Read San Blas Kuna 1 Reyes 4 Bible Online

1 Reyes 4 - San Blas Kuna bible

1 Reyes 4

¹Degisoggu, Salomón bela-Israel-dulemar-e-reyga megnonikid.

²Salomónʼga sordamar-idumalaga gunonimalad, wemalad:Sadoc-machi-Azarías, dule-irwa-Bab-Dummadse-goledga megisad.

³Sisa-e-masmala, gwen Elihorefʼye-nugad, baiddi Ahíasʼye nugmogad. Amala, reyga garda-narmakmaladga megismalad,Ahilud-machi-Josafat, negselemaidga-garda-narmakedga megisad.

⁴Joiada-machi-Benaía, sordamar-bila-onomalad-e-dummadga megisad.Sadoc, degi, Abiatar, wemar, dule-irwa-Bab-Dummadse-gormaladga megismalad.

⁵Natán-machi-Azarías, dule-negsedimalad-e-dummadga megisad.Natán-machi-Zabud, dule-irwa-Bab-Dummadse-goledga megisad, degi, reyga-binsaed-ukedga megisbalid.

⁶Ahisar, reyneg-akwedga megisad.Abda-machi-Adoniram, reyga-sabsur-oarbaledimalad-e-dummadga megisad.

⁷Deginbali, Salomón Israel-dulemargi e-ambe-gakabo (12) ega-negsemalad nugsanonikid. Amar reyga, degi, rey-neguyagi-gudimaladga mas-amidimalad. Wemar-ambe-gakabogwad (12), birgagine war-wargwen niigwen-niigwen, mas-amidimalad.

⁸Wemar-ambe-gakabogwad (12), wemalad:Hur-e-machi, Efraín-yalaganba negdakmaid.

⁹Decar-e-machi, we-neggweburmar-e-dummadid: Macaz, Saalbim, Bet-Semes, Elón, degi, Bet-Hanán.

¹⁰Hesed-e-machi, we-neggweburmar e-dummadmogad: Arubot, Soco, degi, bela Hefer-yar-naid dakmaibalid.

¹¹Abinadab-e-machi, Dor-yar-naid-dakmaid. Deginbali, we-dule Salomón-sisgwa-Tafatʼye-nugad nikusad.

¹²Ahilud-machi-Baana we-neggweburmar dakmaid: Taanac, Meguido, Bet-Seán. We-Bet-Seánʼde, Saretán-neggwebur-dikarba siid, Jezreel-neggwebur-deale bukwad. Baana bela Bet-Seán-neggwebur-siid-akale, degi, Abel-Mehola-neggweburse negdakmaid. Amba Jocmeam-neggwebur-obakar negdakmaibalid.

¹³Geber-e-machi, Ramot-De-Galaad-neggwebur-e-dummadga-maid, degi, Galaad-yar-naidgi neggwebur-bukmaladse-bakar, dakmaibalid. We-neggweburmarde, Manasés-machi-Jairʼgadinad. Aginbali, Geber-e-machi Basán-yar-naidgi Argob-neg-nugad-e-dummadga gusbalid. Agine, neggwebur gwadulapaa (60) bukwad. A-neggweburmar akwa-galu-matusulid-ebiris-bukwa nanaed. Deginbali, e-yawagak-eduedi esgoro-gordikidgi sobaled.

¹⁴Iddo-machi-Ahinadab, Mahanaim-neggwebur-e-dummadid.

¹⁵Ahimaas, Neftalí-yar-naid-e-dummadid. Deginbali, Ahimaas, Salomón-sisgwa-Basematʼye-nugad nikusad.

¹⁶Husai-machi-Baana, Aser-yar-naid, degi, Alot-yar-naid-e-dummadid.

¹⁷Parúa-machi-Josafat, Isacar-yar-naid dakmaid.

¹⁸Ela-machi-Simei, Benjamín-yar-naid dakmaid.

¹⁹Uri-machi-Geber, Galaad-yar-naid dakmaid. Galaad-yarde, Rey-Sehónʼgadinad. Sehónʼde Amorreo-dulemar-e-reyga maigusanad. Geberʼde Rey-Og-e-yar ganikinad. Ogʼde Basán-yar-naid-e-reyga maigusanad. Galaad-yargindina, Geber wargwenna yar-semaid. Salomón ibmar-bukidar-nikusad

²⁰Israel-dulemar, degi, Judá-dulemar ichesur gumarsoggu, demar-gakagi-ukub-naidyob gumalad. Aga, geg ebisleged. Ibmar-gobleged, degi, ibmar-gulleged, obinebaka nikasoggu, weligwar itobukwad.

