Read San Blas Kuna 2 Reyes 4 Bible Online

2 Reyes 4 - San Blas Kuna bible

2 Reyes 4

¹Ome-gwensak Bab-Dummad-gayaburba-barsoged-e-omega-gusadi, nunmak-itogedgi, Eliseoʼga sogded: —An-sui-beba-gudidaed burgwisad. Be wisid, a-dule Bab-Jehováʼba nue ibsadii daed. Epenne, anmar dulegi mani-gasgusad. Emide, a-dule nonikid. An-ibe an-masmala-warbogwad e-maiga-guega sedbied.

²Geb Eliseo ega sogded: —¿Degite, ibu bega imakbi be an-abesunna? ¿Ibi wis neggi be nikasunna? Ome sogded: —Dummad, bipisaale neggi an ibmar nikasulid, unnila olivo-gwallubi bormogi wis-ichee siid.

³Eliseo ega sogded: —Degirdi, dule-be-neg-dikarba-mamaidse, bormo-ollogana ichesur be egiso, bela be amioedi be sedago.

⁴A-sorba, be-masmala-ebo negyaba be dogo. Geb, yawagak be edio. Agine, olivo-gwallu bormomargi be enogo. Degi, bormomar-engumaidba, bachik-bachik be urbo.

⁵Geb degine, omegwa Eliseo-idu e-negse naded. Agine, e-masmala-ebo, negyaba yawagak-ediar sigisad. E-masmaladi ega bormomar senonidaed. Geb e-nan e-abin olivo-gwallu bormogi bar-daed.

⁶Bela bormomargi olivo-gwallu engusgu, omegwa e-machi-wargwenga sogded: —Bormo-baid anga seda. E-Machi, abin-sogded: —Bormomar, bela. Agine, olivo-gwallu yog-galegar naded.

⁷Geb degine, omegwa, Bab-Dummad-e-dulese naded, geb ega ibmar-gusad sogsad. Agi, Eliseo ega sogded: —Emisgindi be nae, olivo-gwallu manigi be uknae. Geb dulegi-mani-ganikid be bennuko. Mani-gwabguoedgi bemar nabir gudii gumaloed. Eliseo, ome-Sunemʼginedbo

⁸Ibagwengine, Eliseo Sunem-neggweburgi nadapgu, ome-nue-nuga-nika-maid egi alamaknai gusad, ese mas-gunnee dagoye. Degisoggu, Eliseo a-neggweburgi nadapile, agi mas-gundapdaed.

⁹Degidgi, omegwa e-suiga sokalid: “An wisid, we-dule anmarse nanaed-iliba-nonidaedi, we, Bab-Dummad-e-dule-swilidikidid.

¹⁰Anmar ega neg-aila-birgi gabedneg sobmalo. Agine, anmar ega e-meged omesmalo. Anmar ega mese-sioed, gana, degine, gwallu ega sibaloed. Adi, anmarse nanaed-iliba, agi megega.”

¹¹Ibagwengi, Eliseo nadapgu, a-ome-negse dogdapid. Bia ega obunnoged-neg-sobsamala, agi Eliseo gabisad.

¹²Eliseo, e-mai-Gieziʼga sogded: —Ome-Sunam-neggweburginedse be gorna. Geb e-mai, omegwase gorapid. Geb omegwa Eliseoʼse nonikid.

¹³Agine, Eliseo, Gieziʼga sogded: —Omega be soge: ‘Be anmarga bela-bela be alamakdiid. ¿Ibu bega wis imakbi be an-abemoga? ¿An bega rey-ebo sunmaknabi be abege, igi, sordamar-bila-onomalad-e-dummad-ebodibe?’ Omegwa abin-sogded: —An-dulemar-abargi an nueganbi gudiid, bonisulid.

¹⁴Eliseo, Gieziʼse egichialid: —¿Degite, an ibu ega imaksunnoe? Giezi abin-sogded: —Ome mimmigan sulid, ar e-sui bato seredgusad.

¹⁵Eliseo sogded: —Ese be gorna. Geb Giezi omegwase gorapid. Degi, omegwa, yawagak-naba gwisgunonikid.

