Read San Blas Kuna 1 Reyes 9 Bible Online

1 Reyes 9 - San Blas Kuna bible

1 Reyes 9

¹Salomón, Bab-Jehováʼse-goled-neg sobsagua, na e-neg obelosbargua, degine, bela ibmar-abeged sobsabargua,

²geb Bab-Jehová gannar Salomónʼse magarononikid. Ar igi gebe Gabaón-neggweburgi ese magarononigusa, deyobi ese magarononi gusbalid

³Agi, Bab-Jehová, Salomónʼga sogded: “Ise-wilegar be anse gornaigusadi an be-itosad. We-anse-goled-neg be-anga-sobsadi, angadga an imaknonikid. An egi degisadegu gudii guoed. We-neg an nue-sabgudii guoed, an egi nakuledii guoed, deyob degisadeguoed.

⁴”Igi be-bab-David gudii gusa, deyob be gudimogale, gwage-swilidikidgi be gudiile, bela anba be ibsadiile, an-Igar-Maidba be nadiile, an-sogedba be gudiile,

⁵an be-bab-Davidʼga ibmar-imakoye sogsayobi an imakoed. ”Deun an ega sogsagu: ‘Israel-dulemar-iduega be-wagan be-sorba rey-gangi-siged surguosurye.’ Degisoggu, Israel-dulemar-e-dummadga-be-gudiid an be-ogannogoed.

⁶Ar bemar, degi, bemar-wagan, an-Igar-Mamaidgi, degi, an-igar-sogsadgi bangudmalale, degi, bemar na bab-dummagan-baiganba nanaega, degine, e-nug-odummogega be angi bangudmarbalile,

⁷bemar Israel-dulemar, we-yar-an-bemarga-uksadgi, an gandikidgi sabsur bemar-onogoed. ”We-anse-goled-neg an nug-imaksadi, an obanoed. Israel-dulemar dodolegedga gudoed, degi, bela dule-bamalad egi alledii gudmaloed.

⁸Emi anse-gorleged-neg be dakedi, gwen akar-guosuliyob dakleged. Degite, e-ibagan-nonikir, bela ayarnonikoed. Dulemar we-neg-anga-soblesad deyob dakarmardibe, geger dakdemaloed, egi dododmaloed. Egisnai-gudmaloed: ‘¿Ibiga Bab-Jehová weyob we-neg imaksa? ¿Ibiga Bab-Jehová weyob Israel-dulemar-imaksabali?’

⁹”E-abin sogdemaloed: ‘Ade, Israel-dulemar e-Bab-Dummad-Jehováʼgi bangusmalad. We-Bab-Dummad Egipto-yargi e-dadgan-onos gusanad. Degite, Israel-dulemar bab-dummagan-baigan na e-bab-dummadga imakdemalad, a-nug-odummodii gudmalad. Agala, Bab-Jehová ega bonigan uknonikid.’ ” Salomón ibmar-bukidar imaksad

¹⁰Salomón Bab-Jehováʼse-goled-neg sobsad, geb e-meged-neg sobsabalid. Bela birga-dulagwen (20) gagasad.

¹¹Agine, Salomón, Tiro-neggwebur-e-rey-Hiram bela Salomón-abegedba ega urwar-suarmar-uksad-ular, ega baryawarmar-uksabalid-ular, degine, ega ormar-uksabalid-ular, Hiramʼga Galilea-yargi-neggweburmar-bukwad gwadulagwen (20) uksad.

¹²Hiram, Salomón-neggweburmar-ega-uksad-daknaega Tiro-neggweburgi node gusad. Hiram, neggweburmar-daksagua, abessulid.

¹³Agi, Salomónʼga sogded: “Andi, an-aiye an be-bienad. We-neggweburmar-be-anga-uksad gwen nabirsulid.” Geb a-neggweburmar Cabul-Yalaye onug-imaksad. Deyob amba we-garda-narmaklenaidse, bileged.

¹⁴Ar Hiramʼdina, Rey-Salomónʼga or nibir-milibaabak gaka dulataled-ilagugle-aidiku (8,700) uksa gusanad.

