Read San Blas Kuna Amós 5 Bible Online

Amós 5 - San Blas Kuna bible

Amós 5

¹Israel-dulemar, nue itomalo, gayaburba-wile-itoged-namaklegedgi, an bega namaksokalid.

²“Israel-dulemar yagwa-swilidik-yeerdaklegedyobid, be sabsur-omukulesmalad. Bar be gannar gwisguosulid.Napagi meremai be guoed, dule-be-ogwised sate guoed.”

³Bab-Jehová-Bur-Gandik-Maid, Israel-dulemarga weyob soged:“Neggwebur-gwensak sorda-miligwen (1,000) bila-onogedse-naele, unnila dulatar (100) durgumaloed.Ar neggwebur-gwensak dulatar (100) bila-onogedse-naele, unnila e-ambe (10) durgumaloed.”

⁴Bab-Jehová Israel-dulemarga weyob soged:“Be an-amimalale, be dula-gudii gumaloed.

⁵Melle be Betel-neggweburse bar namala.Gilgal-neggweburse melle be bar namala, degi, Beerseba-neggweburse melle be bar namarbali,ar ade, Gilgal-dulemar galesa seledmaloed, degi, Betel-neggweburdi bela berguoed.”

⁶Bab-Jehová be amimala, adi, be dula-gudii gumaloed. Degisulile, Bab-Jehová José-wagangi sooyobi aidenonikoed,We-soo, bela Betel-neggwebur ogumakoed. Dule we-soo-oginnega sate guoed.

⁷Igar-innikigwadi, igar-isganaga be imakmalad. Bur Igar-napiragwadi obanagwar be imakmalad.

⁸Bab-Dummad niisgwa-danaled Pléyadesʼye-bileged obinnisad, degi, niisgwa-baigan Oriónʼye-bileged obinnisbalid.Bab-Dummad neg-sipusulidi, neg-meegwadga imaked, degi, neg-meegwad, negsichidga imakbalid.Bab-Dummad demar-bukibse goled. Geb napneggi dii-owiega imaked. ¡E-nuga, Bab-Jehováʼye nugad!

⁹Bab-Jehová neggandikmalad osuloged, dule-ambikued-neggandikmalad osulobalid.

¹⁰Bemar, igar-nudaked-neggi dule-igar-nudakega-arbamaladi, isdar dakmalad, degi, dule-napira-ibmar-soged, isdar be dakmarbalid.

¹¹Ar bemar, dule-wilegana ibigwensuli imakmarsoggu, degi, orosgi-dakleged-trigoʼgi, mani-galeged-bennuked ega be igar-mesismarsoggu,a-ulale, be-akwa-neg-sobsamaladgi, be megosurmalad. Degine, nainugi be-uva-naid-e-vino gwen be gobosurmalad.

¹²Bemar-ibmar-isgana-yaisur-imaksad an wisid, be-isgumalad-yaisulid an wisid. Bemar, dule-innikigwad ibgwensur imaked, igar-nabolemaladgi emarse be manigi baklemalad. Degine, igar-nabolegedgi dule-wileganagi be gwisgumalad.

¹³Agala, weyob neg-gunaidgine, dule-binsaed-nikadaedi bogi gudidaed. Ar ade, we-ibagande nuedsulid.

¹⁴Melle igar-isgana be amimala, bur igar-nued be amimala, adi, be dula-gudii gumaloed.Degidbali, Bab-Dummad-Jehová-Bela-Gangued-Nikadi, bemarba gudii guoed.

¹⁵Igar-isgana be obane, igar-nuedbina be soge, igar-nabiroleged-neggi, igar-innikigwadba igar be nabomala.Abakale, Bab-Dummad-Jehová-Bela-Gangued-Nika-Maid, José-wagan-besmalad wile dakalile.

¹⁶Agala, Bab-Dummad-Jehová-Bela-Gangued-Nika-Maid weyob soged:“Bela-dule-ambikumaladgi, dulemar-ise-boale itolegoed, degi, bela galimbaba wile-itolegedba binnasur-gornanai itolegoed.Bomalaga sapur-dorganse gorlegoed, degi, bomalaga dulemar-manigi-bomaladse gorlegoed.

¹⁷An sabsur-bemar-wiodanikile, bela uva-digarmaladba dule-boe itolegoed. Ani an Bab-Jehová-guedi weyob soged.” Bab-Jehová-e-iba

¹⁸Dule, Bab-Jehová-sabsur-odurdaked-iba-abitogele, ¡duledar-wilesmar! ¿Ar ibiga we-ibade edarbesunna?Ar we-iba negasichidbi naguoed, neg-meegwad naguosulid.

¹⁹Dule aisaar achumigur-idu-wakinmaiyob guoenad, degi-inigwele, wiob-abingudagoed. Deyobiyobi, a-iba ega guoed.Dule e-negyaba-dogmaile, galugi akadapiyob guoed, galugi-akadapidba naibegi-warmaksayobi guoed. Deyobiyobi, a-iba ega guoed.

²⁰Bab-Jehová-sabsur-odurdaked-ibade negasichidbi-nai guoed, neg-meegwad-nai guosulid. Bela neg-gubyagwaledbi-nai guoed, neg dale-dalesaar daklegosulid.

²¹Bab-Jehová sogdebalid:“Ibamar be anga onogedi, an isdar-daked. Bemar bulakwaa an-nug-odummogega itoakwaa-anse-gormaladi, yeer-ito an-imaksulid.

²²Ar bemar anga be-ibmar-ogumakar-ukleged ukele, an abingaosulid. Ibmar-gwagmar anga be ukele, an abingaosurbalid.Amba gwenatigwar-guega moli-bebe-nikad-senigana-wardummagan-ukleged, an be-ibe abingaosurbalid.

²³Be-namaked-oimaksiid an itobisulid. Be-gar-cítara-goled, an itobisulid.

²⁴Bur, dii-aryomaiyobi, igar-naboleged galesuli selemai abeleged, degi, diwar-suurmakmaiyobi, igar-innikimalad selemai abeleged.

²⁵”Israel-dulemar, bemar birga-dulabo (40) nega-dulesulidganba gudigusmargua,¿anga be napiragwadgi ibmar-ogumakar-ukleged uksamarsi? ¿Anga be napiragwadgi ibmar-ukleged uksamarsi? Suli.

²⁶Emide, bemarde nuchu-Moloc-e-neg-sobaled be semamaid. Degi, nuchu-Quiún be semamaid.Wemarde niisgwa-e-nuchumar-nanaed, bemar we-ibmarmar-sobsamaladi, gwen Bab-Dummadsulid.

²⁷Degisoggu, dikasuli Damasco-neggwebur-dakasik an be-balimetemaloed.” Bab-Jehová deyob soged. E-nuga, Bab-Dummad-Bela-Gangued-Nikadye nugad.