Read San Blas Kuna 2 Reyes 9 Bible Online

2 Reyes 9 - San Blas Kuna bible

2 Reyes 9

¹Ibagwengi, Bab-Dummad-gayaburba-barsoged-Eliseo, Bab-Dummad-gayaburba-barsoged-wargwense gochad, ega sogded: “Ramot-De-Galaad-neggweburse-naega guakwao. We-olivo-gwallu be sedo.

²Be ase modapile, Nimsi-e-wagwa Josafat-machi-Jehú, be dakdagoed. Degi, ese be nao, e-sordamar-idu be sedo, gabedneg-baidse be nido.

³Geb, olivo-gwallu be suo, e-nonogi be eogo, degi, ega be sogo: ‘Bab-Jehová weyob sogye: An Israel-e-reyga be-nug-imakye. A-sorbali, yawagak be egao, geb gwae be abarmakdo.’ ”

⁴Degisoggu, Bab-Dummad-gayaburba-barsoged Ramot-De-Galaad-neggweburse nadsunnad.

⁵Degi, ase mosgu, dakdapid, bila-onomalad-e-dummagan danar-bukwa, geb amarga sogded: —Dummadga an bega gayaburba an sedani. Geb Jehú ega sogded: —¿Degite, biti-dummadga be sedaniki? Geb, Bab-Dummad-gayaburba-barsoged ega sogded: —Dummad, begala.

⁶Geb Jehú gwichibin imaksad, ebo negyaba dogded. Degi, Bab-Dummad-gayaburba-barsoged Jehú-nonogi olivo-gwallu eosad. Agine, geb ega sogded: “Bab-Jehová, Israel-dulemar-e-Bab-Dummad, weyob soged: ‘Emi, an Israel-dulemar-e-reyga an be-nug-imaked.

⁷Be-dummad-Acab-e-wagan, bela be obelogoed. An deyobi, an-maigan an-gayaburba-barsogmalad, Jezabelʼse, ablis-ariosad buged an imako. Degi, bela an-maigan-abe-milesad, buged an imakoed.

⁸Bela Acab-masmala obelolegoed, degi, Israel-yargi e-wagan-gudidimalad obelolebaloed, Acab-maiganga-gudiid, igi, maiga-gudisurdibe bela obelolebaloed.

⁹Igi Nabat-machi-Jeroboam-e-wagan, degi, Ahías-machi-Baasa-e-wagan an imaksa, deyobi Acab-wagan an imakmogoed.

¹⁰Degi, Jezabel-muidi achumar Jezreel-nainugi gunnoed, dule gwen e-mui digosulid.’ ” Geb a-sorbali, Bab-Dummad-gayaburba-barsoged yawagak egasad, geb gwae abarmakded.

¹¹Jehú gannar e-sorda-bila-onomalad-dummaganse nonigu, ega e-sordamar sokalid: —¿Ibi be itoge? ¿Ibiga we-dule be-dakdii? Jehú ega sogded: —Ar bemar mag-daked, be wismalad igi we-dule sunmakdae.

¹²Geb e-sordamar ega sogded: —Binsa be gordii. Nue be anmarga soge. Jehú sogded: —Anga weyob soged: ‘Bab-Jehová weyob sogye: Emi, an Israel-dulemar-e-reyga an be nug-imaksaye.’

¹³Geb deyob soge-itosmargu, bela Jehú-nag-urba mor ogitemalad. Agine, gar-trompeta ogotemalad, degi, oimakdemalad, sogdemalad: “Rey-Jehú-nug odummomar.” Jehú, Joram-oburgwisad

¹⁴Degidgine, Nimsi-wagwa Josafat-machi-Jehú, Joram-oburgwedgi binsaalid. Joramʼdi, Israel-sordamarmala, Ramot-De-Galaad-neggwebur-bendaknai gusad, deunni, Siria-rey-Hazael Ramot-De-Galaad-neggweburgi gwisgunai gusgu.

¹⁵Degi-inigwele, Rey-Joram Siria-sordamargi bila-ononaigu, naibigusad-nudakega, Jezreel-neggweburse gannar noni gusad. Degisoggu, Jehú e-sordamarga sogded: “Bemar reyga an-omesbimalale, melle dulemar Jezreel-neggweburse gayaburba-berbenaega be onomalo.”

¹⁶Geb degine, Jehú bila-onoged-urgi Jezreel-neggweburse Joram-nailikgumaidse naded. Deunni, Judá-dulemar-e-rey-Ocozías Jezreel-neggweburse Joram-dakdimogad.

¹⁷Dule-nakuleged, Jezreel-neggweburgi nakuleged-neg-siid-niba nakulesigu, dakalid, Jehú-sorda-bila-onomalad daniki, geb binnasuli goted: —¡Sorda-bila-onomalad anmargi dani! Geb Joram sogded: —Sorda-moligi-sii-urwed-wargwen barmido, sorda-bila-onomalad-danikid-abin naega, ese egisega: ‘Bemar nuedgi-danimar sogeye.’

¹⁸Degi, sorda-moligi-sii-urwed, Jehú-abin naded. Mosgu, ese egichided: —Rey wisgubied: ‘Bemar nuedgi-danimar sogeye.’ Geb Jehú abin-sogded: —¿Ibiga be wisgubisunna? Wedi be-igarsulid. Anba be dage. Dule-neg-niba-nakulesiid sogded: —Gayaburba-berbeged bato mosad. Degi-inigwele, gwen gannar bar-dani an daksulid.