¹⁶Eliseo omega sogded: —We-birga-danikidgi, degi, we-ibaginbali be-nukugi be-mimmi be gani guoed. Ome, Eliseo-abin sogded: —Dogdar-itole. Bedi Bab-Dummad-e-duled. Mer angi be dodoge.

¹⁷Degidgine, ome gurgin-nika gunonikid. Geb birga-nasadgine, ega-iba-soglesadgi ome mimmi baknonikid. Ar igi Eliseo ega sogsagusa, deyob gusad.

¹⁸Degi, machi-bipi dungualid. Geb ibagwengine, machi-bipi e-bab daknaded. E-babde, dulemar-ibmar-gwag-wemalad-abargi-gunaimogad.

¹⁹Agine, ukiagwale susugwa binnasuli goralid: —¡Aaa! ¡An nono-nunmake! Geb e-bab dule-ega-arbaedga sogded: —¡E-nanse be sede!

²⁰Dule, machi-bipi-gadebin imaksad. Geb, e-nanse sesad. E-nana e-nukugi e-machi-bipi-ganigusad. Deyob-gani, yorukudse machi-bipi burgwisad.

²¹Geb degi, e-nan, Bab-Dummad-e-dule-gabednegse sesad. Agi, e-gabed-maidgi omesisad. Geb yawagak-edis alid.

²²Geb agine, e-suise goted: —Mai-wargwen be anga barmidage. Degi, moli-uayasuid-ome be anga barmidabalo. Bin gwae Bab-Dummad-e-dule an daknagwelo. Emisgwa an nonibaloed.

²³E-sui ega sogded: —¿Ibiga be daknae? Yoo nii-binid gwisgued, obunnoged-ibasurbalid. E-ome e-suiga sogded: —Akarsuli.

²⁴Degi, moli-uayasuid-ome-birgi omega gan sismalad. Geb ome e-maiga sogded: —Ogus. Nae. Mer igarba be anga obunnogo. An bega sogedse, be obunnogo.

²⁵Geb omegwa Bab-Dummad-e-dule-maidse nadsunnad. Carmelo-yarse mosgu, Eliseo bannabaa omegwa-dani daksad. Geb e-mai-Gieziʼga sogded: —Ome-Sunam-neggweburgined dani.

²⁶Gwae be abin-nae, be abarmakde. Ega be sogo, be nued-sogeye, degi, be-sui, be-mimmi nueganbimarmo sogeye. Degi, geb e-mai naded. Giezi omega ibmar-sogsagu, omegwa ega sogded: —Anmar bela nueganbi.

²⁷Degine, omegwa, yar-birse Bab-Dummad-e-dule-siidse modapgu, e-naggi angaagwar nagusad. Geb Giezi, Eliseoʼgi omegwa-obangubi-gualinad. Degi-inigwele, Eliseo ega sogded: —Mer ese achao, ar bela-belad nue-bukib-binsaed. Bab-Jehová amba anga yoo soged, we-omede igi-nue-itoge.

²⁸Geb, omegwa Eliseoʼga sogded: —Dummad, ¿an mimmi-abeye an bega sogsasi? ¿An bega sogsasursi, mer be angi dodoye?

²⁹Degidgi, Eliseo, Gieziʼga sogded: —Mor-nudak nue-yoo, nae. An-gaapoled be sedo. Igarba be dule abinguardibe, mer ese be golo. E bese gollalile, mer bedi ese golo. Be neg-mosale, machi-bipi-e-wagargi be, an-gaapoled omeso.

³⁰Geb machi-bipi-e-nan, Eliseoʼga sogded: —Napira Bab-Jehová-nuggi, an bega sogo: Bab-Jehová beba gudisoggu, walagwen an be-obegosuli. Degisoggu, Eliseo omegwaba nadsunnad.

³¹Gieziʼdi, bato amar-idu negse mosad. Geb Giezi machi-bipi-e-wagargi, gaapoled omesisad. Degi-inigwele, machi-bipi gwen gigli-gigli gussulid. Degidgine, Giezi gannar Eliseoʼse alid. Geb Giezi, Eliseoʼga sogded: —Amba machi-bipi ataksulid.

