Read San Blas Kuna 1 Reyes 18 Bible Online

1 Reyes 18 - San Blas Kuna bible

1 Reyes 18

¹Undar birgapaagus dii-wisulid-ibagan-nasadgine, Bab-Jehová-gayaburba Elíasʼse nonikid, weyob sognonikid: “Acabʼse be nao, ega be sogo, we-yargi an dii owisokarye.”

²Degisoggu, Elías, Acabʼse nade gusad. Deunni, Samaria-neggweburgine ukud-dummad naid.

³Agine, Acab ega-ibmar-akwed-Abdíasʼse gochad. Abdíasʼde, Bab-Jehová dobekwaa-nanadiid-duled.

⁴Jezabel, Bab-Jehová-gayaburba-barsogmalad-oburgwenaigu, Abdías, Bab-Jehová-gayaburba-barsogmalad-e-dulatar (100) akwasaila-olloledyaba odukusad. Dulabo-gakambe (50) akwasaila-olloled-gwensakgi odukusad. Akwasaila-olloled-baidgine, dulabo-gakambe (50) odukusbalid. Ega mas-ukdii gusad, gobed-ukdii gusbalid.

⁵Acab, Abdíasʼga igar uksad: “Bela yar-naid be ebirnao, diwarmar-mamaidba, dianmar-mamaidba, be bipirmaknao. Abakar molimar-omaega, degi, moli-uaya-senigan-omaega gagan-nuegan daklealile, adi, melle anmar-ibe ibdurgan burgwega.”

⁶Geb Acab, Abdíasʼbogwa bachik-bachik nadmalad. Acab igar-soggwensik-naded, Abdíasʼdina baidsik-nadmogad.

⁷Abdías igarba-nadapgu, na Elíasʼbo abingunonikid. Abdías, Elías-dakargu, abin dulluu napase imaksad. Geb ega sogded: —Dummad-Elías, ¿Be Elíasʼye?

⁸Elías abin-sogded: —Eye, an Elías. Be-dummadga be sognae, wegi an gudiiye.

⁹Abdías abin sogdebalid: —¿Ibiga Acab an-oburgwebi be abege? ¿Ibugi isgus be an-daksunna?

¹⁰Nue napira be-Bab-Jehová dula-maid. Bela-yarmar-naid-ugakaase an-dummad-Acab be-amiega bipirmakdii gusad. Dulemar abin sokar damalad, wegi be gudisurye, Acab a-dulemar ega ise-sogar-imakega imakdaed.

¹¹Emisgindi, be anga soged: ‘Be-dummad-Acabʼse be naye, ega be sognaye, wegi Elías gudiiye’

¹²Anmar na bangudele, wissurmosundo, bia Bab-Dummad-Burba be-sedodibe. An Acabʼse naddibe, geb an ega sogdapsundibe, be wegi gudiiye. Acab wese be-aminonikile, geb sate be-daknonikile, an ese oburgwilegoed. Ar be an-wisid sapingwad-akale Bab-Jehová-dobekwaa an nanadiid.

¹³¿Ar bega sogsasurmarsi, deun Jezabel Bab-Jehová-gayaburba-barsogmalad-oburgwenaigu, Bab-Jehová-gayaburba-barsogmalad-e-dulatar (100) akwasaila-olloledyaba an odukusye? Dulabo-gakambe (50) akwasaila-olloled-gwensakgi an odukusad. Akwasaila-olloled-baidgine, dulabo-gakambe (50) an odukusbalid. An ega mas-ukdii gusad, an ega gobed-ukdii gusbalid.

¹⁴Emisgindi, an-dummadse be an-barminaid, ega sogega, be wegi gunaye. ¿An-oburgwebi be abege?

¹⁵Elías ega sogded: —Bab-Jehová, Bela-Gangued-Nika maid. An e-maiga-gudiidgine an bega soged, emi an Acabʼbo sunmakoed. Elías, Carmelo-yargi gudiid

¹⁶Agine, Abdías, Acab-aminaded, degi, bela-ibmar-gusad ega sogdapid. Degisoggu, Acab, Elíasʼse alid.

¹⁷Acab, Elías-dakdegu, ega sogded: —¿Be-dule Israel-dulemarga boni-ukdiidi?

¹⁸Elías, Acab-abin sogded: —Ani an Israel-dulemarga boni-ukdisulid. Be-dule, degi, be-gwenadgan Bab-Jehová-igar-islidik-mesisadgi-bangusmaladba na be boni-amidmalad. Aka bemar bab-dummadgan-Baal be-bab-dummadga na be imakdemalad.

