Read San Blas Kuna 1 Reyes 20 Bible Online

1 Reyes 20 - San Blas Kuna bible

1 Reyes 20

¹Agine, Siria-e-rey-Ben-Adad, e-sorda-bila-onomalad bela onmaksad. Reymar-waladulagwen-gakambe-gakabo (32) Samaria-neggweburgi-bila-onogega molimar, e-ur-nika-nika semai gusad. Deyob Samaria-neggwebur-ebirnonimalad, agine oitononikid.

²Geb, Ben-Adad Samaria-neggweburse e-gayaburba-berbemalad Israel-dulemar-e-rey-Acabʼse barmisad, ega sogega:

³“Weyob Ben-Adad sogye: ‘Be-manimar, be-ormar, be-omegan, degine, be-mimmigan bela angadye.’ ”

⁴Israel-e-rey, Ben-Adad-abin sogded: “Dummad-Rey, belagwable an ibmar-nikad begadid, anse-bakale, an begadga gued.”

⁵Gannar Ben-Adad-gayaburba-berbemalad Acabʼse nonimalad, ega sognonimarbalid: “Ben-Adad weyob sogye: ‘Bega an sogsa gusye: Be-manimar, be-ormar, be-omegan, degine, be-mimmigan bela angadye.

⁶Aginbali, oibosale, we-wachigi an-sordamar an barmidagoed. Be-neguyagi bela be-ibmar-nuegan-bukwad sedmalaga, dule-bega-arbadimalad-e-neguya deyob an imakbaloed.’ ”

⁷Degidgine, Israel-e-rey bela girmar-dummaganse gochad, ega sogded: —Be dakmalana, bule we-dule anmarga boni-onobi be daksunna. Anse an-omegan-egichad, an-mimmigan-egichabalid, manimarse-bakar, ormarse-bakale anse egichisbalid. An ega surye sogsasulid.

⁸Girmar-dummagan, degi, bela Israel-dulemar ega sogded: —Mer eba be ibsao, mer ibmar-bese-egisnaid ega be ukbalo.

⁹Agine, Acab, Ben-Adad-gayaburba-berbemaladga sogded: —Weyob an-dummad-reyga be sogo: ‘Ani, be-maiga an gudiid. Gebesailagi be anse ibmar-egichisad an bega ukoed. Sorba be ibmar-egichisaddi, an bega imakosulid.’ Ben-Adad-e-gayaburba-berbemalad nadmalad. Geb Ben-Adadʼga deyob sogdapmalad.

¹⁰Deginbali, Ben-Adad, Acabʼga gaya barminai gusbalid: “An Samaria-neggwebur an bela osulossulile, bab-dummagan sabsur-an-odurdaksundo. A-ulale, Samaria-neggweburgi an-sordagan-irba argan-nukgwen-nukgwen ega ukub ukega naguosulid.”

¹¹Israel-e-rey-Acab abin-sogdemogad: “Mer idu-idu amba yoo-bila-onoleged-idu be sunmako.”

¹²Ben-Adad we-gaya itosgua, deun reymarmala sisa-gobsiid. Agine, Ben-Adad e-sordaganga sogded: “Guakwamalo.” Degisoggu, e-sordagan, Samaria-neggweburse bila-ononamalaga guakwa ambikusad. Acab, Ben-Adadʼgi naknonikid

¹³Degidgine, Bab-Jehová-gayaburba-barsoged, Israel-e-rey-Acabʼse nonigusad, ega sogded: —Weyob Bab-Jehová soged: ‘¿Ichesuli sordamar be dake? Emi, we-sordamar an bega urmakoed, adi, be an-dakmalaga, ani an Bab-Dummad-Jehová gue.’

¹⁴Acab abin-sogded: —¿Degite, Bab-Jehová doaba deyob imakoe? Bab-Jehová-gaya-barsoged sogdebalid: —Weyob, Bab-Jehová soged: ‘Sapingan-dummagan-bendakdimaladba an imakoed.’ Acab egisdebalid: —¿Degite, doa-inse bila-onodoe? Bab-Jehová-gayaburba-barsoged sogded: —Be-inse be onodoe.

¹⁵Agine, Acab dummagan-yar-sedimalad-e-bendakdimalad onmaksad. A-sordamar bela e-dulataled-ilabo gaka dulagwen-gakambe-gakabo (232) gumalad. Aginbali, Acab bela Israel-sordamar-onmaksabalid, bela miligugle (7,000) gumalad.