¹⁵Rey-Salomón dule-bulegan-arbamalad-amisad, ega we-negmar sobega: Bab-Jehováʼse-goled-neg sobega, e-reyneg sobega, neg-ollor-nabir-nanaleged sobega, galu-matusulid-akwabiid Jerusalén-neggweburga sobega, Hazor-neggwebur gannar urbega, Meguido-neggwebur gannar urbega, degine, Gezer-neggwebur gannar urbegar.

¹⁶Egipto-rey-Faraón, Gezer-neggwebur-oitos gusad. Gezer-dulemar-ibe ablis eos gusad, e-negmar-ogumaksa gusad, bela Canaán-dulemar Gezer-neggweburgi-gudimalad ogilos gusad. Geb sorbali, Faraón, e-sisgwa-Salomón-nikunaigu, a-neggwebur e-sisgwaga uksad.

¹⁷Agala, Salomón, Gezer-neggwebur gannar urbisad. Bet-Horón-Neggwebur-Urbalid gannar urbisbalid.

¹⁸Baalat-neggwebur gannar urbisbalid, degi, neg-dulesulidganba Tadmor-neggwebur gannar urbisbalid.

¹⁹Deginbali, Salomón na neg-bamalad-soboye sogsagusadi, bela sobsad: Ibmar-saboleged-neg, ur-napagined-ambikued-neg, dulemar-moli-birgi-sii-bila-onomalad-neg. Salomón Jerusalén-neggweburgi ibmar-soboye-sogsadi, bela sobsad. Líbano-yar-naidgi amba deyobi sobsabalid. Bela yar-semaidgi ibmarmar sobsabalid.

²⁰Israel-dulemarsulid-e-wagan-napi-besmalad, wemalad: Amorreo-dulemar, Het-dulemar, Ferezeo-dulemar, Heveo-dulemar, Jebuseo-dulemar.

²¹We-dulemar Israel-dulemarse oburgwilessurgusmaladid. Degisoggu, Salomón, a-dulemar, undar-arbalegedgi oarbaega imaksad. Amba deyobi, we-garda-narmaklenaigu, arbadimalad.

²²Salomón, Israel-dulemardi deyob oarbaega imaksasulid. Israel-dulemar we-ibmarga gusmalad: Bila-onomalad-dulega, dule-negsemaladga, sordamar-idumaladga, moli-ur-semalad-e-dummaganga, degi, sorda-moli-birgi-sii-bila-onomaladga gusmalad.

²³Aginbali, Salomón, dulemar dulataled-ilatar gaka dulabo-gakambe (550) ega nakulemalaga nug-imaksabalid. We-dulemar, dule-arbamalad-dakmalaga, degine, idumarbaliga nugsalesmalad.

²⁴Faraón-e-sisgwa, David-e-neggweburgi-gudiidgi, Salomón-ega-neg-sobsadse nonigua, Salomón, neg-ollor-Miloʼye-nugad sobsad.

²⁵Salomón, Bab-Jehováʼga ibmar-ogumakar-ukleged-aila-sobsa-gusadgi, birgagine, ilapaa ibmar-ogumakar-ukleged ukdaed. Degi, gwenatigwar-guedga-ibmar-ukleged ukdabalid. Agine, ina-wawadikid Bab-Jehová-asabin-bukwad ogumakdabalid. Deyobi, Bab-Jehováʼse-goled-neggi ibmar-imakleged imakdii gusad.

²⁶Rey-Salomón, Ezión-Geber-neggweburgi ur-diakinmalad sobsabalid. Ezión-Geber, Edom-yar-naidgi siid. A-neggwebur, Elot-neggweburye-nugad-naba, Demar-Ginnidye-nugad-gakaba siid.

²⁷Hiram, e-selamar-demargi-durdakarmalad a-urmargi-arbaega barmisad. Amala, Salomón-e-sordaganmala, nade gusmalad.

²⁸We-dulemar, Ofirʼye-neg-nugadse nade gusmalad. Agi, or nibir-milidulagwen-gakambe gaka dulataled-ilabaabak-aidiku-amis (30,800), Rey-Salomónʼga senonimalad.