Read Sangir PĚNDARIADI 1 Bible Online

PĚNDARIADI 1 - Sangir bible

PĚNDARIADI 1

¹Nạung su tětạe, piạ Duata nanětạ e něndiadi dunia patikụ,[1]

²banua e reng tawẹ luhude, ringangu wědang kal᷊emboghang. Laudẹ̌ mal᷊oange mẹ̌gẹ̌galumbang, manakạewe patikụ sabarang, kụ nihěmbungangkeng kararěndung pinẹ̌kětunge, kaiso kawasan Duata e nẹ̌karadiahangke su wowong akẹ.[2]

³ Duata e něhengetang, ”Kariadiko tualagẹ̌!” Tangu piạ e tualagẹ̌.

⁴Duata e mal᷊uasẹ̌ nakasilo ene. Bọu ene nihaene tualagẹ̌ e wọu kararěndung,

⁵kụ nisěbạ e tualagẹ̌ e ”Ěllo” ringangu kararěndung e, ”Hěbi”. Ene hěbi e napal᷊use, kụ namal᷊ukade. Kụ ene tangu ěllo kahumotongange.

⁶ Bọu ene Mawu Ruata e něhengetang, ”Kakoạko ral᷊ingkubẹ̌ sěmbaụ ipaměta akẹ makoạ duang kamonaěng, mase ipěnanara tampạ e rarua.” Tangu ene nariadị e. Kerene MAWU Ruata e nẹ̌koạ dal᷊ingkube kụ něměta akẹ apang su al᷊ungu dal᷊ingkubẹ̌ ene bọu akẹ apang su wowone.

⁸Dal᷊ingkubẹ̌ ene tangu nisěbạe, ”Langị”. Hěbi e napal᷊use kụ namal᷊ukade. Kụ ene tangu ěllo karuane.

⁹Bọu ene tangu Ruata e něhengetang, ”Kaelehẹ̌ko akẹ su al᷊ungu langị e sorong tampạ e sěmbaụ mědeạu ěntana e ikasilo.” Tangu ene nariadị e.

¹⁰MAWU Ruata e napasẹ̌bạeng ěntana ene, ”Rul᷊unge”, ringangu komol᷊ang u akẹ e, ”Laudẹ̌” kụ MAWU Ruata e mal᷊uasẹ̌ nakasilo ene.

¹¹Saụ kapia MAWU Ruata něhengetang, ”Ěntana e tuwoingkon haghing kakaluang, kụ haghine makạual᷊i manga watune ringangu haghine makaual᷊ịewe wua-bua.” Tangú ene e nariadị e.

¹²Kerene kakakoạ u ěntana e mapasẹ̌bang u haghing kakaluang. Kụ MAWU Ruata e mal᷊uasẹ̌ nakasilo e.

¹³Hěbi e napal᷊use kụ namal᷊ukade. Kụ ene tangú ěllo katěllune.

¹⁴Bọu ene MAWU Ruata e něhengetang, ”Kariadi piạko mangạe apạe makatualagẹ̌ su l᷊angị kụ manualagẹ̌ dunia, waugu mapẹ̌dal᷊ahaeng ěllo wọu hěbi, ringangu pěnialaěngu tempone manětạ u ěllo, taung, dingangu ěllong kawawantugu agama.”[3] Tangu hal᷊ẹ̌ ene nakoạ.

¹⁶Tangu kerene MAWU Ruata e napakariadin barang makạtualagẹ̌ ene rarua kụ masaria e, kụ kai matangěllo e baugu mẹ̌kawasa ěllo e ringangu wul᷊ang mědeạu mẹ̌kawasa hěbi, sul᷊ikudu ene tangu mal᷊aing kinoạ e kal᷊awọu wituing.