¹⁹Emigi, be bela Israel-dulemar-bukwamaladse be gornamalo. Adi, anmar Carmelo-yargi ambikumalagar. Aginbali, bela Baal-gayaburba-barsogmalad e-dulataled-ilabake gaka dulabo-gakambe (450) ambikumarmogo, degi, Asera-gayaburba-barsogmalad e-dulataled-ilabakegwad (400) Jezabelʼba-masgundimalad, bela ambikumarmogo. Elías, degi, Baalʼse-gormalad

²⁰Acab bela Israel-dulemarse gochad, degi, bab-dummad-Baalʼga-gayaburba-barsogmaladse gochabalid. Adi, Carmelo-yargi ambikumalagar.

²¹Elías, Israel-dulemar-asabin gwisgunonigu, ega sogded: —¿Sanadse bemar darbo-binsadiid iemaloe? Ar Bab-Jehová, bemar-Bab-Dummad be dakmardibe, aba be ibsamardo. Ar bab-dummad-Baal bemar-Bab-Dummad be dakmardibe, aba be ibsamalodo. Israel-dulemar Elías-abin-imaksasurmalad.

²²Agine, Elías sogdebalid: —Napi anbi Bab-Jehová-gayaburba-barsogega bedapid. Degi-inigwele, bab-dummad-Baal-gayaburba-barsogmaladdina, e-dulataled-ilabake gaka dulabo-gakambe (450) nikad.

²³Anmarga moli-bebe-nikad-machergan warbo sedamalo. Baal-gayaburba-barsogmalad na e-dakedba moli wargwen sumaloed. Geb goa-goa imakmalo. Geb ailagi sapan-birgi mesmalo. Deginbali, mer soo ogamalo. Andi moli-baid deyob imakmogoed, ailagi sapan-birgi an mesmogoed, an soo ogaosurmogad.

²⁴Agine, be-bab-dummad-Baal-gayaburba-barsogmalad na e-bab-dummadse gormaloed, ega soo barmidagega. An deyob Bab-Jehováʼse gormogoed. Doa soo ogaoe, a-Bab-Dummad, Bab-Dummad-napiragwadid. Bela Israel-dulemar nabir itosmalad.

²⁵Agine, Elías, bab-dummad-Baal-gayaburba-barsogmaladga sogded: —Bemardi ichesursoggu, be-dakedba moli-bebe-nikad-machered na be sumalo. Agine, be moli goamakmalo. Mer be soo ogamalo. Geb be-bab-dummadse be gormalo, bemarga soo ogaegar.

²⁶Bab-dummad-Baal-gayaburba-barsogmalad moli-ega-uklesadi, oburgwismalad, geb goa-goa imaksamalad. E-bab-dummad-Baalʼse wakdaradba, yorukudse gornanai guarmalad. Amarde binnasuli weyob gornanaid: —¡Baalʼye, be anmarga soo ogaye! Aginbali, ibmar-ogumakleged-aila-dikarba gwirnanai guarmarbalid. Degite, e-bab-dummad-Baal-gaya itolessulid, gwen ega soo ogassurbalid.

²⁷Yorukudbali, Elías, Baal-gayaburba-barsogmalad-gwirnanaidgi dododed. Ega sogded: —Gatik be iseedi gormakmala. ¿Ar Baal, Bab-Dummadsursi? Degiir, be-bab-dummad neg-itomairgebed, arbanaidibe. Sulile, aineba naddibe. Abakar gabmaile, degisoggu, bemar odakergebed.

²⁸Degite, amba Baal-gayaburba-barsogmalad amba issedi gornanai gualid, degi, e-damaladba na dukin es-suidgi siknanai guarmalad, eswar-seniganagi na nailiksananai guarmalad, abe-ginnitibi aryonanai guarmalad.

²⁹Yorukud-obitegua, amba deyob gunanai gusmalad. Deyob-gunanai ega neg-sedoded. Ibmar-ogumakar-ukleged-wachi-mosgua, e-bab-dummad-Baal-gaya itolessulid, gwen ega soo ogassurbalid.

³⁰Agine, Elías bela Israel-dulemarga sogded: —Anse dagma. Bela Israel-dulemar ese armalad. Geb Elías, Bab-Jehováʼga-ibmar-ogumakar-ukleged-aila-ayarisad nudaknai gusad.

