Read San Juan Colorado Mixtec I Corintios 13 Bible Online

I Corintios 13 - San Juan Colorado Mixtec bible

I Corintios 13

¹Tatun yuhu tan cuvi cahan yu cuaha ñi yuhu tsa caahán nyɨvɨ iyó nu ñuhu ñayɨvɨ ihya, tan cuví cahan tucu yu yuhu tsa caahán ángel, maa tyin tatun ña cuñí yu tsi Nyoo tan ndi tsi nyɨvɨ, cuví yu tumaa tyombo tsa nañí ñi maa o iin caa tsa tsacú ndaxin ñi maa.

²Tatun cuví cuhva cuenda yu tuhun caahán Nyoo, tan cuví coto yu tandɨhɨ tuhun xeehe, tan tsitó yu tandɨhɨ tuhun, maa tyin tatun ña cuñí tucu yu tsi Nyoo tan ndi tsi nyɨvɨ, nduve náa catyí javaha yu tandɨhɨ yacan. Tatun tsinú xaan iñi yu tsi Nyoo nda cuanda cuví cahan yu tsihin yucu na cuhun tsi inga ityi, tan cua cuhun tsi, maa tyin tatun ña cuñi yu tsi Nyoo tan ndi tsi nyɨvɨ, nduve náa ra cuví yu.

³O tatun cuhva yu tandɨhɨ tsa iyó tsi yu tsi nyɨvɨ ndaahvi, tan cuhva yu nda cuanda ñayɨvɨ yu tyin cucayu cuñu ñuhu yu, maa tyin tatun ña cuñi yu tsi Nyoo tan ndi tsi nyɨvɨ, nduve náa cua jatyinyee can tsi yu.

⁴Tatun nditsa tsa cuñí yo tsi Nyoo tan tsi nyɨvɨ, ña tyixin yo, vaha iñi yo; ña nyiyó iñi yo tsa tsahá ra tsi inga ñi, ña cahnu jahá yo tsi yo, tan ña yaa yo.

⁵Tatun nditsa tsa cuñí yo tsi Nyoo tan tsi nyɨvɨ, ña sɨquɨ iñi yo, tan ña nducú yo maa ñi tsa vaha tsi maa yo, ña cuxaán yo, tan ña ndoó tɨsɨhɨ tsitsi añima yo.

⁶Tatun nditsa tsa cuñí yo tsi Nyoo tan tsi nyɨvɨ, ña sɨɨ cuñí yo náa ndɨhɨ tsa ña vaha javahá ñi, maa tyin cusɨɨ iñi yo tsihin tsa vaha tan tsa nditsa.

⁷Tatun nditsa tsa cuñí yo tsi Nyoo tan tsi nyɨvɨ, cunyeé iñi yo nyehe yo tundoho jahá ñi, tan tsinú iñi yo tyin cua javaha ñi tsa vaha tan ndatú yo tsa nasama ñi cuhva iyó ñi, tan ña cundɨhɨ́ iñi yo.

⁸Tsa cuñí yo tsi Nyoo tan tsi nyɨvɨ ña cua cundɨhɨ maa tsi, maa tyin coo quɨvɨ tsa ña cua cuhva cuenda ca yo tsa caahán Nyoo, tan ña cua cahan ca yo inga yuhu, tan tsa tsitó yo vityin ña tsiñi ñuhu ca can tsi yo.

⁹Nyoo tsahá ra tsa coto yo luxu ñi vityin tan tsahá tucu ra luxu ñi tsa cuhva cuenda yo tsi nyɨvɨ,

¹⁰maa tyin quɨvɨ quitsi nyico ra Cristo, cua cundɨhɨ tsa tsitó yo luxu ñi tyin cua coto yo tandɨhɨ maa.

¹¹Quɨvɨ tsa luhlu yu caahán yu tumaa caahán ra nyihi tan tsicá iñi yu tumaa tsicá iñi ra nyihi, maa tyin quɨvɨ tsahnu̱ yu nacoo̱ yu tsa yu cuhva javahá ra nyihi.

¹²Tan tacan tucu vityin tsitó yo tuhun Nyoo tumaa tsa nyehé yo nu inu tun tsa ndɨhɨ̱ tsi yaa. Maa tyin quɨvɨ cua quitsi ra Cristo, cua coto yo tandɨhɨ maa. Luxu ñi tsitó yu vityin, maa tyin quɨvɨ quitsi nyico ra, tandɨhɨ cuii maa tan cua coto yu, tumaa nacotó maa ra tsi yu vityin.

¹³Iyó uñi taahan tsa ña cua ndɨhɨ maa: tsa tsinú iñi yo tsi Nyoo, tsa tsitó yo tyin nditsa tsa cua ñihi yo tandɨhɨ tsa caha̱n Nyoo tyin cuhva ra tsi yo, tan tsa cuñí yo tsi Nyoo tan tsi nyɨvɨ. Tan tsitsi tsa nduñi taahan tsehe, tsa tsiñí ñuhu ca cuví tsa cuñí yo tsi Nyoo tan tsi nyɨvɨ.