Read Sangir PĚNDARIADI 14 Bible Online

PĚNDARIADI 14 - Sangir bible

PĚNDARIADI 14

¹Datu ěpạ u katau: i Amrafel bọu Babilonia, Ariokh bọu Elasar, i Kedorlaomer bọu Elam, dingangu i Tideal bọu Goyim,

²nẹ̌sekẹ dimokạ datu lima wal᷊ine: i Bera wọu Sodom, i Birsya wọu Gomora, i Syinab wọu Adma, i Semeber wọu Zeboim, dingangu ratu wọu Bela kụ isẹ̌sẹ̌bạ l᷊ai si Zoar.

³Datu i sire lima ene nẹ̌sẹ̌ngkanaung kụ něnampungu sordadon sire su Wal᷊ang Sidim, kụ orasẹ̌ ini e isẹ̌sẹ̌bạ Laudẹ̌ Nate.

⁴Karěngụ u mapul᷊o dua su taunge, i sire nikawatạ u Ratun Kedorlaomer arawe su taung kapul᷊o těllune, i sire němpěndongka kụ dimokạ si sie.

⁵Su taung kapul᷊o ěpạ e, i Kedorlaomer ringangu manga hapị e nahunděnta ringangu sordadon sire kụ namatạ tau Refaim su Asyterot-Karnaim, tau Zuzim su Ham, tau Emim su Syawe-Kiryataim,

⁶dingangu tau Hori su wawul᷊urangu Edom, bọu e něnahusu si sire sarang El-Paran su wiwihʼu wanua tạ taune.

⁷Bọu ene i sire mananahusu e němpẹ̌sul᷊e kapia kụ nẹ̌bal᷊ị sol᷊ong En-Mispat kụ orasẹ̌ ini e isẹ̌sěbạ Kades. I sire nẹ̌kawasa kasěllahu ěntanang Amalek ringangu němatạ tau Amori nạung mạtanạ su Hazezon-Tamar.

⁸Bọu ene kal᷊awọu manga ratu wọu Sodom, Gomora, Adma, Zeboim dingangu Bela nangatorẹ̌ barisang u sordadon sire su Wal᷊ang Sidim mase nẹ̌sekẹ,

⁹něndokạ manga ratu wọu Elam, Goyim, Babilonia, ringangu Elasar; kụ datu i sire lima něndokạ ěpạ u katau.

¹⁰Bědạ e ene napenẹ u pahighing aspalẹ̌, kụ piạ e manga ratun Sodom dingangu Gomora e mạhuntal᷊ang bọu pẹ̌seketang e, tangu i rẹ̌dua e něngkanawo su ral᷊ungu manga pahighi ene. Arawe ratu i sire těllu wal᷊ine apạewen nal᷊embe ute němpẹ̌tal᷊ang sol᷊ong bawul᷊urange.

¹¹Datu i sire ěpạ apạewen nakawatạ e němpěmul᷊ahọewe kal᷊awọu sabarang su Sodom dingangu Gomora, narekeng dingangu laidopẹ̌ e, mase i sire rimal᷊eng.

¹²I Lot anạu tuaring Abram e mal᷊aing měmpẹ̌tẹ̌tumanạ su Sodom, kụ ual᷊ingu ene i sie lai nitawengu rokạ dingangu kal᷊awọu rarotonge.

¹³Arawe piạ sěngkatau kụ nakatal᷊ang tangu simongo naul᷊ị u kěbịewe apan nariadi e si Abram, tau Ibrani ene. I Abram nẹ̌tanạ su rěduhu manga kakaluang u jati tampạ u pẹ̌kakal᷊iomanengang i Mamre tau Amori. I Mamre ringangu manga anạ u sěmbaụ e i Eskol dẹ̌duan Aner e kai hapị sěndědagʼi Abram.

¹⁴Piạ i Abram nakaringihẹ̌ u anạu tuarine kawe nitaweng, měngkatewe nitampunge patikụ taumata su ral᷊ungu tentane kụ apạeweng tahapẹ̌sekẹ e kakěpal᷊e 318 su kataune, bọu ene němpěnahusu datu ěpạ ene hakịu nẹ̌datingu soan Dan.

¹⁵Sene tangu i Abram namahiạ u taumatane pira-pirang kamonaěng, bọu ene něngalo sekẹ i sire su tempong hěbi sarangkewe kinawatạ. I sie něnahusu si sire sarang Hoba su sěmběkan sawěnahẹ̌ bọu soan Damsyik.

¹⁶I Abram e nakaul᷊e kal᷊awọu rarotong nitangehẹ̌, kerene lai i Lot dingangu kal᷊awọu arětạ e, dingangu manga wawine ore lai apan nitaweng bal᷊ine e.

¹⁷Ene wọuten nakawatạ Datu i Kedorlaomer dingangu manga ratu sěndědagʼi sie tangu i Abram nẹ̌sul᷊e e. Bọu e ratun Sodom dimal᷊eng nanẹ̌nsomahẹ̌ si sie su Wal᷊ang Syawe kụ mal᷊aing isẹ̌sẹ̌bạ Bal᷊ang Datu.

¹⁸ I Melkisedek, datun Salem kụ mal᷊aing měngẹ̌ngumpaedẹ̌ diabatangu imang u Ruata Karangetange nẹ̌bawa e borotẹ̌ dingangu anggorẹ̌ e waugʼi Abram,

¹⁹kụ bọu ene něngal᷊amatẹ̌ si Abram, angkuěnge, ”Karimạko Duata Karangetange nạung seng něndiadi langị dingangu dunia e, měngal᷊amatẹ̌ si Abram!

²⁰Karaloko Mawu Ruata Karangetange, kụ seng něngonggọ u kal᷊auntu si kau wọu sědụ u.” Bọu ene i Abram něngonggọ u sěngkatahạpul᷊o wọu rarotong pul᷊aho kụ seng niwawane kapia, si Melkisedek.

²¹Bọu ene něnitạe datung Sodom si Abram, ”Al᷊ạ e apal᷊iwụ pul᷊aho ene, kateweho mal᷊owọko isul᷊e si siạ e kal᷊awọu taumataku e.”

²²Arawe i Abram e simimbahẹ̌ u, ”Iạ e kai mẹ̌salu su těngom MAWU Ruata Karangetange něndiadi langị dingangu dunia,

²³u iạ e tawe rumaẹ apa sarang kadidị-didị bọu rarotongu e manilaing banaěng sěmběsụ arau tal᷊in solopẹ̌ e kai mang tala. Kụ ual᷊ingu kerene tangú i kau e tawe makapẹ̌bera u, ’Seng iạ e nakakalạ si Abram.’

²⁴Iạ e madiri wue měngal᷊ạ apa-apa waugu watangengku sẹ̌saku e. Iạ tumbạeweng mapulu rumaẹ apan seng bọu nipakẹu taumataku e. Kai walạekere manga hapịku sěndědagu iạ e, kụ i Aner, i Eskol, dingangu i Mamre e apěngal᷊ạ buạ e sěngkatau-sěngkatau e.”