Read San Juan Colorado Mixtec El Apocalipsis 4 Bible Online

El Apocalipsis 4 - San Juan Colorado Mixtec bible

El Apocalipsis 4

¹Tsa yaha̱ can, tan nyehe̱ yu ticoho iin yuvehe nda andɨvɨ. Tan tsiñi̱ yu ndusu tsa caahán jihna tsihin yu, ndusu tumaa ndusu trompeta, tan catyí tsi tsihin yu: ―Nda̱a nyehe tan janaha yu tsi un tsa cua cuvi nu cuahán ca tsi ―catyí ndusu can tsihin yu.

²Tan juvin ñi cuhva can tan tuvi̱ iñi yu tsa nyaá Tatyi Ii Nyoo tsihin yu. Tan nyehe̱ yu nyaá iin tyayu nda gloria. Tan nu tyayu can nyaá iin ra nyaá.

³Tan nuu ra tsa nyaá nu tyayu can, xiñu tsi tumaa xiñu yuu vaha tsa nañí jaspe tan tumaa xiñu yuu cornalina. Tan tanɨɨ cahnu yuhu tyayu can tsinú nduvi coo cuiya, tan xiñu tɨ tumaa xiñu yuu vaha tsa nañí esmeralda.

⁴Tan nyehe̱ yu nyecú oco cumi ca tyayu nu nyecú oco cumi ra tsahnu naha ra, tsinu̱ nduvi tyayu can nu nyaá tyayu tsa nyaá mahñu can. Nditsi ra naha jahma cuitsin. Tan yɨhɨ́ corona xuhun cuaan jiñi intuhun intuhun ra naha.

⁵Tan nu nyaá tyayu tsa nyaá mahñu can, quitá tatsa tan ñihi cuvaa tan ñihi caahán savi. Tan cayú utsa ñuhu̱ ityi nuu tyayu can, tan tsa utsa ñuhu̱ can cuví tsa utsa tatyi ii Nyoo.

⁶Tan ityi nuu tyayu can iyó tucu iin tsa caá tumaa caá ndutya ñuhu, tan xiñu xaan can tumaa xiñu yutyi. Nɨɨ canduvi yuhu tyayu can tan mahñu tyayu can, nyecú cumi tsa nyito. Tan cuaha xaan tinuu tsa nyito can iyó, ityi nuu can tan ityi tsata can.

⁷Iin tsa nyito can caá can tumaa caá ndicaha. Tan tsa tsinu uvi tumaa caá indɨquɨ lee. Tan tsa tsinu uñi, tumaa caá nuu rayɨɨ caá nuu can. Tan tsa tsinu cumi tumaa caá tasu tsa cuahán ndavá.

⁸Tan iyó iñu nditsin tsa intuhun intuhun tsa nyito can. Tan tanɨɨ cahnu tsi nyecú tinuu tsi, tahan ñi ityi tsata tan ityi tsitsi tsi. Tan ña jandɨhɨ́ tsi tsa caahán tsi tyehen nduvi tan ñiñu:Ra ii cuví un; ra ii cuví un; ra ii cuví un.Jutu Mañi yu, Nyoo, iyó tandɨhɨ tunyee iñi tsi un.Tacan ñi iyó maa un, juvin un cuví Nyoo nda tsanaha tan vityin, tan juvin un cua quitsi.

⁹Tan jacahnú tsa cumi tsa nyito can tsi Nyoo, tan nacuhvá tsi naha tsi tyahvi nyoo tsi ra nyaá nu tyayu can, ra tsa iyó tandɨhɨ tyembu. Tan tahan ñi tsaha tsa javahá tsi naha tsi tacan,

¹⁰tsa oco cumi ra tsahnu can naha ra tsicuɨñɨ́ tsɨtɨ ra naha tan jacahnú ra naha tsi ra iyó tandɨhɨ tyembu. Tan tsaquín ra naha corona ra naha nu nyaá tyayu can. Tan catyí ra naha:

¹¹Jutu Mañi ndi, Nyoo ndi cuví un.Yooho taahán tsi jacahnú ndi.Tan taahán tsi tsi un tsa cundaca ñaha un.Tyin maa un javaha̱ tandɨhɨ tsa iyó.Tan tsa cuenda tsa iyó iñi maa un, tan tsicoo̱ tandɨhɨ tsa iyó, catyí ra naha.