Read San Blas Kuna 2 Crónicas 18 Bible Online

2 Crónicas 18 - San Blas Kuna bible

2 Crónicas 18

¹Josafat ibmar-nuegan-bukidar nikusad, degi, nug-dummarba megisad. Josafat, Rey-Acab-e-sisgwa-nikunonikidba Acabʼba nagunonikid.

²Geb degine, birgamar-nasad-sorba, Josafat, Samaria-neggweburse Acab-daknad gusad. Agi, Acab, Josafatʼga, degi, e-bardakmaladga sibad-wawaad-bukidar, degi, moli-bebe-nikad-bukidar oburgwisad. Agine, Acab, Josafat-binsaed gasad, eba Ramot-De-Galaad-neggweburse bila-ononaegar.

³Degi, Israel-rey-Acab, Judá-rey-Josafatʼse egichided: —¿An Ramot-De-Galaadʼse bila-ononaye-sogele, be anba nadmogale? Josafat, Acab-abin sogded: —An guakwagwa, degi, an-sordamar guakwamogad. Anmar beba bila-ononamarmogoed.

⁴Degi-inigwele, anmar naoed-iduale, bin be Bab-Jehováʼse-idakgwerdo.

⁵Degisoggu, Israel-rey-Acab, Bab-Dummad-gayaburba-barsogmalad-dulataled-ilabake-merguedse (400) gochad, geb ese egichided: —¿Anmar Ramot-De-Galaadʼse bila-ononaoe, ononaosuli? Bab-Dummad-gayaburba-barsogmalad Acab-abin sogdemalad: —Be bila-ononae. Ar ade, Bab-Dummad bega amar-urmakoed.

⁶Degi-inigwele, Josafatʼdi, sogded: —¿Bab-Jehová-gayaburba-barsoged-baid wegi gudisuli? Adi, anmar ase idakbaligar.

⁷Israel-e-rey, Josafat-abin sogded: —Wegi, dule-wargwen amba gudiid. A-dule, Bab-Jehováʼse sunna anmarga idaked. Degi-inigwele, we-dule an-isdaradid, ar anga igar-nued gwen sogdasulid. Ibmar-isganabi anga sogdaed. We-dule, Micaíasʼdo, Imla-e-machi. Rey-Josafat, Rey-Acab-abin sogded: —Melle deyob be soge.

⁸Degidgine, Israel-e-rey e-sorda-dummad-wargwense-gocha ega sogded: —Imla-machi-Micaías anga nidago.

⁹Israel-e-rey, degi, Judá-rey-Josafat, Samaria-neggwebur-dogedgi e-rey-ganmargi na simalad, deginbali, e-reymor-yoi-yoi simarbalid. A-reymar-ebogwad-asabinni, Bab-Dummad-gayaburba-barsogmaladi, Bab-igar-barsognanai guarmalad.

¹⁰Degi, Quenaana-machi-Sedequías, moli-bebeyob esgoro sobsad. Sedequías sogded: —Weyob Bab-Jehová soged: ‘We-moli-bebeyobidgine, bemar Siria-sordamar-obelogedse imakoye.’

¹¹Bela Bab-Dummad-gayaburba-barsogmalad weyob sogbukmarmogad: —Ramot-De-Galaadʼse be bila-ononae, ar ade Bab-Jehová a-dulemargi nakwega bemar-imakoed.

¹²Geb degine, dule Micaíasʼse-gorapid, Micaíasʼga sogded: —Micaías, be dakena. Bela Bab-Dummad-gayaburba-barsogmalad balibi reyga ibmar-nueganbi sognonimalad. Degisoggu, amar-sogeyob be ibmar-nueganbi an sogbi be-abemogo.

¹³Geb degine, Micaías sogded: —Bab-Jehová-Dula-Maid-nuggi inniki an bega sogdo, a-anga-ibmar-sogoedba, an reyga ibmar sogmogoed. Geb degi, Micaías reyse nadsunnad.

¹⁴Rey geb ega sogded: —Micaías, ¿Anmar Ramot-De-Galaadʼse bila-ononaoe, ononaosuli? Micaías abin-sogded: —Ar be namardo. Ar Bab-Dummad be-bendakmalosoggu, be nakwemaloed.

¹⁵Rey ega sogded: —Ar ilabigwa-wilub an bega ise-sogar saergebe, be anga nue-napira ise-sogar Bab-Jehová-nuggi be imakye.

¹⁶Agine, Micaías abin-sogded: —Bela Israel-dulemar yar-imbaba duurmakmamai an daksad. Igi sibad-wawaad, e-akwedsuli yogasaar gudidae, deyobi Israel-dulemar gudidinanaed. Degi, Bab-Jehová sogded: ‘We-dulemar dummad-sate gudidimalad. Degisoggu, nuedgi e-neg-e-negse namarsunno.’

