Read San Juan Colorado Mixtec El Apocalipsis 22 Bible Online

El Apocalipsis 22 - San Juan Colorado Mixtec bible

El Apocalipsis 22

¹Tacan tan janaha̱ ángel can iin yutya cuii xaan tsi yu. Ndutya tsa tsahá tsa coo nyito yo cuví. Cuii xaan tsi tumaa cuii iin yutyi vaha. Tan quitá ndutya can nuu nyaá tyayu Nyoo tan nu nyaá ra Mbee Ticatyi Luhlu.

²Mahñu tsitsi ityi cahnu ñuu can tan nduvi tsiyo xiin yutya can, nyecú yutun tsa tsahá tsa coo nyito yo. Tsahá tun naha tun tsɨtɨ tan iin tan iin yoo. Tan tsa iin cuiya tsahá tun naha tun tsɨtɨ utsi uvi tsaha. Tan ndaha numa tun vaha tsi cuví tsi numeri tsi nyɨvɨ iyó nu ñuhu ñayɨvɨ.

³Nduve maa tsa ña vaha cua coo ñuu can tyin ican nyaá tyayu Nyoo nu nyaá ra tan cua cundaca ñaha ra tsihin ra Mbee Ticatyi Luhlu. Tan cua jacahnu nyɨvɨ yɨhɨ́ cuenda ra tsi ra.

⁴Tan cua nyehe tsihin nuu ñi tsi ra. Tan cua cunyaa sɨvɨ ra nutyaan ñi.

⁵Ña cua coo ca tsacuaa ican. Tan nyɨvɨ tsa cua coo ican ña tsiñi ñuhu ñuhu̱ candili tsi ñi, ndi ñuhu̱ ñicanyii, tyin Nyoo Jutu yo cua jandunditsin nu cua coo ñi. Tan maa ñi cua cundaca ñaha ñi tsihin ra tacan ñi maa. Nu janahá tsi tyin tsa cuyatyin quitsi ra Cristo

⁶Tacan tan catyí ángel can tsihin yu: ―Tuhun ihya cuví tuhun nditsa, tan cuví cuita iñi un itsi tyin cua cundaa tsi. Maa Nyoo Jutu yo ra caha̱n tsihin ra cuvi̱ ndusu yuhu ra taha̱n tsanaha, juvin ra jacuhu̱n ángel ra, tyin janaha ra tsi nyɨvɨ jahá tyiñu tyiñu ra náa cua cuvi tsa numi ñi ―catyí ra. Tan catyí Jutu Mañi yo:

⁷―¡Tsa cuyatyin quitsi yu! ―catyí ra. ¡Sɨɨ xaan cuví tsi nyɨvɨ tsa javahá cuhva caahán tuhun Nyoo tsa nyaá nu libru ihya!

⁸Yuhu ra Juan, tsiñi̱ yu tan nyehe̱ yu tandɨhɨ tuhun ihya. Tsa yaha̱ nyehe̱ yu tan tsiñi̱ yu itsi, tsicuɨñɨ̱ tsɨtɨ yu tsaha ángel tsa janaha̱ itsi tsi yu, tyin jacahnu yu tsi ra.

⁹Maa tyin catyí ra tsihin yu: ―Ña ja̱cahnu un tsi yuhu, tyin yuhu, musu Nyoo ñi cuví yu, tumaa yooho tan tandɨhɨ ca ra yañi un tsa cuví ndusu yuhu Nyoo, tan tumaa tandɨhɨ ca nyɨvɨ tyaá yahvi tuhun nyaá nu libru ihya. Intuhun ñi Nyoo taahán tsi jacahnu yo ―catyí ra tsihin yu.

¹⁰Tan catyí tucu ra tsihin yu: ―Ña tyi̱hi xeehe un tuhun Nyoo tsa nyaá nu libru ihya, tyin tsa yatyin cuii cundaa tsi.

¹¹Maa tyin ja̱ña ndaha tsi nyɨvɨ caquiñi, na javaha maa ñi cuhva cuñí maa ñi. Tan nyɨvɨ iyó cuatyi, na coo ca cuatyi ñi. Maa tyin nyɨvɨ javahá tsa vaha, na jañihi ca ñi javaha ñi tsa vaha. Tan nyɨvɨ tsa jandu ií Nyoo, na cunyicun vaha ca ñi tsi ra ―catyí ra tsihin yu.

