Read San Blas Kuna 2 Reyes 24 Bible Online

2 Reyes 24 - San Blas Kuna bible

2 Reyes 24

¹Joacim Judá-yar-semaidgine, Babilonia-dulemar-rey-Nabucodonosor egi bila onononikid. A-bila-onosadgi, Nabucodonosor Joacimʼgi nakwisad. Geb agi, Judá-dulemar Nabucodonosor-sogedba birgapaa ibmar-imakdii gusad. Geb a-sorbali, Rey-Joacim, Nabucodonosor-sogedba bar ibmar-imakbisur gualid.

²Agine, Bab-Jehová, Joacimʼgi, degi, Judá-dulemargi-gwisguegala, wemar-barmiar gusad:Babilonia-sordamar, Siria-sordamar,Moab-sordamar, degi, Amón-sordamar egi barmiar gusad. Igi Bab-Jehová, ega-gayaburba-barsogmaladba ibmar-guoye sogsagusa, deyob gusad.

³Bab-Jehová-sogedba Judá-dulemar sabsur-odurdaklesad.Ar Judá-dulemar Manasés-isgusadba-nanasad-ulale, Bab-Jehová egi Judá-dulemar-banguega imaksad.

⁴Manasés, Jerusalénʼgi dulemar-ibmar-oakalossulid-oburgwisad-ulale, Bab-Jehová egi Judá-dulemar-banguega imaksad. Degisoggu, Bab-Jehová Judá-dulemarga, igi-barsaye gwen sogsasulid.

⁵Joacim e-ibmar-imaksad, degi, ibmar-imaksad-baigan, Judá-e-reymar-ibmar-imaksad-gardagi narmakar maid.

⁶Rey-Joacim burgwisgu, e-machi-Joaquín e-sorba yar sesad.

⁷Babilonia-e-rey bela Egipto-yar-gasasoggu, Egipto-dulemar-e-rey bar Egipto-yargi nossulid. Ar ade, Babilonia-e-rey Egipto-diwar-maid-akale, Éufrates-diwar-maidse, Egipto-e-rey-yarmar-ganikidi, bela gasad. Joaquín, Judá-yar-sesad

⁸Joaquín birgambe-gakabaabak-nikadgi (18) yar sealid. Jerusalénʼgi nii-warbaa yar sesad. E-nan Nehustaʼye nugad, Elnatán-e-sisgwad. Nehustaʼde, Jerusalénʼginedid.

⁹Joaquín Bab-Jehová-ibmar-abemaisulidi, Bab-Jehová-asabin imaksad. Ar e-bab-ibmar-imaksadba ibmar imaksamogad.

¹⁰A-ibagangi, Babilonia-e-rey-Nabucodonosor-e-sorda-bila-onomalad, Jerusalén-neggwebur-ebilis ambikunonigusad.

¹¹Degi, Babilonia-Rey-Nabucodonosor, e-sordamar-Jerusalén-neggwebur-ebilis-bukwadgi, Jerusalénʼse nonikid.

¹²Geb Judá-rey-Joaquín, e-nanmala, degi, ega-arbamaladmala, e-dule-dummaganmala, degine, e-sorda-bila-onomalad-e-dummaganmala, Babilonia-e-reyse galakunonimalad. Geb galesmalad. Deunni, Nabucodonosor birgabaabakgus (8) Babilonia-yargi negsemaid.

¹³Ar igi Bab-Jehová sogsagusa, deyob ibmar gusad. Nabucodonosor, Bab-Jehováʼse-goled-neggi ibmar-nuegan-bukwad bela sesad, degi, reyneggi ibmar-nuegan-bukwadse-bakale, bela sesad. Nabucodonosor, Bab-Jehováʼse-goled-neggi-ibmar-ebulemalad bela goamaksabalid. We-ibmar Rey-Salomón orbi-sobsagusadid.

¹⁴Deginbali, Nabucodonosor, bela dule Jerusalénʼginmalad-gasa sesa gusad: Dule-dummagan, dule-bila-onomalad-bulegan, dule-ibmar-sobedgi-arbamalad, degi, dule-esgoro-sobedgi-arbamalad, gasa sesad. Belagwable miliambe (10,000) dulemar-gasa sesad. Unnila, dule-wileganabi napi obesad.

¹⁵Degi, Rey-Nabucodonosor, wemar-gasa Babilonia-yarse sesa gusad: Rey-Joaquín, e-nan, rey-e-omegan, dule-dummagan, degi, dule-bulegan-gasa sesa gusad.

¹⁶A-ukinbali, bela sorda-bila-onomalad-bulegan, miligugle-mergu (7,000) sesa gusbalid.Dule-ibmar-sobedgi-arbamalad,degi, dule-esgoro-sobedgi-arbamalad, miligwen-mergu (1,000) sesa gusad. Degine, Nabucodonosor, bela dulemar-bila-onolegedgi-urwemalad-gasa Babilonia-yarse sesa gusbalid.

¹⁷Geb a-sorbali, Nabucodonosor, Joaquín-e-gilor Mataníasʼye nugad, Judá-e-reyga nug-imaksad. Geb ega nug ogwasad, Sedequíasʼye onugsasad. Sedequías, Judá-yar-sesad

¹⁸Sedequías birga-durgwen-gakagwensak-nikadgi (21) yar sealid. Jerusalénʼgi birgambe-gakagwensak (11) yar sesad. E-nandi, Hamutalʼye nugad, Jeremías-e-sisgwad. Hamutalʼde, Libnaʼginedid.

¹⁹Sedequías Bab-Jehová-ibmar-abemaisulidi, Bab-Jehová-asabin imaksad. Ar ade, Sedequías, Joacim-ibmar-isgana-imaksadba ibmar imaksamogad.

²⁰Degidbali, Bab-Jehová Jerusalén-dulemargi, degi, Judá-dulemargi uluar gusad. Degisoggu, Bab-Dummad amar-obachasunnad. A-sorbali, Sedequías, Babilonia-e-reygi gwichigusad.