¹⁷Israel-rey-Acab, Josafatʼga sogded: —¿Nue be daksa, igi an bega sogsa? We-dule ibmar-nued anga sogdasurye. Ibmar-isganabi anga sogdaed.

¹⁸Geb degine, Micaías sogdebalid: —Bab-Jehová-e-gayaburba nue be itomar: Bab-Jehová e-rey-gangi-sii an daksad. E-sordagan-nibarmalad e-argan-nuedsik-bukwa, degi, e-argan-sapiledsik-bukwa an daksabalid.

¹⁹Geb degi, Bab-Jehová amarse egichided: ‘¿Doa Israel-rey-Acab-e-binsaed-ganaoe, adi, Ramot-De-Galaadʼse bila-ononaega, agi Acab burgwega?’ ”Degi, burba-gwensak ibmar-sognaigualid, degi, baiddi akar sogdemogad.

²⁰Degidgine, burba-gwensak Bab-Jehová-asabin gwisgunonikid, ega sogded: ‘Ani an e-binsaed-ganaoe.’ ”Degi, Bab-Jehová ega sogded: ‘¿Igi be imakoe?’

²¹”Degi, burba abin-sogded: ‘An naogu, burba-gakansaedga an guodo. Bela-Bab-Dummad-gayaburba-barsogmalad-gakansaega an imakoed.’ ”Geb Bab-Jehová abin-sogded: ‘Deyob be imaknado. Be e-binsaed-gaoed.’

²²”A-ulale, emidi, Bab-Jehová, burba-gakansaed bela Bab-Dummad-gayaburba-barsogmalad-gakansaega imaksad. Ar ade, Bab-Jehová sogsad, be-obelogoye.”

²³Quenaana-machi-Sedequías, deyob-itosgua, Micaíasʼse nonikid, geb wagargi bibyosad, degi, ega sogded: —¿Igi be soge? ¿Bab-Dummad-Burba bar angi maisursunde? ¿Begarbi bega sunmaksaye be sogsunde?

²⁴Micaías abin-sogded: —We-ibmar an bega sogsad gunonikile, magar be itononikoed nue-nabir-dakleye. A-ibagi be dukudii gudoed.

²⁵Agi geb Israel-e-rey igar-ukded, weyob sogded: —Micaías be gamalo, saila-Amón-neggwebur-dakmaidse be sedmalo, degi, an-machi-Joásʼse be sedmarbalo.

²⁶Ega be sogmalo, rey wegii sogye: ‘Esgaryagi be Micaías-metoye. An nuedgi gannar aibiroedsega, unnila maduginbi be ogunmaloye, degi, diiginbi-ogobmarbaloye.’

²⁷Micaías sogded: —Ar gannar nued be aibilisale, degirdi, Bab-Jehová anga sunmaksasurdo. Degi, sogdebalid: —Bela an-ibmar-sogsad nue be ebinsamalo. Rey-Acab-burgwisad

²⁸Geb degine, Israel-e-rey, Judá-rey-Josafatʼbo, Ramot-De-Galaadʼse nadmarsunnad.

²⁹Degi, Israel-rey-Acab Josafatʼga sogded: —An-wagar-mer-daklegega mor-baid-yoi bila-onolenaidse an dogoed. Bedi reymor-yoi be dogoed. Degisoggu, Israel-e-rey baid-mor-yoi, bila-onolenaidse dogdesunnad.

³⁰Siria-e-reydi e-sorda-ur-napagined-dakmalad-dummaganga igar-uksad: “Unnila Israel-e-reybobi be urwemalo. Dule-bamaladsedi, mer be achamalo. Dule-dummaddibe, dule-yogasaleddibe, mer ese be achamalo.”

³¹Ur-napagined-dakmalad-dummagan Josafat-daksamargu, binsadmalad: “We, Israel-e-rey.” Degisoggu, Josafat-ebilis ambikusmalad, egi gwichigunonikid. Geb degi, Josafat Bab-Jehováʼse sabsur-gotegu, Bab-Jehová, Josafat-bendaknonikid. Bab-Dummad Siria-sordamar Josafatʼgi-banguega imaksad.

³²Ur-napagined-dakmalad-e-dummagan, Israel-e-reysuli Josafat-daksamargua, bar ese achassurmalad.

³³Degi-inigwele, sorda-gwensak yogasaar sigu-mechargu, Israel-e-reygi yolenonikid, e-urwed-mor-yoid-imbaba gwisgunonikid. Degi, Israel-rey-Acab dule-e-ur-napagined-seedga sogded: “Be aibire, neg-olloledsik be anga nae, bela-bela an nue-nailikgusad.”

³⁴A-ibagine, ululeged baligannos-naisoggu, Israel-e-rey e-ur-yagi gwisgussunnad. Deyob, Siria-sordamar-dakgwichi neg-osedosad. Dad-argwategu, Israel-e-rey-Acab burgwisad.