Read San Blas Kuna Amós 4 Bible Online

Amós 4 - San Blas Kuna bible

Amós 4

¹Bemar, omegan-Samariaʼginmalad, an bega ibmar-sogoed be itomar: Bemar, Basán-yalagi moli-bebe-nikad-ome-wardummaganyob gumalad.Bemar, dule-wilegana sabsur-wiobukmalad, ise-mesagwale, be dule-wilegana imakbukmalad.Be-suimargarbela be sogbukwadamalad: “Vino anga sedaye.”

²Bab-Jehová-Bur-Gandik-Maidi, e-san-isligwaledba ise-sogar soged:“Bemargi ibagan-dani, bemar belagwable akegi ebipilemai gumaloed, achwer-nugar-dummagangi-gales be ebipilemai gumaloed.

³Bemar neggwebur-galu-matusulid-ayaroedbali ilekwaa ainimai gumaloed. Geb Hermón-yarse be-metemaloed. Ani an Bab-Jehová-guedi weyob soged.” Israel-dulemar sabsur-odurdakleged amba itosurmalad

⁴“Betel-neggweburse be namar, ase be isgunamar.Gilgal-neggweburse be namar, bur bule ase isgudii be sanamar.Bane-bane wakudaryalaba ibmar-ukleged be uknamar. Ibapaagi ibmar-ambegi-gwensak-ukleged (10%) be uknamar.

⁵Dog-nuedye-sogega, madu-ina-nikad be ogumaknamar. Bela dule be owisomala,na ibmar-ukleged e-itoleged-ukbiedba ibmar sedamaloye. Ar Israel-dulemar, weyob abemalad. Ani an Bab-Jehová-guedi weyob soged.” Israel-dulemar Bab-Dummadba yapa ibsaed

⁶“Ani an bela be-neggweburmargi ukud-dummad nasiksad, bela be-dulemar-bukwadga masgulleged an osulosad.Degite, bemar deyob-gusmar-inigwele, gwen gannar anse aibilissurmalad. Ani an Bab-Jehová-guedi weyob soged.

⁷”Nii-warbaase ibmar-gwag-welegoed-iduale, dii bar an owissulid. Unnila neggwebur-gwagwengi dii an owisad. Neggwebur-baidgindi dii an owissulid.Nainu-gwensakgi dii-winai gusad. Baid-nainugindi dii wissulid, abali, nainu dingude gusad.

⁸Degisoggu, dulemar neggwebur-baid-baidse dii-amidii gusmalad. Wis-gobsamar-inigwele, amba uku-uku-itogedi surgussurmalad.Degite, bemar deyob-gusmar-inigwele, gwen gannar anse aibilissurmalad. Ani an Bab-Jehová-guedi weyob soged.

⁹”Be-ibmar-digarmalad bonigangi an obelosad, neg-uedikidba an dinare imaksad.Sesmar be-nainugan obelosad, sesmar be-uva-digar-nanaid oburgwisad.Sesmar be-higuera-sapimar obelosad, degi, be-olivo-sapimar obelosbalid.Degite, bemar-ibe deyob-ibmar-gus-inigwele, bemar gwen gannar anse aibilissurmalad. Ani an Bab-Jehová-guedi weyob soged.

¹⁰”Egipto-dulemargi bonigan an barmisgusayobi, an bemargi barmisgusad. Es-suidgi be-sapingan an oburgwisad,e-molimar-galesmalad an ogilosbalid. Dule-burgwismalad-e-mui-yapanned neg-gagasa an nasiksad.Degite, bemar deyob-gusmar-inigwele, gwen gannar anse aibilissurmalad. Ani an Bab-Jehová-guedi weyob soged.

¹¹”An Sodoma-neggwebur-wiosayobi, degi, Gomorra-neggwebur-wiosayobi, an bemar-wiosmogad. Bemar suar soose-negabar-gummaksayobi gusmalad.Degite, bemar deyob-gusmar-inigwele, gwen gannar anse aibilissurmalad. Ani an Bab-Jehová-guedi weyob soged.

¹²”Israel-dulemar, be anse aibilissurmalad-ulale, an begi gwichigumogoed. Israel-dulemar, begi an gwisguosoggu, an-iduar guakwa be gudimalo. Ar bemar we-ibmar-guoedi igar-gaosurmalad.”

¹³Dule-yarmar-nasiksadi, burwamar-obinnisadi, dulemarga-ibmar-guoed-sogedi, Bab-Jehováʼye nugad. Neg-meegwad, negsichidga obinyedi, yarmar-birgi-nanaedi, Bab-Jehováʼye nugad, Bab-Dummad-Bela-Gangued-Nikadid.