Read San Blas Kuna 1 Samuel 16 Bible Online

1 Samuel 16 - San Blas Kuna bible

1 Samuel 16

¹Bab-Jehová, Samuelʼga sogded: —¿Ar sanagwadse be Saúlʼba wile-itoged be iegoe? Ar andi bato Saúl-Israel-reyga-maid obelosad. Ar olivo-gwallu be-moli-bebegargi be enoge. Belén-neggweburse be nae, Isaí-negse. An a-e-machi-wargwen reyga-megega an susad.

²Samuel abin-sogded: —¿An naega, igi an saoe? Saúl an-wisgualile, an-oburgo-itole. Geb Bab-Jehová ega sogded: —Moli-bebe-nikad-ome-bipigwad beba be sedo. Be sogdapo: An Bab-Jehováʼga ibdurgan-ogumakar-ukleged ukega an daniye.

³Isaíʼse be golo ibmar-ogumakar-uklegoedse dagegar. Geb agine, an bega sogoed ibu be imakoe. An bega dule-oyogoed. A-dule, be anga reyga nug-imakoed.

⁴Samuel Bab-Jehová-ega-ibmar-sogsadba ibmar-imaksad. Samuel, Belén-neggweburse-nonigua, girmar-dummagan Samuel-abin dobed-abargi noarmalad. Geb ega sogdemalad: —¿Nuedgi be daniki?

⁵Samuel abin-sogded: —Eye, nuedgi an daniki. Bab-Jehováʼga ibdurgan-ogumakar-ukleged an ukdanikid. Bemar ise-bagagwar san imakmalo. Geb be ibdurgan-ogumakar-uklegedse be anba dagmalo. Geb degine, Samuel, Isaí, e-machimalabo san-bagagwar-imakega imaksad. Geb a-sorbali, ibdurgan-ogumakar-ukleged-ukedse anba dakmaloye ega sogsad.

⁶Geb Isaí-e-masmala nonimargua, Samuel, Eliabʼgi atakdegu binsaded: “Napiragwa, we, Bab-Jehová na nug-imaksadid.”

⁷Bab-Jehováʼdi, Samuelʼga sogded: —Ar we-dule an nug-imaksasulid. Mer e-daklegedgi be atake, mer e-mas-dunguedgi be atake. Ar andi we-ibmar daksulid. Duledi, ibmar-daklegedgi ataked, andi, gwage-ulub daked.

⁸Geb degine, Isaí Abinadabʼse gochad Samuelʼga oyogega. Samuel, Isaíʼga sogded: —Bab-Jehová, we nug-imaksasulid.

⁹A-sorbali, Isaí, Sama-oyosad. Samuel gannar sogdebalid: —Bab-Jehová amba we-sussurbalid.

¹⁰Isaí, e-machimala walagugle-mergu (7) Samuelʼga oyosad. Samuelʼdi Isaíʼga sogdebalid: —Bab-Jehová wemar-wargwensaar sussulid.

¹¹Geb Isaíʼse egichided: —¿Machimala-baigan, be suli? Isaí abin-sogded: —Bipigwadbi napi. Adi, sibad-wawaadmar edarbediid. Samuel ega sogded: —Ese gornaega be dule-barmide. Ar a-dule-wese-nonikidse geb anmar mas-gutoed.

¹²Isaí, e-machise-gornaega dule-barmisad, geb ega senonimalad. We-machi uka-sichisaar-itoged, sapingwa-nued-daklebalid. Geb degine, Bab-Jehová, Samuelʼga sogded: —Be gwisgue. Ar we-dule an susad. E-nonogi olivo-gwallu be eoge.

¹³Samuel olivo-gwallu moli-bebe-gargi-sedanikid susad. Geb David-e-gwenadgan-asabin, David-nonogi olivo-gwallu eosad. Geb degine, Davidʼgi Bab-Jehová-Burba gandikidba aidenonikid. A-iba-akale, Bab-Jehová eba gudigusad. A-sorbali, Samuel, Ramá-neggweburse gannar naded. 5. DAVID, GOLIAT-OBURGWISAD (16:14–17:58) David, Rey-Saúlʼga arbasad

¹⁴Bab-Jehová-Burba, Saúlʼgi-aibachad. A-ulale, Bab-Jehová, burba-isgana egi barmialid, adi, sabsur imakegar.

¹⁵Saúl-e-maimar, Saúlʼga sogdemalad: —Bab-Jehová burba-isgana-begi-barmialidi, sabsur-be-imaked.

¹⁶Dummad, be-maimar be barmide, dule-gar-arpa-ogoled-aminaegar. Adi, Bab-Jehová burba-isgana-begi-barmialile, dule-gar-ogoled gar-ogotogua, be baisur-ito naoed.

¹⁷Saúl abin-sogded: —Nabirdo. Dule-gar-ogoled-nued be aminamala, geb anga be sedamalo.

¹⁸E-mai-wargwen sogded: —Dule-Belénʼgined Isaíʼye-nugad-e-machi-gwensak nabir-gar-ogoled mag an daked. We-machigwa dule-gandikidid, bila-onogedgi dule-buledid, binsaed-nikaa-sunmaked-duled, e-dakleged nued-daklebalid. Degine, Bab-Jehová eba gudiid.

¹⁹Geb degine, Saúl, Isaíʼse gayaburba-berbemalad barmisad, ega sogegar: “Be-machi-David sibad-wawaad-edarbed, be anga barmidage.”

²⁰Geb agine, Isaí, moli-uayasuid amisad. A-moligi, masgullemalad nasiksad, vino buglugwen nasiksabalid, degi, sibad-bipigwad ega wargwen barmisbalid. Geb Isaí, Saúlʼga e-machi-Davidʼba a-ibmarmar barmisad.

²¹David, Saúl-sogedba-ibmar-imakega Saúlʼse nonikid. Agi, Saúl, Davidʼbina gadi-ito gunonikid, geb ega-sigu-abgaed-seedga imaknonikid.

²²A-sorbali, Saúl, Isaíʼga we-gayaburba barmisad: “An bei be-machi-David obebido, anga arbadii guegar. Ar ade, wegi-gudiid an yeerdaked.”

²³Bab-Jehová, Saúlʼgi burba-isgana barminonikile, David gar-arpa ogotedaed. Gar-arpa-goledba, Saúl, gadi-gadi-ito-naddaed, degi, burba-isgana egi banguddaed.