Read Sangir PĚNDARIADI 11 Bible Online

PĚNDARIADI 11 - Sangir bible

PĚNDARIADI 11

¹Nạung su tětạ e, dal᷊ohong kạguwạu dunia e mang sěmbaụ beran sire, kụ baweran sire mang mẹ̌sul᷊ung.

²Tangu piạ i sire němpangal᷊ing sol᷊ong sěmbekan daki e, ene i sire nahumpạ e su wimbaenge sěmbaụ su Babilonia, kụ bọu ene něngkatanạ sene.

³Ene i sire nahumbisarạ e sěmbaụ su wal᷊ine, ”Ěndaịko i kitẹ mẹ̌koạ batu tela kụ tongkateng pakakětị.” Telan sire e nikoạ baugu kakoạ bal᷊e ringangu terẹ̌ e waugu ral᷊abure.

⁴Angkuěng i sire, ”Ěndaịko i kitẹ měndarisị soang kitẹ dingangu měnara sěmbaụ kụ pusige manumbụ l᷊angị, tadeạu i kitẹ e tumeleng dingangu tawe mẹ̌sal᷊iawuhẹ̌ su kasěllahu dunia e.”

⁵Tangu MAWU e nẹ̌těngkatěntung ěnnaẹ mẹ̌kakělla soa ringangu měnara nạung nilanging u taumata.

⁶Bọu e i Sie něhengetang, ”I sire ini e mambeng kawanua sěmbaụ dingangu weran sire e man sěmbaụ dingangu ini e wuhụewe lai panẹ̌takengu kal᷊awọu karakin sire. Tawẹ karěngụe lai i sire sarung makatohạ baewe lai mẹ̌koạ apa tuhụewe kapulun sire.

⁷Mapiawe i kitẹ e lumintụ kụ mapẹ̌kal᷊imbuhungkon beran sire e, tadeạu i sire e tawe mahangkaěnnaěng sěmbaụ su wal᷊ine.”

⁸Kerene MAWU e něngal᷊iaesʼi sire e niapakakeke su kaguwạu dunia. Bọu e i sire něngědo e němangung soa e.

⁹Hakịu soa ene nisěbạe Babel,[24] batụu MAWU napẹ̌kal᷊imbuhungu werang kạguwạu dunia e sene, mase i sire niapẹ̌sal᷊iawuhẹ̌ su kaguwạu dunia e.

¹⁰Ini e pělahiten Sem. Dua taung samurin dalulung masaria, piạ i Sem nạung umure natimu mahasụ su taunge, i sie něhiteng anạ e esẹ arenge i Arpakhsad.

¹¹Bọu ene i sie relaing nẹ̌biahẹ̌ 500 su taunge lai, kụ nakaěbạ manga anạ e lai wal᷊ine.

¹²Su tempong i Arpakhsad nạung 35 su taunge umbure, i sie nakaěbạ anạ e esẹ arenge i Selah.

¹³Bọu ene i Arpakhsad bědang nẹ̌biahẹ̌ lai 403 su taunge, kụ nakaěbạ manga anạ e lai wal᷊ine.

¹⁴Su tempon i Selah nạung 30 su taunge umbure, i sie něhiteng anạ e esẹ arenge i Eber.

¹⁵Bọu ene i Selah reng nẹ̌biahẹ̌ lai 403 su taunge, kụ nakaěbạ manga anạ e lai wal᷊ine.

¹⁶Piạ umburʼi Eber nạung 34 su taunge, i sie něhiten anạ e esẹ arenge i Peleg.

¹⁷Bọu ene i Eber delain nẹ̌biahẹ̌ 430 su taunge, kụ něhiteng manga anạ e wal᷊ine.

¹⁸Piạ i Peleg nạung 30 su taunge umbure, i sie něhiteng anạ e esẹ arenge i Rehu.

¹⁹Bọu ene i Peleg delaing nẹ̌biahẹ̌ 209 su taunge kụ něhitem manga anạ e lai wal᷊ine.

²⁰Piạ i Rehu nạung umbure 32 su taunge, i sie něhiteng anạ e esẹ arenge i Serug.

²¹Bọu ene i Serug delaing nẹ̌biahẹ̌ 207 su taunge kụ něhiteng manga anạ e lai wal᷊ine.

²²Piạ i Serug nạung 30 su taunge umbure, i sie něhiteng anạ e esẹ arenge i Nahor.

²³Bọu ene i Serug delaing nẹ̌biahẹ̌ 200 su taunge kụ něhiteng anạ e lai wal᷊ine.

²⁴Piạ i Nahor nạung 29 su taunge umbure, i sie něhiteng anạ e esẹ arenge i Terah.

²⁵Bọu ene i Nahor delain nẹ̌biahẹ̌ 119 su taunge, kụ něhitem manga anạ e lai wal᷊ine.

²⁶Ene i Terah natimụ e 70 su taunge umbure, i sie něhiteng anạ e esẹ tatěllu, i Abram, i Nahor dingangu i Haran.

²⁷Seng ini e pal᷊ahěnton Terah: I Terah e i amang i Abram, i Nahor dingangu i Haran. I Haran něhiteng anạ e esẹ arenge i Lot.

²⁸I Haran nate su soane, isẹ̌sẹ̌bạ soan Ur su Babilonia kụ i amange reng bědang biahẹ̌.

²⁹I Abram nẹ̌kawing i Sarai, arawe i Nahor ute nẹ̌kawing i Milka anạ i Haran bawine. I Haran delaim piạ anạ e esẹ bal᷊ine, arenge i Yiska.

³⁰Arawe i Sarai ute kai wantọ.

³¹I Terah e maněntang u soan Ur su Babilonia sěngkahindọ dingangu anạ e i Abram, pulunge i Lot, dingangu i Sarai anạ e mirarating, kawingʼi Abram. I sie piạ kapulune makoạ sol᷊ong Kanaan. Kai sarangke nahumpạ u Haran, i sire tangu nẹ̌tumanạ sene.

³²Kụ su tampạ ene lai i Terah nairị umure 205 su taunge.