³¹Elías, akwamar gwaambe-gakabo (12) amisad. We-akwamar, dadgan-warambe-gakabo-bukwadba (12) nug-imaksad, igi Bab-Jehová sogsa-gusa: “Israelʼye be nugguoye.”

³²Elías, Bab-Jehová-nuggi, a-akwamargi ibmar-ogumakleged-aila sobsad. Geb aila-ebiris, napa akwisad. We-napa-akwialedgi sunna galón-gwabake-wilub dii sigewilubbid.

³³Sapan urbisbalid, degi, moli-bebe-nikad-machered goamaksabalid. Geb sapan-birgi sanmar urbisad.

³⁴Geb degine, Elías sogded: —Bormo-gwabake anga dii enomalo. Geb ibmar-ogumakleged-aila-birgi, degi, sapan-birgi bela eomalo. Deyob ega imaksamalad. Geb sogdebalid: —Gannar anga deyob imakmarbalo. Deyob ega imaksamarbalid. Elías sogdebalid: —Napi be anga imakmarbalo. Deyobi, ilapaa dii eonanai gusmalad.

³⁵Degisoggu, dii suurmakmai gusad, Elías napa-akwisadgi dii ena sigisad.

³⁶Ibmar-ogumakar-ukleged-wachi-mosgua, Bab-Jehová-gayaburba-barsoged-Elías, aila-asabin gwisgunonikid. Geb Bab-Jehováʼse weyob goted: “Bab-Jehováʼye, be Abraham-e-Bab-Dummadid. Isaac-e-Bab-Dummadbalid, degi, Jacob-e-Bab-Dummadbalid. Bab-Jehováʼye, emi-iba bela Israel-dulemar be-wisgumaloed, bede, Bab-Dummad-napiragwadid. Degine, wisgumarbaloed, ani an be-maiga gudimogad. An beba-ibsadiidba, be-sogsadba an we-ibmar bela imaksad.

³⁷Bab-Dummad-Jehováʼye, be anga soo ogae, adi, magar be-dakmalaga, be Bab-Dummad-napiragwadi, degi, dulemar napiragwagi beba-aibirega be imaked.”

³⁸Elías deyob-sunmaksagu, Bab-Jehová-e-soo ibmar-ogumakar-ukleged-ailagi aidenonikid, moli-bebe-nikad bela gummaksad, sapanmar bela gummaksabalid, akwamarse-bakar gummaksad, napa-akwialedgi dii-naid bela ese dinna gusad.

³⁹Israel-dulemar deyob daksagu, napase dulluu imaksamalad, sogdemalad: “¡Bab-Jehová, Bab-Dummad-napiragwadid! ¡Bab-Jehová, Bab-Dummad-napiragwadid!”

⁴⁰Agine, Elías Israel-dulemarga sogded: —Bab-dummad-Baal-gayaburba-barsogmalad bela be gamar. Mer wargwensaar be owakinmalo. Israel-dulemar bela a-dulemar-gasmalad. Agine, Elías, Cisón-dian-maidse a-dulemar-sesad. Agi, Elías bela a-dulemar-e-gammu egwachad. Elías, dii-owiega Bab-Jehováʼse-gochad

⁴¹Geb Elías, Acabʼga sogded: —Be-negse be nae, be mas-gunno, be gobbalo. Bato dii-dummad urmakdanikid.

⁴²Acab deyob e-negse mas-gunnade, degi, gobnade gusad. Elíasʼdina Carmelo-yarse nakwided, napase dulluu imaksad, degi, yokor-imbaba e-wagar odosad.

⁴³Elías, e-maiga sogded: —Be naknae. Demarsik be ataknae. E-mai nade gusad. Geb atakdegu, sogded: —Ibmar daklesuli. Agine, Elías deyob e-mai ilagugle (7) barminai gusad.

⁴⁴Napidgine, e-mai Elíasʼga sogded: —Magadba mogir nakwedanikid. Mogir arganun-dungu dakleged. Agine, Elías e-maiga sogdebalid: —Acabʼse be nae, ega be sogdapo: ‘Be-ur-napagined guakwa be nasikoye, gwae be naoye. Degisulile, diise be galegoye.’

⁴⁵Agine, neg-gudure burwaba-mesa nagunonikid. Geb dii-dummad burwaba-mesa wialid. Acabʼdina, Jezreel-neggweburse e-ur-napaginedgi naded.

⁴⁶Elíasʼgindina, Bab-Jehová-e-gangued aidenonikid. Elías e-morsuid e-sasirba edicha imaksad, geb abarmakded. Elíasʼdi, Acab-idu Jezreel-neggweburse modapid.