¹⁹Geb degine, rey sorda-moligi-sii-urwed-baid barmisbalid. Geb amar-bukwadse omosgu, Jehúʼse egichided: —Rey wisgubied: ‘Bemarde nuedgi-danimar sogeye.’ Jehú abin-sogded: —¿Ibiga be wisgubisunna? Wedi be-igarsulid. Anba be dage.

²⁰Dule-neg-niba-nakulesiid gannar sogdebalid: —Gayaburba-berbeged bato mosad. Degi-inigwele, gwen gannar bar-dani an daksurbalid. An dakedi, Nimsi-wagwa-Jehú, moli-ur-sedani an dakdo, ar ade, gwae-gwae danikid.

²¹Geb Joram sogded: —An-moli-ur-bila-onoged guakwaa anga nasikmalo. Bela e-moli-ur ega guakwaa nasismargu, Israel-e-rey-Joram, Judá-e-rey-Ocozíasʼbo, e-moli-ur-e-moli-urgi, Jehú-abin nadmalad. Geb dule-Jezreel-neggweburgined Nabotʼye-nugad-e-nainugi Jehú-abingunonimalad.

²²Joram, Jehú-dakargu ese egichided: —Jehú, ¿be nuedgi-daniki? Jehú abin-sogded: —¿Igi an nuedgi-danikosunna? Emide, be-nan-Jezabel ibmar-sobarmalad-bab-dummadyob-imakleged e-bab-dummadga imakdiid, ina-isganamar imakdibalid.

²³Joram deyob ega-soge-itosgu, Jehúʼgi-wakinnega gannar yog-birar-imaksad, binnasuli Ocozíasʼse goted: —¡Ocozías, anmar ese yamolesa!

²⁴Degi-inigwele, Jehúʼdi, idu warsi-gachii-ganisoggu, Joramʼgi sigu yog-miar-imaksad, geb yarganba egi gwisgudapid, e-gwagegi yoledapid. Geb, Joram e-moli-ur-yagi aimukuded.

²⁵Geb Jehú, e-bendaked-Bidcarʼga sogded: —Odege. Jezreel-neggweburgined-Nabot-e-nainugi be meto. Be ebinsae, deun be anbo anmar e-bab-Acabʼba moli-ur-semaigusgu, Bab-Jehová we-dulegi weyob ibmar-guoye sogsa gusad:

²⁶‘Ani an Bab-Jehová-guedgi sogye: Saegidbali, wegi Nabot-e-ablis, degi, e-masmala-e-ablis an daksad. Degisoggu, napira an soged, be emar-oburgwisad-ulale, we-nainugi buged-mai an be-imakoed. Degisoggu, Joram-e-mui be odege, Nabot-e-nainugi be mete, igi Bab-Dummad-sogsagusa, deyob guegar.’ Jehú, Ocozías-oburgwisad

²⁷Judá-e-rey-Ocozías, deyob daksagu, Bet-Hagán-igarba wakited. Degi-inigwele, Jehú balegitegu, e-sordamarga sogded: —Bemar, we-dule moli-urgi-nadapid oburgwemarbalo. Degi, Ibleam-neggweburmobin, Gur-yar-mullu-nakwemaidgi Ocozías-naibi-imaksamalad. Degi-inigwele, Ocozías nabir Meguido-neggweburse wakichad. Geb agi burgwedapid.

²⁸Agine, ega-arbamalad moli-urgi e-mui Jerusalén-neggweburse sesmalad. Geb agi David-neggweburgi e-dadgan-neg-uan-maidgi digsamalad.

²⁹Dakargu, Acab-machi-Joram, birgambe-gakagwensakgus (11) Israel-yargi-negsemaidgi, Ocozías Judá-yargi negsear gusad. Jezabel-burgwisad

³⁰Geb a-sorbali, Jehú Jezreel-neggweburse naded. Jezabel degii-wisguargu, Jehú-iduar ibya-sigamar magsad, nue-gwiar imaksad, geb yawagak-senigwadba atakded.

³¹Jehú neggwebur-yawagak-dogedgi dogdanigu, Jezabel ese goted: —Anna, ¿bede nueganbi? Bedi Zimriʼyobidid. Be-dummad-gindakedid.

³²Geb Jehú yawagak-bipi-siidsik atakdegu, sogded: —¿Doa anba nai? Geb agi, reyneggi dule-maiga-gudimalad warbo, warbaadibe, Jehúʼsik yawagak-bipigwadba atakarmalad.

³³Geb Jehú amarga sogded: —Bemar, Jezabel-egwanmar. Geb, napase egwachamalad. Argwachagu, bela e-ablis galugi, degi, molimargi milesad. Geb molimar Jezabel-birgi dii-dii-annasmalad.

³⁴Agine, Jehú mas-gunnega, degi, gobega sigisad. Geb bergusgu, igar-uksad: —Emisgi, we-ome-isgana-e-mui be sedmar, degi, be digmalo, ar ade, we-ome, rey-e-sisgwad.

³⁵Degi, Jezabel-e-mui-digega nadmargu, e-mui amissurmalad, unnila e-nono-gar, e-mali-gar, degi, e-sakwa-garbi amismalad.

³⁶Degisoggu, gannar Jehúʼse nonimalad, bela ega sognonimalad, geb Jehú amarga sogded: —Bab-Dummad we-gayaburba bato e-mai-Elías-Tisbeʼginedba weyob sogsa gusad: ‘Jezreel-nainugi achumar Jezabel-e-mui gunnoye.’

³⁷Jezabel-e-mui, ibmar-durgan-saa-miledeyob, Jezreel-nainugi miledoye, gwen dule binsaosurye, wede, Jezabel-an-dakye.