¹⁶Agine, yorukudba nade gusmalad. Deun, Ben-Adadʼdina Reymar-dulagwen-gakambe-gakabogwadmala (32) sisa-gobsiid. We reymar e-bendakega nonimalanad.

¹⁷Dummagan-yar-sedimalad-e-bendakmalad-inse nade gusmalad. Ben-Adad nakulemalad-barmis gusad. Amarde ega sognonimalad, Samaria-neggweburgi sordamar noarmarye.

¹⁸Ben-Adad sogded: “Anga ganamalo, mer oburgwemalo. Nuedgi-danimardibe, amba be anga gamalo, bila-onogega danimardibe, amba be anga gamarbalo.”

¹⁹Dummagan-yar-sedimalad-e-bendakmalad Israel-sordamar-idu nadapi gusmalad.

²⁰Sordamar war-wargwen e-isdarmalad-oburgwemai gusad. Geb degidbali Siria-sordamar wakite gusmalad. Siria-e-rey-Ben-Adadʼdina, moli-birgi-sii e-sorda-moligi-sii-bila-onomaladba wakite gusad.

²¹Israel-e-rey, Siria-sordamar-balimaksad. Agine, molimar-bukidar, degi, e-urmarse-bakar bukidar gasad. Siria-dulemar nue ese ibitosmalad, ese galakusmalad.

²²A-sorbali, Bab-Jehová-gayaburba-barsoged Israel-e-reyse nonikid, ega weyob sognonikid: “Mer be baisur-binsao. Siria-sordamar-idu igar be amie, ade, Siria-e-rey, birga-danikir gannar begi bila-onogega gwichigunonikoed.”

²³Degine, Siria-sorda-idudimalad e-reyga sogdemalad: “Ar Israel-sordamar-e-bab-dummagan yalagan-e-bab-dummadid. Agala, Israel-sordamar anmarba dutusurmalad. Anmar, amarbogwa nebagi bila-onodibe, inniki an bega soged, anmar egi nakwisaled.

²⁴Degisoggu, weyob be imako: Reymar bela be ogwao, amar-muchub, sordamar-idudimalad dummadga be nug-imako.

²⁵Sordamar-bila-onomalad be urbebalo, igi iduar be nikusa, deyob mergu be urbebalo. Igi molimar, degi, ur-molimar be nikusbalid, deyob be imakbalo. Agine, neba-naidgi be Israel-sordamargi bila-onogoed. Be dakodo, bule bemar nakosurdibe.” Rey-Ben-Adad nabir itosad, geb deyob imaksad.

²⁶Birga-obaksagua, Ben-Adad Siria-sordamar onmaknai gusad. Geb Israel-sordamargi bila-ononamalaga, Afecʼye-neg-nugadse nade gusmalad.

²⁷Acabʼdina, e-sordagan-onmaknai gusmogad. Sordamar ibmar-ebulemalad, degi, e-mas-gunmaloed, bela ega daknai gusad. Geb, Siria-sordamargi bila-ononamalaga node gusmalad. Israel-sordamar, Siria-sordamar-abin ambikunonimalad. Israel-sordamar Siria-sordamar-abin sibad-wawaad-warbo-gunaiyob wis dakleged. Siria-sordamardina yeer-mergu e-abin bukwad.

²⁸Degidgine, Bab-Dummad-e-dule, Israel-rey-asabin gwisgunonikid, ega sogded: “Weyob Bab-Jehová soged: ‘Siria-sordamar an-annik soged, ande, Bab-Jehová-guedi, unnila yalagan-e-bab-dummadye, nebagan-e-Bab-Dummadsurye. Degisoggu, an bega we-dulemar urmakoed, adi, be wisgumalaga, anbi unnila Bab-Jehová gue.’ ”

²⁹Israel-sordamar, Siria-sordamarbogwa ibagugle (7) abin-abin ambikusad. Ibagugle-gusgua (7) bila onoleded. A-ibagine, Israel-sordamar Siria-sorda-nagab-bila-ononadapmalad mili-dulatar (100,000) oburgwenonikid.

³⁰Agine, Siria-sorda-bamalad, Afec-neggweburse wakitemalad. Geb, we-sordamar mili-dulagwen-gakagugle-wakinnonimaladgi (27,000) neggwebur-galu-matusulid-akwabiid egi malusad. Aginbali, Ben-Adad deyob a-neggweburse wakinnonimogad, nega-nega dukudii gusad.

³¹Degidbali, Ben-Adadʼga e-sordamar sogded: “Anmar itodaed, Israel-dulemar-e-reymar emar-wiledakdaye. Degisoggu, anmar wile-itoged-mor yomarsunno. Israel-dulemar-e-reyse anmar namarsunno. Anmar ese wilenamalo, mer anmar-oburgwega. Abakar wile anmar-dakalile.”

