula-Maid-nuggi an bega soged, an-madu bergusad. Unnila madubur napi-iche bormogi siid. Aginbali, olivo-gwallu napi-iche butegi siibalid. Degisoggu, an mas-imakega sapan-aminaid, adi, an-machi-anbo napi mas-gunnega. An-machi-anbogwa burgwed-idu napi mas-gunsii gumaloed.

¹³Elías, omega sogdemogad: —Mer be bukib-binsae, be-negse be nae. Ibu be imaksokali, a be imakdapo. Angad-inse napi-madubur-siidgi be madu imako. Geb anga be sedago. A-sorba, na bemargad madu be imakmogo.

¹⁴Ar ade, weyob Israel-e-Bab-Dummad-Jehová soged: ‘Bormogi-madubur-siid berguosulid, olivo-gwallu-siibalid berguosurbalid, ani an, Bab-Jehová, dii-owiedse geb we-ibmarmar obelogoed.’

¹⁵Geb ome nade gusad, Elías-sogsadba imaksad. Degisoggu, Elías, degi, ome e-machi-ebo bane-bane mas-gundii gusmalad.

¹⁶Degisoggu, Bab-Jehová, Elíasʼga-sogsagusadba gunonikid. Madubur-bormogi-siid surgussulid, olivo-e-gwallu-butegi-siid bergussurbalid.

¹⁷A-sorba, a-ome-sui-e-ibe-burgwisad-e-machi uellenonikid. Egi-bonigan-obinedba burgwenonikid.

¹⁸Agine, ome-sui-e-ibe-burgwisad Elíasʼga sogded: —¿Bab-Dummad-dule, ibiga angi be yolenai? Gannar isguedgi an-obinsaega be nonikid, an-machi-oburgwega be nonibalid.

¹⁹Elías omega sogded: —Be-machi be anga uda. Elías, ome-nukugi-mimmi-burgwarmaid susad. Geb niba e-maidse sesad. Agine, e-gabedgi Elías mimmi-mesisad.

²⁰Geb Elías Bab-Jehováʼse goted, weyob sogded: “Bab-Dummad-Jehováʼye, ibiga we-ome-an-akwedga be nunmaked-uknai. Emide, be ei e-mimmi-oburgwisad.”

²¹Geb Elías ilapaa mimmi-birgi megisadgi, sogdebalid: “An-Bab-Dummad-Jehováʼye, wilesagwadgi an bese egise, gannar be we-mimmi-odulogega be imake.”

²²Bab-Jehová, Elías-ese-gochad itosad. Agine, ega gannar mimmi-odulosad.

²³Geb Elías gannar mimmi-sesad, Elías, mimmi gabedgi-maid odesad. E-nanga uknonikid, ega sogded: —¡An bega mimmi sedani, bei durgusa!

²⁴Geb ome Elías-abin sogdebalid: —Emisgindi, an wisi, be Bab-Dummad-duled. Be-ibmar-sogedi, Bab-Jehová-gayaburba be soged.