²¹Salomón, Éufrates-diwar-maid-akale, Filistea-yar-naidse bela yar-ganonikid. Aginbali, Egipto-yar-abingunaidse-bakar, Salomón bela-we-yar-nanaid-semaigu, bela dulemar-bukmalad ega ibmar-bukidar senonidamalad, degi, Salomón-e-maiga gusmarbalid.

²²Salomónʼga bane-bane weyob ibmar-mergu ebuleged:Madubur-nued, nibir-miliambe-gakabake gaka dulataled-ilatar-aidiku (14,500) ebuleged.Madubur, nibir-milidulagwen-gakambe-aidiku (30,000) ebulebalid.

²³Moli-bebe-nikad-wardadagan mas-nuedbi-madimalad, warambe (10) ebulebalid.Moli-bebe-nikad gaganbi-madimalad, waladulagwen (20) ebulebalid.Sibad-wawaadmar, degi, sibadmar, waladulatar (100) ebulebalid.Goe-sapurmar, goe-sapingan, degi, wasamar ebulebalid.Degi, nuumar-nabir-gullemalad ebulebalid. We-nuumar gege ebisleged.

²⁴Salomón Éufrates-diwar-dad-argwanedsiki, Tifsaʼye-neg-nugad-akale Gaza-neg-nugadse, bela reymar-mamaid-birgi yar-ganonikid. Degisoggu, bela yar-abingunanaidgi neg-bogidikid nagunonikid.

²⁵Salomón yar-semaigu, bela Judá-dulemar, degi, Israel-dulemar, nabir-gudii gusmalad. Dan-yar-naid-akale, Beersebaʼye-neg-nugadse, bela neg-bogidik nagunonikid. Degisoggu, Israel-dulemar e-nainugi uvaʼdub-urba, degi, higuera-sapi-urba bonisuli ambikudii gusmalad.

²⁶Salomón molimar miliambe-gakabo (12,000) nikad. Deginbali, moli-ur-bilagi-ebuleged-e-galumar milibake (4,000) nikabalid.

²⁷Dummagan-ambe-gakabogwad (12) Salomónʼga-yar-sedimaladi, niigwen-niigwengi Salomónʼga mas ukdimalad. Degi, bela e-sordamar-arbadimaladga mas-ukdimarbalid. Degisoggu, mas-sate gudii gussurmalad.

²⁸We-ambe-gakabogwad-yar-sedimaladi (12) e-mas-uked-nii-mosale, cebada-e-gwag, degi, gagan-molimar-maed, sogedba molimarga senonidamarbalid. Salomón nue-binsaed-nikarba gusad

²⁹Bab-Dummad, Salomón nue-binsaed-ibedga imaksad, degi, nue-itoakwaa-nanaega imaksabalid. Agine, gurgin-bukidar-nika gunonibalid.

³⁰Salomón-e-ibmar-wisidi, bela dulemar-ibmar-wismaladgi obined, dulemar-ibmar-wismalad yar-dad-nakwedsik-bukwamaladgi obinbalid. Degi, Egipto-dulemar-ibmar-wismaladgi obinbalid.

³¹Salomón we-dulemarba bur bule ibmar-wisid: Ezraí-neggined-Etánʼye-nugadgi. Aginbali, Mahol-e-masmalagi, Hemánʼye-nugadgi, Calcolʼye-nugadgi, degi, Dardaʼye-nugadgi obinbalid. A-ulale, Salomón-nug-dummarba-guedi, bela dulemar-yar-baid-baidgi-bukwamaladi wisgusmalad.

³²Salomón binsaed-nuegan, milipaa (3,000) narmaksad, degi, namaked miligwen gakatar (1,005) narmaksabalid.

³³Salomón sapi-durbamargi Líbano-urwala-akale, degi, galugi-hisopo-gagan-dungumaladse-bakale, egi sunmaksabalid. Deginbali, Salomón ibdurgangi dulemar-odurdaksad: Ibdurgan-ursirmaladgi, nuumargi, ibdurgan-unimakdimaladgi, degi, uamargi dulemar-odurdaksabalid.

³⁴Bela yar-nanaid-e-reymar, Salomón-bela-bela-ibmar-wisid wisgunonimalad. Degisoggu, we-reymar Salomón-e-binsaed-nikarba-gued-wisgunonimaladi, Salomón-itogegala, e-sordagan Salomónʼse barmiardamalad.