¹⁷MAWU Ruata e naměllo u kal᷊awọu apa tamai ene makạtualagẹ̌ e su l᷊angị ipěnualagẹ̌ dunia,

¹⁸ipěngawasa ěllo ringangu hěbi, ringangu waugu mapẹ̌dal᷊ahaěng tualagẹ̌ e wọu kararěndung. Tangu MAWU Ruata e mal᷊uasẹ̌ makasilo hal᷊ẹ̌ ene.

¹⁹Ene hěbi napal᷊use, ringangu namal᷊ukade. Kụ ene tangu kai ěllo kaěpạe.

²⁰Bọu ene MAWU Ruata e něhengetang, ”Kariadiko kal᷊awọu haghing diadikang biahẹ̌ měgẹ̌gaghal᷊ěgehẹ̌ su ral᷊ungu akẹ dingangu manga manụ u winalangenge měmpạhuntěllạ su winangaeng.”

²¹Tangú MAWU Ruata e napakariadin kal᷊awọu binatangu l᷊audẹ̌ gaghagherẹ, dingangu kal᷊awọu haghin diadikang biahẹ̌ su ral᷊ungu akẹ, ringangu lai haghim manụ u kinoaěng. Tangú MAWU Ruata e mal᷊uasẹ̌ makasilo ene.

²²Duata e měngal᷊amatẹ̌ patikụ e kụ měngoro su riadikang biahẹ̌ su ral᷊ungu akẹ tadeạu pahuntinamba kụ pemenẹ laudẹ̌, dingangu su manga manụ u winalangeng tadeạu pahuntinamba.

²³Ene hěbi e napal᷊use kụ namal᷊ukade. Kụ ene tangú ěllo kal᷊imane.

²⁴Bọu ene MAWU Ruata e něhengetang, ”Kariadiko dunia e mapasěbang u haghim binatang u rul᷊unge, kụ mal᷊ahoro ringangu maghaghaěng, gaghuwạ arau rarodọ.” Tangú hal᷊ẹ̌ ene e nariadị e.

²⁵Kerene MAWU Ruata e nẹ̌koạ patikụ ene, kụ i Sie měngkate apạe mal᷊uasẹ̌ nakasilo ene.

²⁶ Mase MAWU Ruata e něhengetang, ”Ini e i Kitẹ dingangu mẹ̌koạko taumata kụ makoạ kere i Kitẹ dingangu mẹ̌papangawẹ i Kitẹ. I sire kai sarung mẹ̌kawasa kal᷊awọu kinạ, kal᷊awọu manụ u kinoaěng dingangu patikụ haghim binatang bal᷊ine, baewe maharo ore lai maghaěng,[4] limembong kasěllahe arau kakadodọ e.”

²⁷ Kerene MAWU Ruata e něndiadi taumata, kụ kinoạe i sire kere watangengʼE. Kinoạe i sire esẹ dingangu wawine.

²⁸Bọu ene nial᷊amatengʼE i sire ringangu něhengetang, ”Pěmpěhitẹ e pakal᷊awọ, tadeạu hitenu e mẹ̌tumanạ su kasẹ̌llahu wowon dunia ini e mase měkakawasane. I kamene Takụ ipẹ̌tangkiang kal᷊awọu haghing kinạ, manụ u kinoaěng dingangu kal᷊awọu haghing binatang dul᷊u wal᷊ine.

²⁹Makoạ kaěng i kamene tangu Takụ onggotangu haghing kakaluang mẹ̌gẹ̌gěllịu manga watune ringangu wua-bua.

³⁰Arawe waugu haghing manụ u kinoaěng dingangu binatang dul᷊u wal᷊ine e, Takụ gěllirangu pěpạ ringangu manga sasuang mědẹ̌daukalu e makoạ kaěnge.” Tangu ene nariadị e.

³¹MAWU Ruata e němanda patikụ apan seng kinoạ e ene, kụ i Sie měngkate apạe mal᷊ua-l᷊uasẹ̌. Tangú hěbi e napal᷊use ringangu namal᷊ukade. Kụ ene kai nạung ěllo kaěnnunge.