Read San Blas Kuna 1 Crónicas 24 Bible Online

1 Crónicas 24 - San Blas Kuna bible

1 Crónicas 24

¹Weyobi, Aarón-e-masmala danar-danar mimilesmarmogad.Aarón-e-masmala, wemalad: Nadab, Abiú, Eleazar, Itamar.

²Nadab, Abiúʼbogwa, mimmigan-nikussurgusmalad. Deginbali, e-bab-idu burgwismarbalid. Degisoggu, Eleazar, Itamar-ebo, Bab-Dummadse-dule-irwa-goledga arbadmalad.

³Degine, David, Eleazar-e-wagwa-Sadoc-nugadmala, degine, Itamar-e-wagwa-Ahimelec-nugadmala, dule-irwa-Bab-Dummadse-gormalad nuekwaa arbamalagala, ega e-arbaed-ibagan ilemakar mesisad.

⁴Dule-idumalad Eleazar-e-wagan-abargi, Itamar-e-waganba bur merbaasoggu, weyob mimilesad:Eleazar-wagan-dule-idumalad, warambe-gakanergwa ambikusad (16).Itamar-wagan-dule-idumaladdi, walabaabak (8) ambikusmarmogad.

⁵Sordamar, wachi-wachiba-arbamalaga danar-danar mimilesad. Weyob-mimilesadi ibmargi-wilubdaklegar imaklesad. Degisoggu, Bab-Dummadse-goled-neg-yagi, Bab-Dummadga-arbamalad-e-dummagan, Eleazar-waganmar-abargi, degi, Itamar-waganmar-abargi deyob gudidii nanamalad.

⁶Degine, Levita-dule-Natanael-machi-Semaías, we-dulemar-wagab, nugmar gardagi-narmakar mesisad: Rey-wagab, dummagan-wagab, dule-irwa-Bab-Dummadse-goled-Sadoc-wagab, Abiatar-machi-Ahimelec-wagab, dule-irwa-Bab-Dummadse-gormalad-e-dummagan-wagab, Levita-dulemar-wagab.Eleazar-e-gwenadganga wachi-wachiba-arbamalaga ilabo-wilub uklesad, degi, Itamar-e-gwenadgangardina, ilagwen-wilub uklesad.Weyob sulenonimalad:

⁷Gebe-suleargua, Joiarib sulenonikid. Ilabogi, Jedaías sulenonikid.

⁸Irbaagi, Harim sulenonikid. Irbakegi, Seorim sulenonikid.

⁹Ilatargi, Malquías sulenonikid. Ilanergwagi (6), Mijamín sulenonikid.

¹⁰Ilaguglegi (7), Cos sulenonikid. Ilabaabakgi (8), Abías sulenonikid.

¹¹Ilabakebakgi (9), Jesúa sulenonikid. Irambegi (10), Secanías sulenonikid.

¹²Irambe-gakagwensakgi (11), Eliasib sulenonikid. Irambe-gakabogi (12), Jaquim sulenonikid.

¹³Irambe-gakapaagi (13), Hupa sulenonikid. Irambe-gakabakegi (14), Jesebeab sulenonikid.

¹⁴Irambe-gakatargi (15), Bilga sulenonikid. Irambe-gakanergwagi (16), Imer sulenonikid.

¹⁵Irambe-gakaguglegi (17), Hezir sulenonikid. Irambe-gakabaabakgi (18), Afses sulenonikid.

¹⁶Irambe-gakabakebakgi (19), Petaías sulenonikid. Ila-dulagwengi (20), Hezequiel sulenonikid.

¹⁷Ila-dulagwen-gakagwensakgi (21), Jaquín sulenonikid. Ila-dulagwen-gakabogi (22), Gamul sulenonikid.

¹⁸Ila-dulagwen-gakapaagi (23), Delaía sulenonikid. Ila-dulagwen-gakabakegi (24), Maazías sulenonikid.

¹⁹Wachi-wachiba Bab-Jehováʼse-goled-negyaba arbamalaga, weyob ilemakar-ambikulesmalad. Igi Israel-e-Bab-Dummad e-dad-Aarónʼba igar-uksagusa, deyob imaksamalad. Leví-wagan-baigan

²⁰Leví-wagan-baigan-gudidimalad, wachi-wachiba-arbaega-sulesmarmogad, wemalad: Amram-e-wagansik, Subael. Subael-e-wagansik, Jehedías.

²¹Rehabías-e-wagansik, e-machi-sailagined-Isías.

²²Izhar-e-wagansik, Selomot. Selomot e-wagansik, Jahat.

²³Hebrón-e-masmaladi, wemalad: Jerías, machi-sailagined. Jerías-yarbalid, Amarías. Amarías-yarbalid, Jahaziel. Jahaziel-yarbalid, Jecamán.

²⁴Uziel-e-machi, wedid: Micaía. Micaía-e-machidi, Samir.

²⁵Micaía-e-urba, Isías. Isías-e-wagansik, Zacarías.

²⁶Merari-wagansik, wemalad: Mahli, Musi. Jaazías-machi-Beno.

²⁷Merari-wagansik, e-machi-Jaazíasʼgi danimalad, wemalad: Beno, Soham, Zacur, Ibri.

²⁸Mahli-machi-Eleazar. Eleazarʼdi, machimala-nikussur gusad.

²⁹Quis-e-machi, Jerameel.

³⁰Musi-e-masmala, wemalad: Mahli, Edar, Jerimot.Wemar, Levita-dulemar e-wagan-e-waganba ambikusmalad.

³¹Wemar, e-gwenadgan-Aarón-waganyob ibmargi-wilubdaklegar, we-dulemar-asabin mimilesmarmogad: Rey-David-asabin, Sadoc-asabin, Ahimelec-asabin, dule-irwa-Bab-Dummadse-gormalad-e-dummagan-asabin, degi, Levita-dulemar-asabin mimilesmalad. Ia-dummagan-e-gwenadgana, e-urbamar-e-gwenadganyob na yopira imaklesmalad.