³²Eliseo, negse mosgua, e-megedgi machi-bipi burgwar-mai dakdapid.

³³Geb Eliseo, machi-bipi-maidse dogsad. Yawagak edus-imaksad, degi, Bab-Jehováʼse-goted.

³⁴Bab-Jehováʼse-gochad-sorba, Eliseo, machi-bipi-birgi megisad. Eliseo machi-bipi-e-gayagi, e-gaya nasiksad, degi, e-ibya-innik egi ataksabalid, degine, machi-bipi-e-argangi e-argan-mesisbalid. Degidgine, machi-bipi durgualid.

³⁵Geb degine, Eliseo, gwisgusad. Negyaba, bire-bire gudii gusad. A-sorba, gannar Eliseo machi-bipi-birgi megisad. Agine, machi-bipi asmialid, ilagugle (7) asmisad. Geb agi, atakalid.

³⁶Geb, Eliseo, Gieziʼse goted, ega sogded: —Ome-Sunam-neggweburginedse be gornae. Degi, Giezi omegwase gorapid. Omegwa Eliseoʼse nonigu, Eliseo ega sogded: —Be-mimmi be sue.

³⁷Omegwa dogdeyalaba, Eliseo-mali-naba, yokorgi-sindigar e-wagar-napase-ebulegedse, signonikid. A-sorba, omegwa e-mimmi-susa nodsunnad. Eliseo mas-nabir-gulle imaksad

³⁸Eliseo Gilgal-neggweburse gannar nonikid. A-ibagangine, a-yargi ukud-dummad naid. Bab-Dummad-gayaburba-barsogmalad-baigan Eliseo-walik bukmalad. Agine, Eliseo e-maiga sogded: “Soo-yagi bormo-dummad be onakwe. Bab-Dummad-gayaburba-barsogmaladga mas-nuesaar be imako.”

³⁹Bab-Dummad-gayaburba-barsoged-gwensak, gagan-nabir-gullemalad aminaded. Degi, nadapidgi sapi-senigwa gwichi dakalid, geb e-san nabayob-dakleged gwane-gwane imaksad, e-suba enguedse. Nonigu, olo-olo imaksad, geb mas-nuesaar-imaklenaid-yagi obatisad. Degi-inigwele, ar wissulid, wede ibua.

⁴⁰Mas-akwigusgu, Bab-Dummad-gayaburba-barsogmaladga mas welesad. Mas-gutemargu, binnasuli gollarmalad: —¡Bab-Dummad-e-duleye, we-mas ina-nusubi! Agi, bar-guchasurmalad.

⁴¹Geb degi, Eliseo sokalid: —Madubur anga sedamar. Geb mas-yagine, Eliseo madubur obatisad. A-sorba, Eliseo sogded: —Emisgi, gwenadganga mas-wee. Geb, mas-yagine ina-nusu-nikad surgusad, bar mas ina-nusubi guchasurmalad. Eliseo dulemar masgi oguchad

⁴²Dule-wargwen, Baal-Salisaʼgined nonikid. A-dule Bab-Dummad-e-dulega ibmar-gwag-gebe-welesad senonikid. Cebada-madu gwadurgwen (20) senonikid, degine, orosgi-dakleged-trigoʼye-nugad gebe-welesad, senonibalid. Geb Eliseo e-maiga sogded: —Gwenadganga mas mimie.

⁴³E-mai abin-sogded: —¿Wede unniosi, dulemar-dulataledga (100) an mimier? Degi, Eliseo, e-mai-abin sogded: —Gwenadganga mas mimie. Ar weyob Bab-Jehová soged: ‘Mas gunmaloed, degi, amba gwabguoed.’

⁴⁴Degisoggu, Eliseo-e-mai na mas mimissunnad. Igi Bab-Jehová, Eliseoʼga sogsa gusa deyobi gunonikid. Bela dulemar mas-guchagu, amba mas gwabgusad.