Read San Juan Colorado Mixtec El Apocalipsis 5 Bible Online

El Apocalipsis 5 - San Juan Colorado Mixtec bible

El Apocalipsis 5

¹Tacan tan nyehe̱ yu tyin ra tsa nyaá nu tyayu can ndahá ra iin tutu tsihin ndaha cuaha ra. Tan yɨhɨ́ tuvi tutu can tan nyaá letra ityi nuu tan ityi tsata can. Ndasɨ́ tsi tsihin utsa sellu.

²Tan nyehe̱ yu iin ángel tsa nyee xaan. Tan caná tsaa ra tan catyí ra: ―¿Yóo taahán tsi nacanɨ tutu ihya tan jocon sellu ihya? ―catyí ra.

³Maa tyin ndi intuhun tsa iyó andɨvɨ tan nu ñuhu ñayɨvɨ, tan tsitsi ñuhu, tan cuví nacanɨ tutu can. Nduve maa náa cuví nyehe nuu tsi.

⁴Tan tsacú xaan yu, tsa tsito̱ yu tyin yoñi maa cuví nacanɨ tutu can tan cuví cahvi, tan cuví nyehe nuu tsi.

⁵Tacan tan catyí iin ra tsahnu tsa nyaá can tsihin yu: ―Ña va̱cu ca un. Tyin ra cuví Ndicaha [o cuñí tsi catyi, ra ndacá ñaha], ra cuví tata ra Judá, tan tata ra rey David, ra ican jaha̱ canaa tan juvin ra cua nacanɨ tutu can tan jocon tsa utsa sellu tsa ndasɨ́ tutu can ―catyí ra.

⁶Tacan tan mahñu tyayu can tan mahñu tsa cumi tsa nyito can, tan mahñu ra tsahnu can naha ra, nyehe̱ yu nyaá nyityi iin Mbee Ticatyi Luhlu. Tan caá tɨ tumaa caá iin mbee tsa tsahñi̱ nyɨvɨ tan jamañi̱ ñi. Tacan caá tɨ. Tan iyó utsa ndɨquɨ tɨ tan nyecú utsa tinuu tɨ. Tan tinuu can cuví tsa utsa tatyi ii tsa jacuhu̱n Nyoo tanɨɨ cahnu nu ñuhu ñayɨvɨ.

⁷Tan ra Mbee Ticatyi Luhlu can tsaha̱n ra nu nyaá ra nyaá nu tyayu can tan quihi̱n ra tutu tsa ndahá ra can nu ndaha cuaha ra.

⁸Cuhva tsa quihi̱n ra tutu can, tandɨhɨ tsa cumi tsa nyito can tan tandɨhɨ tsa oco cumi ra tsahnu can tsicuɨñɨ̱ tsɨtɨ ra naha nuu ra. Tan tsa intuhun intuhun ra tsahnu can naha ra ndahá ra naha arpa tsa iyó cuerda tumaa iyó cuerda nuu guitarra. Tan tsitu̱ cutu tsitsi copa xuhun cuaan ndahá ra naha. Tan cutu can cuví tandɨhɨ tsa tsicán tahvi nyɨvɨ yɨhɨ́ cuenda Nyoo.

⁹Tan tsitá ra naha iin yaa tsaa, tan catyí ra naha:Yooho cuví ra taahán tsi quihin tutu ihya tan jocon un tsa utsa sellu tsa ndasɨ́ itsi.Tyin tsahñi̱ nyɨvɨ tsi un. Tan tsihin nɨñɨ un jata̱ un tsi ndi tyin coo vaha ndi tsihin Nyoo.Tan cuví ndi nyɨvɨ ñuu nyihi tan ñuu nahnu tsa iyó tanɨɨ cahnu nu ñuhu ñayɨvɨ, nyɨvɨ caahán sɨɨn sɨɨn yuhu, tan nyɨvɨ sɨɨn sɨɨn tata.

¹⁰Tsaha̱ un tsa cuví ndi rey tan jutu tsa cuenda Nyoo Jutu yo.Tan cua cundaca ñaha ndi tsi nyɨvɨ iyó nu ñuhu ñayɨvɨ, catyí ra naha, tsitá ra naha.

¹¹Yaha̱ can tan tsiñi̱ yu ndusu tan nyehe̱ yu nyecú cuenda millón ángel tanɨɨ canduvi nu nyecú ra tsahnu can naha ra, nu nyecú tsa cumi tsa nyito, tan xiin tyayu can.

¹²Tan ñihi caahán ángel can naha ra, tan catyí ra naha:Ra Mbee Ticatyi Luhlu tsa tsahñi̱ nyɨvɨ,juvin ra taahán tsi cundaca ñaha, tan naquihin cuenda tsa cuca.Tan juvin ñi ra taahán tsi naquihin cuenda tsa tsiñi tuñi tan tandɨhɨ tunyee iñi.Na jacahnu yo tsi ra tan na jacahnu tandɨhɨ nyɨvɨ tan tandɨhɨ tsa iyó tsi ra, tyin cahnu xaan cuví ra, catyí ángel can naha ra.

¹³Tan tsiñi̱ tucu yu tsa caahán tandɨhɨ tsa javaha̱ Nyoo; tandɨhɨ tsa iyó andɨvɨ, tan nu ñuhu ñayɨvɨ, tan tsitsi ñuhu, tan tsitsi ndutya ñuhu; tan catyí tsi naha tsi:Cahnu xaan cuví ra tsa nyaá nu tyayu.Cahnu xaan cuví ra Mbee Ticatyi Luhlu.Tan tunyee iñi tsa iyó tsi ra naha ña cua cundɨhɨ maa tsa iyó tsi.Tan taahán tsi tsa jacahnu yo tan tyaa yahvi yo tsi ra naha tacan ñi maa ―catyí tandɨhɨ tsa javaha̱ Nyoo.

¹⁴Tan catyí tsa cumi tsa nyito can: ―¡Na cuvi tsi tacan! ―catyí tsi naha tsi. Tan tsicuɨñɨ̱ tsɨtɨ tsa oco cumi ra tsahnu can naha ra tan jacahnú ra naha tsi ra tsa ña cua cundɨhɨ maa.