Read Sangir PĚNDARIADI 19 Bible Online

PĚNDARIADI 19 - Sangir bible

PĚNDARIADI 19

¹Bọuten nakisake su anung Abraham, malaekatẹ̌ darua e nakoạ sol᷊ong Sodom kụ nahumpạ sene seng hěbi. I Lot mạiang su sasuěkang u soan Sodom e, kụ sarangke nakasilo si rẹ̌dua e, i sie rimarisị e kụ naněnsomahẹ̌ si rẹ̌dua, kụ nẹ̌těngkasumagẹ̌ su těngon dědua,

²kụ nẹ̌bera u, ”Manga mawu, otongko su wal᷊eng ěllang e, kụ pěmpanguhasẹ̌ko laedẹ̌ dingangu pěmpẹ̌hědang su wal᷊eku. Mạengbeng ute hědọen diěllo mal᷊uka-l᷊ukadẹ̌ pěmpẹ̌bangung mase pahundal᷊eng kapia.” Kaiso i rẹ̌dua e kawe simimbahẹ̌ u, ”Walạ e i kandua e mẹ̌tikị e sini sutal᷊oaran soa.”

³I Lot mẹ̌dẹ̌dorong sěngapang botonge, kụ nạdehọ i rẹ̌dua e nahundangengke su ral᷊ungu wal᷊ene. I Lot e něnadiạeng simokol᷊e masasědapẹ̌ dingangu nẹ̌tongkạ e borotẹ̌ pinakatimu kụ bọu ene němpẹ̌simokol᷊e i rẹ̌dua e.

⁴Arawe i rẹ̌dua e reng tawe němpẹ̌sohọ němpěhedang e, tau Sodom manga esẹ e seng němpěliwungke wal᷊e ene. Kěbịewe apang manga esẹ u soa ene, baewe maghaghurang arau apạeweng mangangudạ e, kụ ene sene.

⁵ I sire němpẹ̌kuị si Lot, dingangu nakiwal᷊o, ”Kai suapa i sire nahunděnta nẹ̌tikị su wal᷊enu e? Apasěbangko i rẹ̌dua e tadeạu i kami e makapẹ̌dal᷊ahapị i rẹ̌dua!”

⁶I Lot siměbang bọu wal᷊ene, kụ bọuten něhěping tukadẹ̌ e,

⁷i sie nẹ̌berako su tau Sodom e, ”Manga anạ u sěmbaụ, iạ mapulu reng mẹ̌gausẹ̌ sěngapam botonge, abe pěkoạbe hal᷊ẹ̌ dal᷊akisẹ̌ kerene!

⁸Kenang pěmpẹ̌daringihẹ̌, iạ e piạ anạku mahuala parawang duang katau. Balạe kere i rẹ̌dua e takụ isarakang si kamene kụ balạe i kamene měnsang mẹ̌koạ apa si rẹ̌dua e. Kai abe pẹ̌kapuraing kamene sakeku ini e; watụ u iạ kai harusẹ̌ mangěllung i rẹ̌dua e.”

⁹Kai angkuěng u tau Sodom e si Lot, ”Dakọe! I kau tau raghị měngatorẹ̌ si kami? Lighạ e pameho! Mạeng tawe lighạ mameho, i kau e reng koateng i kami e limembong kawěhạ e wọi rẹ̌dua ene.” Bọu ene i sire němpěnuhudẹ̌ si Lot dingangu nẹ̌tatal᷊iwungke němpaněnehẹ̌ tukadẹ̌.

¹⁰Arawe sake rarua ene němpanogore liman dẹ̌dua kụ namol᷊eng si Lot sol᷊ong dal᷊ungu wal᷊e, mase něhěping tukadẹ̌.

¹¹ I rẹ̌dua e napakawutang matan sire kěbị apang sul᷊ikudu wal᷊e ene, hakịu i sire ene tawe nakareạ tukadẹ̌ e kapia.

¹²Sake rarua e nẹ̌bera si Lot, ”Kereu i kau piạ anạ u esẹ, anạ u wawine, anạ mirarating arau apạewen mạdarekeng ěgẹ u wal᷊ine kụ matanạ su soa ini e, paringangko apạsẹ̌bang bọu ini,

¹³u soa ini e kai winasaěng i kandua. MAWU e seng nakaringihẹ̌ pangaduhang masěgadẹ̌ baugu tumanạe sini, kụ i kandua e seng nirolohẹ̌ baugu ipaminasa soan Sodom.”

¹⁴Mase limintụ e i Lot nẹsombang u kaghiangu manga anạ e rarua e kụ nẹ̌bera, ”Pakal᷊ighạbe sěbang bọu ini e, batụu MAWU e sarung mapakawinasa.” Arawe i sire tangu mạngiral᷊ing u katihọ e i Lot kai kětạeng lụlambihẹ̌.

¹⁵Su tempong kalonge, malaekatẹ̌ darua e nangosạe si Lotẹ̌ pakal᷊ighạ mẹ̌buạ. ”Pakarol᷊ạko”, angkuěng i sire. ”Dakọe paringang kawingu ringangu anạu mahuala rarua e wọu ini, tadeạu i kamene tawe mate kereu soa ini e ipakawinasa.”