³²Degidbali, Ben-Adad-sordamar Israel-dulemar-e-reyse nade gusmalad. Ega wilesagwadgi sogdapmalad: —Ben-Adad-be-maiga-gudiid weyob sogye: ‘Wile wis be an-dake, mer be an-oburgoye.’ Rey-Acab abin-sogded: —Ben-Adadʼde, ¿amba dula-gudii? We-dule an-gwenadyob gued.

³³Ben-Adad-sordamar deyob Acab-itosgua, nabir neg-gudagoye bismalanad. Degisoggu, Acabʼga sogdemalad: —Inniki-be-soge, ar be-gwenad-Ben-Adad amba dula-gudiid. Agine, Rey-Acab sogdebalid: —Be namar. Ben-Adad be anga nidamalo. Ben-Adad, Rey-Acabʼse nonigua, Rey-Acab, e-ur-moli-bila-onogedgi onakwisad.

³⁴Ben-Adad, Acabʼga sogded: —An-bab, be-bab-ibe neggweburmar-susad, gannar an bega uko. Aginbali, Damasco-neggweburgi sunna ibmar-ukleged-neg be sied, igi an-bab Samaria-neggweburgi imaksamoga, deyob be imakmogad. Acab abin-sogdemogad: —Deyob be anga sogele, degirdi, bar an be-gaosulid. Agine, Acab, Ben-Adadʼbogwa igar-mesnai gusad. Geb deyob Acab, Ben-Adad-indaksa gussunnad. Rey-Acab, Bab-Jehováʼgi isgusad

³⁵Bab-Jehová-sogedba, Bab-Jehová-gayaburba-barsogmalad-danar-bukwad e-sorda-wargwen, e-sorda-baidga sogded: —Be an-sarsoge. E-sorda-baid yapa-sarso gusad.

³⁶Bab-Jehová-gayaburba-barsogmalad-wargwen, e-sorda-baidga sogdebalid: —Be Bab-Jehová-gayaburbaba be ibsasursoggu, angi be banguder, achumigur-nono-wawaadse be oburgwilegoed. Degisoggu, we-dule-baid, Bab-Jehová-gayaburbaba-ibsassulidi, Bab-Jehová-e-gayaburba-barsogedgi bangudgua, achumigur-nono-wawaad e-abin noalid. Geb a-dule ese-oburgwilesad.

³⁷Degine, Bab-Jehová-gayaburba-barsoged, dule-baid abinguarbalid. Ega sogded: —¡Be an-sarsoge! A-dule, Bab-Jehová-e-gayaburba-barsoged sarsononikid, nue onakbi-imaksad.

³⁸Agine, Bab-Jehová-gayaburba-barsoged nade gusad. Geb Rey-Acab-edarbega igarba nadapidgine, morgi e-wagar-odukuar gwisgudapid.

³⁹Rey-Acab igarba nadapgu, Bab-Jehová-gayaburba-barsoged ese binnasuli goted: —Ani an be-maiga gued. Be an-dummadid. Bila-onolenaigu, an beba gunai gusmogad. Agine, sorda-gwensak anga dule-wargwen gasa-senonikid, anga weyob sognoni gusad: ‘We-dulegi nue be nakulegoye. We-dule wakinnonidibe, be be anar oburgwilegoye. Sulile, mani-nibir-dulapaa-gakambe-gakatar (75) be bennukoye.’

⁴⁰An obir-obir gunai-gussoggu, we-dule angi wakinnoni gusad. Degisoggu, Israel-e-rey-Acab Bab-Jehová-gayaburba-barsogedga sogded: —Be deyob sogsoggua, be-sogsadba be sabsur-odurdaklegodo.

⁴¹Deyob itosgua, Bab-Jehová-gayaburba-barsoged ibya-atinnaled, yog esikar imaksad. Israel-e-rey magar daknonikid, we-dulede, Bab-Jehová-gayaburba-barsoged-sorda gue.

⁴²Geb Bab-Jehová-gayaburba-barsoged, Rey-Acabʼga sogded: —Weyob Bab-Jehová soged: ‘We-dule-oburgwilegoye an sogsagusad, be owakichasoggu, be be, e-anar oburgwilegoed. Degine, Israel-dulemar, Siria-dulemar-anar burgwemarmogoed.’

⁴³Degisoggu, Rey-Acab bukib-binsae, degi, isdar itoe naded. Deyob, Samaria-neggweburse e-neg-siidse naded.