¹²Tan Jutu Mañi yo catyí ra: ―Nye̱he ndo. Tsa cuyatyin quitsi yu. Tan tyahvi yu tsi intuhun intuhun nyɨvɨ tsa cuenda tsa javahá ñi, a javahá ñi tsa vaha o tsa ña vaha.

¹³Yuhu cuví ra jihna ñi, tan yuhu cuví ra cua coo nu cua ndɨhɨ quɨvɨ, tsa iyó maa yu nda nu quitsaha̱ tandɨhɨ tan tacan ñi maa cua coo yu nu cua ndɨhɨ tumaa letra A cuví tsi letra jihna ñi tan letra Z cuví tsi letra nu ndɨhɨ ña ―catyí Jutu Mañi yo.

¹⁴Sɨɨ xaan cuvi tsi nyɨvɨ tsa nacatyá jahma, [ñi janduvahá añima], tyin cua ñihi ñi ndatu catsi ñi tsɨtɨ yutun tsa tsahá tsa coo nyito añima yo. Tan cuví quɨhvɨ ñi yuhu cora ñuu can.

¹⁵Maa tyin nyɨvɨ javahá tsa caquiñi, tumaa ñi tasɨ, rayɨɨ tsa tsicá nuu tsihin ñaha tan ñiñaha tsa tsicá nuu tsihin rayɨɨ, tan ñi tsahñí, tan ñi jacahnú tsitoho, tan tandɨhɨ ñi vatya, tan ñi jandaví ñaha; tandɨhɨ maa ñi can, ña cua quɨhvɨ ñi tsitsi ñuu can.

¹⁶Tan catyí tucu Jutu Mañi yo: ―Yuhu ra Jesús, jacuhun yu ángel yu tyin jacoto ra tandɨhɨ tuhun ihya tsi nyɨvɨ tsicá vehe ñuhu. Yuhu cuví nyɨvɨ tsahnu ra rey David. Tan cuví tucu yu tata ra. Tan cuví tucu yu tiñuu cahnu tsa xiñu xaan, tsa caná tsa naa ca ―catyí ra.

¹⁷Tatyi Ii Nyoo tan nyɨvɨ yɨhɨ́ cuenda ra, ñi tsa cuví tumaa ñasɨɨhɨ ra Mbee Ticatyi Luhlu, catyí ñi tyehen: ―Na̱ha ñi, Jutu Mañi yu ―catyí ñi. Tan nyɨvɨ tsa tsiñí tuhun ihya, na catyi ndɨhɨ ñi: ―Na̱ha. Tan nyɨvɨ na ityi iñi tan tandɨhɨ nyɨvɨ cuñí quitsi, na quitsi ñi tan coho ñi ndutya tsa tsahá tsa coo nyito añima yo, tan nduve náa cua tyahvi ñi.

¹⁸Tan tandɨhɨ nyooho tsa tsiñí tuhun Nyoo tsa nyaá nu libru ihya, cuñí yu catyi yu tsehe tsihin ndo: Nyɨvɨ tsa cua janducuaha ca tuhun ihya, Nyoo cua janducuaha ca ra tundoho tsa nyaá nu libru ihya sɨquɨ ñi.

¹⁹Tan nyɨvɨ tsa cua quinyaa juhva tuhun Nyoo tsa nyaá nu libru ihya, Nyoo cua quinyaa ra tsa taahán tsi tsi ñi tsa nyaá nu libru tsa caahán yóo nyɨvɨ cua coo nyito, tan ña cua cuhva ca ra coo ñi ñuu ii. Tan ña cua ñihi ñi tsa vaha tsa caahán libru ihya tuhun.

²⁰Tan Jutu Mañi yo, ra tsa tsahá cuenda tuhun ihya catyí ra tyehen: ―Tsa nditsa tyin tsa cuyatyin quitsi yu ―catyí ra. Tan yuhu catyí yu: ―Na cuvi tsi tacan. Na̱ha ñi, Jutu Mañi yu, Jesús ―catyí yu.

²¹Na naquihin tandɨhɨ ndo tsa vaha tsa tsahá Jutu Mañi yo Jesucristo tsi yo. Tan na cuvi tsi tacan ñi.