Read San Blas Kuna Amós 7 Bible Online

Amós 7 - San Blas Kuna bible

Amós 7

¹Bab-Jehová-Bur-Gandik-Maid, we-negburgan anga oyosad: Reyga ibmar-gwag-orosgi-dakleged-ukleged-welesad-sorba, a-gwag gannar ainiali an dakalid. Agi Bab-Jehová sesmar-bukidar urbenai an dakarbalid.

²Degi, sesmar napaneggi gaganse-bakale, bela obelosgua, binnasuli an goted: —An-Bab-Jehová-Bur-Gandik-Maidye, an bese wilesakwaa egisye, Jacob-waganga isgued be eliye. ¿Ar igi Jacob-wagande bar bukuosunna? Unnila ichee gumalad.

³Degidgine, Bab-Jehová wiledakde, sogded: —Degir nabir, an deyob neg imakosulid.

⁴Geb degi, Bab-Jehová-Bur-Gandik-Maid, negburgan-baid anse oyosbalid: An daked, Bab-Jehová dule-sabsur-odurdakega soose gote. Degi, soo napa-urba demar-wilasailad dinnaa imaksad. Degine, nainugan bela swanga imaksad.

⁵Deyob an daksagu, binnasuli an goted: —Bab-Dummad-Jehováʼye, bese wilesakwaa an egisye, soo be oginye. Degisulile, ¿ar igi Jacob-wagande bar bukuosunna? Unnila iche gumalad.

⁶Degidgine, Bab-Jehová wiledakde, sogded: —Degir nabir, an deyob neg imakosulid.

⁷Bab-Jehová, anga negburgan-baid oyosbalid: An daked, Bab-Jehová galu-matusulid-nuekwa-sobaled-nagaba gwichi. Degi, neg-wilubsaed-dubgi-gingwa-naid e-argangi-gani, an dakalid.

⁸Degi, Bab-Jehová anse egichialid: —Amós, ¿wede ibu be dake? An abin-sogded: —Dubgi gingwa-nai an daked. Degidgine, Bab-Jehová anga sogded: —Dubgi-gingwa-naidi, an-Israel-dulemar-abargi an obatoed, adi, wilubdakega, bule inniki-gudimardibeye. Inniki-gudisulile, bar an ega e-isgued eliosulid.

⁹Isaac-wagan-e-bab-dummaganse-goled-ailamar bela osulolegoed, degi, Israel-e-bab-dummaganse-goled-negmar bela bibisgoed.Jeroboam-e-gwenadgan es-suidgi an oberguoed. Amasías, Amósʼgi gwichigusad

¹⁰Degidgine, Betel-neggweburgined-dule-irwa-Babse-goled-Amasías, Israel-rey-Jeroboamʼga gayaburba barmisad: “Amós, Israel-sordamar-abargi begi gwisgudiid. Ar Amós-sunmakedba Israel-dulemar binsaed-galediid.

¹¹Ar ade, Amós sogdiid:‘Rey-Jeroboam es-suidgi burgoye. Israel-dulemardi e-yargi gales seledmarmogoye.’ ”

¹²Geb degi, Amasías, Amósʼga sogded: —¡Dule-negburgan-daked, be wegi-gudiid be nae! Ar be mas-gunbiele, Judá-yarse be nae. Agi, Bab-Jehová-igargi be sunmaknae.

¹³Melle bar Betel-neggweburgi, Bab-Jehová-igargi be sunmaknoniko, ar Betelʼde, rey-e-neg-islidikidid, rey-e-bab-dummadse-goled-negad.

¹⁴Amós, Amasías-abin sogded: —An Bab-Dummad-gayaburba-barsoged-dulesulid, an a-machisurbalid. Unnila, an sibad-wawaad-edarbed-dule gued, higuera-sapigi an arbaed-dulebalid.

¹⁵Degi-inigwele, Bab-Jehová sibad-edarbedgi an-onosad. Anga sogsad: ‘An-gayaburbagi be an-Israel-dulemarga be sunmaknaye.’

¹⁶Degisoggu, Amasías, Bab-Jehová-gayaburba be itoge: ”Bede soged:‘Mer Bab-Jehová-ibmar-imakoedgi Israel-dulemarga gandikidgi sunmakoye. Mer Bab-Jehová-gayaburbagi Isaac-waganga gandikidgi sunmakbaloye.’

¹⁷”Agala, Bab-Jehová weyob bega soged:‘Be-ome neggweburgi ibmarbina na san-urmakdii guoed. Be-masmala, degi, be-bunamala es-suidgi oburgwilegoed.Be-napamar wilubsaar mimilegoed. Degi, bedi, be-yargi burgosulid.Israel-dulemardi e-yargi dikasuli gales seledmaloed.’ ”