¹⁶ I Lotẹ̌ e kai ghụgěnggang. Arawe MAWU e makạpěndang tụtal᷊ěntụ i sie; ual᷊ingu ene sake rarua ene něngahạ i Lot dingangu kawinge ringangu anạ e rarua sol᷊ong likudu soa.

¹⁷Bọu ene sěngkatau wọu malạekatẹ̌ ene nẹ̌bera, ”Tal᷊angke pěngambangke niawanu! Abe pěbihu sol᷊ong likudẹ̌ dingangu abe kaědung su wal᷊ane. Tal᷊angke sol᷊ong bawul᷊urang e, tadeạu i kamene kumbahang mate!”

¹⁸Arawe i Lot simimbang, ”Kasiang! Mawu, kumbahangbe i kami irolohẹ̌ sol᷊ong bawulurange.

¹⁹Mamben těngadẹ̌, u mawu e seng limembom makatul᷊ungu iạ dingangu makaambang niawaku. Kaiso wawul᷊urange ene e kai apạe marau; kụ kibasịu iạ e kai karahiuangu kawawinasa e kụ mate reng tawẹ nahumpạ sene.

²⁰Kakělla su těngone pai, piạ soa kadodọ kụ tawe tumanịu marau. Kụ iạ e apatal᷊angko sol᷊ong pai ene tadeạu maambang.”

²¹Malaekatẹ̌ e simimbang, ”Kerenẹ e, soa kadodọ ene e tawe takụ bal᷊intuikang.

²²Lighạ e tal᷊ang! U iạ e ren tawe makakoạ apa-apa těntal᷊ang i kau e ren tawe nahumpạ paị sene.” Ual᷊ingu i Lot kawe nẹ̌sẹ̌bạu soa ene kadodọ, ute soa ene nisěbạe Zoar.[34]

²³Matangěllo e kai kạsěpụ e piạ i Lot nahumpạ su Zoar.

²⁴ Sěngkianu MAWU e naparasehu tahiti malelang dụděllị su wowong soan Sodom ringangu Gomora.

²⁵Soa rarua ene nikal᷊iune ringangkewen kạguwạu wal᷊ane ringangu patikụ kakaluang dingangkewelaim patikụ měmamanuane sene.

²⁶ Arawe kawing i Lot nẹ̌bihuko l᷊ikudẹ̌, kụ bọu ene i sie nẹ̌bal᷊ui nakoạ tuidẹ̌ asing.

²⁷Sěngkariọěllone mal᷊uka-l᷊ukadẹ̌, i Abraham masahawụ-sahawụ nakoạ sol᷊ong sěmpalang nạung dẹ̌darisikange su těngon MAWU e sahěllo kal᷊imona wọu ene.

²⁸I sie němanda sol᷊ong Sodom dingangu Gomora dingangu kasariạewen bal᷊ane kụ i sie nakasilọe tipu tụtiwuạ bọu wanua ene, al᷊ingkai tipun dapuhang gagherẹ.

²⁹Kerene nạung piạ Duata naminasa kal᷊awọu soa su wal᷊ane su katatanakeng i Lot, Mawu e nakatahěndung si Abraham dingangu nẹ̌tul᷊ung i Lot niapatal᷊ang u watangenge.

³⁰Ual᷊ingu i Lot matakụ mangindunụ su Zoar, tangu i sie nakoạ e sol᷊ong bawulurange dingangu anạ e rarua wawine, mase nẹ̌tanạ su ral᷊ungu liang sěmbaụ.

³¹Anạ e wawine i akang nẹ̌berạ su tuarine, ”I amang i kadua e kai seng maghurang, dingangu su kaguwạu wanua[35] ini e tawẹ apa manga esẹ kụ makapẹ̌kawing i kadua kụ makareạ hite.

³²Ěndaị e i kadua mapěnginungkeng amang i kadua e, kụ bọu ene i kadua e mẹ̌tikị dingange tadeạu makareạ pal᷊ahite.”

³³Tangu hěbịewe ene i rẹ̌dua napěnginung i amang i rẹ̌dua e anggorẹ̌, mase anạ e i akang e nẹ̌tikị dingang i amange; arawe i amange e mang běga maěllị měnsang apa nariadi e kahiam bukange.

³⁴Sěngkariọěllone i akang e nẹ̌berạe su tuarine, ”Ene mẹ̌kělaeng ini e iạ nẹ̌tikị su rěduhi amangku e! Kụ měntehang hěbi e i kadua saụko mapěnginung i amang i kadua e lai. Mase pẹ̌tikịe i kau su rěduhe. Kụ mědeạu i kadua e lawọ makaěbạ pělahite wọu i amang i kadua.”

³⁵Tangu hěbịewe lai ene i rẹ̌dua e napakawukang i Lot, kụ anạ e karuane e nẹ̌tikị su rěduhe. Kụ i Lot měngkate apa wukang matědụ hakịewem běga maěllị měnsang apạe nariadi.

³⁶Ene anạ i Lot darua e nẹ̌pohiamạ e kěbị bọu i amang i rẹ̌dua e.

³⁷Anạ e i akang němantelu anạ esẹ siněbạ e si Moab.[36] I sie nakoạ i upungu tau Moab orasẹ̌ ini.

³⁸Tuari e mal᷊ain namantelu anạ esẹ, siněbạ e si Ben-Ami.[37] I sie nakoạ i upung u tau Amon sarạeweng ini e.