Read San Blas Kuna 2 Crónicas 4 Bible Online

2 Crónicas 4 - San Blas Kuna bible

2 Crónicas 4

¹Salomón ibmar-ogumakar-ukleged-aila esgoro-gordikidbi sobsabalid. E-suguedi, daliatar (5) sugued. E-matardungueddi, daliatar (5) madardungubalid. E-nibgueddi, dalibo-gaka-negabar nibgued.

²Dii-siged-dummad, esgoro-gordikid-sunnabi orokwaa sobsabalid. E-yaadungued, dalibo-gaka-negabar (2½) yaadungued. E-nibguedi, daligwen-gaka-bisgise (1¼) nibgued. E-gakuli-ebiraledi, daligugle-gaka-negabar (7½) ebiraled.

³Dii-siged-dummad-e-gakuli-urba, moli-bebe-nikad-machergan ilabo-ebiris sobar-sobar-nasiklesad, bisgigwen-bisgigwensakgi-bangue warambe-warambe (10-10) nasikles naed. Dii-siged-dummad esgoro-gordikid-diregwadgi-soblenaigu, yog-eba-soblegar gusad.

⁴Dii-siged-dummad, moli-bebe-nika-machergan-warambe-gakabogwad-birgi (12) sobar-siid. Moli-warbaa, dad-nakwed-argan-sapiledsik atakgwichid, warbaa, dad-argwanedsik atakgwisbalid, warbaa, dad-nakwed-argan-nuedsik atakgwisbalid, warbaa, dad-nakwedsik atakgwisbalid.We-molimar-warambe-gakabogwad-birgi (12) dii-siged-dummad siid. Moli e-nagmar-sorsikid dii-siged-urba dogar nanaid.

⁵Dii-siged-dummad argan-goo-walabake-wilub songued. E-gakuligi dutu-lirio sobaled, nog-dummadyobi sobaled. Dii-siged-dummadgi, galón-miliambe-gakagugle gaka dulataled-ilatar (17,500) dii siged.

⁶Rey-Salomón dii-simalad-senigana gwaambe (10) sobsabalid. Dad-nakwed-nuedsik gwaatar urbisad, geb sapiledsik gwaatar urbisbalid. Adi, ibmar-dula-oburgwilesale, we-diimargi ibmar-ebulemalad enuklegegar. Dii-siged-dummaddina, dule-irwa-Bab-Dummadse-gormalad e-argan-enukega siid.

⁷Salomón gwallu-simalad-orbiid warambe (10) ega-igar-maidba sobsabalid. Geb Bab-Dummadse-goled-negyaba e-galu-naba urbisad. Argan-nuedsik walatar urbisad, argan-sapiledsik walatar urbisbalid.

⁸Degidgi, mese gwaambe (10) sobsabalid. Geb Bab-Dummadse-goled-negyaba e-galu-naba gwaatar argan-nuedsik urbisad, geb gwaatar argan-sapiledsik urbisbalid. Deginbali, or-nog-abe-mimalad dulatale (100) sobsabalid.

⁹Salomón dule-irwa-Bab-Dummadse-gormaladga neg-imba sobsabalid, degi, neg-imba-dummad sobsabalid, degi, e-yawagak guar-guar sobsabalid. Geb neg-yawagak-uki esgoro-gordikid nasiksabalid.

¹⁰Degine, dii-siged-dummadi Babse-goled-neg-dad-nakwed-argan-nuedsik, Bab-neg-dikargi argan-nuedsik sisad.

¹¹Salomón bormomar sobsabalid, degi, buru-wemalad sobsabalid, degi, abe-mied-nog sobsabalid. Rey-Salomón igi Hiramʼga Bab-Dummadse-goled-neg soboye sogsa, deyopira, Hiram bela Bab-Dummadga-neg-sobnaid, ogusad.

¹²We-neg-soblesad, weyob soblesad:Buarmar-walabo soblesad. We-buarmar-e-nonomar dirbir soblesbalid.Degi, esgoro-gordikid-mor-saki-sakid matabo imaksabalid, buar-warbogwad-e-nonogi nasikegar.

¹³Esgoro-gordikid-mor-saki-sakid-matabogwadgi, guseb-dummadgi-dakleged ile-sogabo dulataled-ilabake (400) egi nanaid. A-matabogwad buar-nonomar-dirbiled-ebilis nanaid.

¹⁴Geb ibmar-ebulemalad-enuked, degi, ibmar-ebulemalad-enuked-e-siged soblesbalid.

¹⁵Dii-sied-dummad soblesbalid, molimar-bebe-nikad-machergan warambe-gakabo (12) dii-sied-dummad-bargaega sobar urbisbalid.

¹⁶A-uki, bormomar soblesbalid,degi, buru-wemalad soblesbalid,degi, wesar-ikomar-dummagan soblesbalid. We-ibmar-ebulemalad bela Hiram-Abi Bab-Jehováʼse-goled-negga Rey-Salomónʼga esgoro-gordikid-dakar-gaedgi sobsad.

¹⁷Hiram-Abi, Rey-Salomónʼga-bela-ibmar-sobsadi, Jordán-neba-ukub-naidgi soogi dusad. A-neg-ukub-naidi, neggwebur-Sucot, degi, Seredata-ebo abingunaidgi naid.

¹⁸Salomón belagwable we-ibmar-ebulemalad ichesur-imaksasoggu, esgoro-gordikid-aidikuedi wisgussulid.

¹⁹Deginbali, Salomón ibmar-ebulemalad-baigan Bab-Dummadse-goled-negga-soblesbalid, weyob sobsabalid:Ina-wawadik-ogumakar-ukleged-aila, bela orbi sobsad.Degi, mesemar, madu-Bab-Dummadga-mesmalad bela orbi sobsabalid.

²⁰Degi, gwallu-gaed-simalad, degi, gwallumar bela or-sunnabi sobsabalid. Adi, igar-soglesadba, Neg-Ise-Islidikid-asabin ogaegar.

²¹Dutumar-soblesadi,gwallumar-soblesbalidi, degi, maskemar-soblesadi, bela amba or-sunnabi sobles nanabalid.

²²Amba dislamar-gwallu-gwillodub-siked soblesbalid,abe-mied-nogmar soblesbalid, wesarmar,degi, sianarmar soblesbalid. We-ibmarmar, bela amba or-sunnabi soblesad.Deginbali, Bab-Dummadse-goled-neg-doged, ber or-sunnabi soblesbalid:Neg-Ise-Islidikidgi-doged-e-yawagakmar, bela or-sunnabi sobles nanabalid.Degi, Bab-Dummadse-goled-negga-gusiid-e-yawagakmar, bela or-sunnabi sobarbalid.