Read San Blas Kuna 2 Crónicas 11 Bible Online

2 Crónicas 11 - San Blas Kuna bible

2 Crónicas 11

¹Roboam, Jerusalén-neggweburse modapgu, Judá-sordamala, degi, Benjamín-sordamala mili-dulabakebak (180,000) bila-onomaladga-sulesadi oambikusad. Adi, Israel-sordamargi bila-onogega, Jeroboamʼgi gannar yar-suegar.

²Degi-inigwele, Bab-Jehová, e-dule-Semaíasʼga sognonikid:

³“Judá-dulemar-e-rey Salomón-machi-Roboamʼga, degi, Israel-dulemar-Judáʼginmaladga, degine, Benjamín-wagan be sogo:

⁴Bab-Jehová weyob soged: ‘Mer be-gwenadgangi be bila-ononamalo. Degisoggu, gannar e-neg-e-negse namar, ar ade, an-sogedba an imaksad.’ ” Deyob-Bab-Jehová-soge-itosmargua, Roboam-sordamar gannar bilismalad, bar Jeroboamʼgi bila-onoapsurmalad. 3. DAVID-E-WAGAN REYGA-MEGISMALAD (11:5–36:23) Roboam Judá-neggweburmar ogannos-gusad

⁵Roboam Jerusalén-neggweburgi megisad, degi, Judá-yar-bendakegala, neggweburmar-gandikid sobsa gusad.

⁶Neggweburmar-ogannolesmalad-sobsadi, wemardo: Belén, Etam, Tecoa,

⁷Bet-Sur, Soco, Adulam,

⁸Gat, Maresa, Zif,

⁹Adoraim, Laquis, Azeca,

¹⁰Zora, Ajalón, degi, Hebrón. We-neggweburmar-gandik-sobsagusadi, Judá-yargi, degi, Benjamín-yargi bukwamalad.

¹¹Roboam neggweburmar-gandik-bukwad napi ogannosbalid. A-neggweburmargi, sordamar-e-dummagan urbisad. Deginbali, masgullemalad, olivo-gwallu, degi, vino, sabolemalaga, agi urbisbalid.

¹²Degi, sigu-abingamalad, degi, ilawar-swiswidikmalad, neggwebur-iliba oambikusbalid. A-ibmar, bela-bela omelosad. Degisoggu, Judá-dulamar, Benjamín-dulamar Roboam-sogedba ibmar-imakbukwagusmalad.

¹³Dule-irwa-Bab-Dummadse-gormalad, degi, Levita-dulemar, bela Israel-yargi-bukwamaladi, Roboamʼba-naguega nonimalad.

¹⁴Ar Jeroboam, degi, e-masmala, Levita-dulemar-ibe Bab-Jehová-igargi-arbaed osulosad. Agala, Levita-dulemar moli-gagan-omaed-nainugan-mete armarsunnad. Degine, Judá-yarse-naega, degi, Jerusalén-neggweburse-naega, e-ibmarse-bakale, metemarbalid.

¹⁵A-ulale, Jeroboam aila-matusulidgi niamarse golega, degi, moli-bebe-nikad-burwigana-sobaledse gollebaliga, na egad dule-bab-dummadse-gormalad nug-imaksad.

¹⁶Geb Israel-dadgan-warambe-gakabogwad-abargi (12), Israel-dulemar e-Bab-Dummad-Jehováʼba napiragwadba-nanaidi, e-babgan-e-Bab-Dummad-Jehováʼga ibmar-ogumakar-ukega, bela Levita-dulemarba Jerusalén-neggweburse, Bab-Dummadse-goled-negse nadmarmogad.

¹⁷Deyobi, we-dulemar birgapaa Salomón-machi-Rey-Roboam-ogannodii gusmalad, degii Judá-yar-dakmaid ogannosmalad. Ar ade, birgapaa, David-igarba, degi, Salomón-igarba nanadii gusmalad. Roboam-e-omegan mimmigan-nikusad

¹⁸Roboam, Jerimot-sisgwa-Mahalat nikusad. Jerimotʼde, David-e-machid. Mahalat-e-nandi Abihailʼye-nugad. Abihailʼde, Eliab-sisgwad, Isaí-e-wagwad.

¹⁹Mahalat-e-machimala, wemalad: Jeús, Semarías, Zaham.

²⁰Geb degi, Roboam, Absalón-e-sisgwa Maacaʼye-nugad nikusbalid.Maaca-machimala-gwalulesadi, wemalad: Abías, Atai, Ziza, degi, Selomit.

²¹Roboam e-omegan-baiganba, degi, e-ome-dikarmarbalidba e-ome-Maaca-bur bule-sabgusad. Degine, Roboam omegan warambe-gakabaabak (18) nikusad, degi, omegan-dikarbalid waladulapaa (60) nikusbalid.Roboam mimmigan-nikusad: Masmala, waladulagwen-gakabaabak (28), degi, bunamala, waladulapaa (60) nikusad.

²²Geb degi, Roboam, e-ome-Maacaʼsikid-e-machi-Abías e-gwenadgan-e-dummadga nug-imaksad. Ar ade, Roboam, Abías reyga-mesoye egi binsasad.

²³Roboam binsaed-nue-nikaa ibmar-imaksad. Roboam neggwebur-iliba e-masmala mesisnaed, Judá-neggweburmargi, degi, Benjamín-neggweburmargi, degi, negmar-gandik-bukwa-nanaedgi bela e-masmala-mesis-nabalid. Geb mas-bukidar onimai gusbalid, degi, e-masmalaga omegan-bukidar uksabalid.