Read Sangir PĚNDARIADI 13 Bible Online

PĚNDARIADI 13 - Sangir bible

PĚNDARIADI 13

¹I Abram naněntangu Misirẹ̌ e kụ nakoạ sol᷊ong sěmběkan sawěnahẹ̌ mẹ̌děndol᷊ong Kanaan sěmběkan timuhẹ̌, dingangu kawinge ore lai kal᷊awọu rarotonge kụ i Lot mal᷊aing timol᷊e.

²I Abram e kai kalạ tạ sihinge; piạ dombane, kambing, sapi, ringangu sal᷊aka ore lai wul᷊aeng.

³Tangu rimal᷊engke i sie wọu tampạ sěmbaụ sol᷊ong tampạ bal᷊ine, mětẹ̌timona Betel. I sie nawunạ u wanua su wěllạu Betel dingangu Ai, su tampạ susi, su piạ i sie nạung mědẹ̌daseng su ral᷊ungu tentane,

⁴dingangu nipěndarisikangu pananěmbaěng. Kụ sene tangu i sie naněmba MAWU.

⁵I Lot mal᷊aing piạ balage, ringangu manga ěllange, ringangu manga dombane, kambing dingangu sapi.

⁶Ual᷊ingu ene ěntana sene tawe makaiěkụ děmpugě baugʼi rẹ̌dua mẹ̌tanạ, batụu manga binatang i rẹ̌dua e mamben mal᷊awọ tạ sihinge.

⁷Ene piạ pẹ̌sasasighi sutal᷊oaran měndal᷊ukadẹ̌ binatang i Abram dingangu měndal᷊ukadʼu binatang i Lotẹ̌ e (tempo ene tangu kai lai tau Kanaan dingangu tau Feris mạtanạ su wanua ene).

⁸I Abram nẹ̌bera si Lot, ”Kadua e kai anạu sěngkatau, kụ kai apạ e ral᷊akị mạeng taumatanu ringangu taumataku e kawe měmpẹ̌bẹ̌bul᷊o.

⁹Ual᷊ingu ene tangu mapiawe i kitẹ mẹ̌tal᷊ei. Pěmilẹ e měnsang su wahageang sude wọu ěntana ini e mẹ̌tatal᷊ahino su kapulunu. Mạeng i kau e sol᷊ong ini, ute iạ deng sol᷊ong timona wal᷊ine.”

¹⁰ Ene i Lot e něhengkẹ matane kụ nakasumbirị e kaguwạu Wal᷊ang Yordan sarạewen soan Zoar měngkate kalạ u akẹ, mẹ̌sul᷊ungu Winal᷊aengu MAWU[26] arau kere ěntanang Misirẹ̌. (Kerene kakakoạ e těntal᷊ang MAWU e reng tawe naminasa soan Sodom dingangu Gomora.)

¹¹Pangěnsueěnge i Lot němilẹ e kaguwạu wanua su Wal᷊ang Yordan e, kụ bọu ene nakoạ sol᷊ong sěmbekan daki. Tangu němpẹ̌tal᷊eị e i rẹ̌dua.

¹²I Abram natanạ su wanuang Kanaan, arawe i Lot e nẹ̌daseng su manga soa su wal᷊ane sarang maraning Sodom.

¹³Soang Sodom ene pẹ̌tẹ̌tanakengu taumata ral᷊akisẹ̌ tạ sihinge ringangu waradosa su těngon MAWU.

¹⁴Ene sarạeng i Lot nẹ̌tal᷊eị e, MAWU něhengetang si Abram, ”Bọu tampạ dẹ̌darisikangu ene, tinganeko pakapia-pia sol᷊ong kaihi, sol᷊ong koaneng, sol᷊ong těngonu arau likudu,

¹⁵ Takụ sarung ighěllị si kau ringangu hitenu kasěllahu wanua kinasilonu e tadeạu makoạ tataghuanengu sarang marěngụ-děngụ.

¹⁶Iạ e sarung měngonggọu hitenu e sěngapang kakěpal᷊e, hakịu tawẹ u sarang sěngkatau makarekeng si sire. Kerẹewe taumata tawe makarekeng awul᷊ẹ̌ su ěntana, kerene lai hitenu e tawe sarung i karekeng.

¹⁷Pěbuạ kụ paměpide kạguwạu ěntana ini e, batụu kai sarung Takụ gělikang si kau.”

¹⁸Bọu ene i Abram něngal᷊ingke manga tentane mase nẹ̌tanạ marěduhʼu kakaluang u jati, tampạ pẹ̌kakal᷊iomanengang su Mamre masandigu Hebron, kụ sene i sie napararisị u pananěmbaěng baugu MAWU.