Read Sangir PĚNDARIADI 2 Bible Online

PĚNDARIADI 2 - Sangir bible

PĚNDARIADI 2

¹Tangu naghanape pěndariadi kasěllahu runia patikụ e.

² Su ěllọ e kapitune, Duata e něngěnsuẹeng munaranʼE, kụ bọu ene něngirul᷊e.

³Ene nial᷊amatengʼE ěllo kapitune ene kụ kinoạ e ěllo tani, u su ěllo ene Mawu Ruata e něngirul᷊e wọu napakauadipʼu munaranʼE.

⁴Seng ene e wěken pěndariadi runia patikụ. Piạ e nạung Mawu Ruata něndiadi runia patikụ,

⁵kụ den tawẹ bine lụhětị dingangu reng tawẹ apa manga sasuang su dunia ini, ual᷊ingu Mawu Ruata e ren tawe napạdasehẹ̌ ringangu ren tawẹ apa taumata waugu pẹ̌kẹ̌karadiahang ěntana ene.

⁶Kaiso akẹ e nanětạ e nẹ̌giasẹ̌, bọu al᷊unge wawa kụ něholọ e wowon dunia e.

⁷ Bọu ene MAWU Ruata e něngal᷊ạ e ěntana sěngkodọ, kụ niluhude nakoạ sěngkatau taumata,[5] bọu e nitiukangu singongo mamiahẹ̌ e sorong dal᷊ungu lohangu irunge; kụ nẹ̌biahe taumata ene.

⁸Bọu ene MAWU Ruata e nẹ̌koạ e winal᷊aengu Eden, su sěmbẹ̌kan daki, kụ piněllọʼE sene taumata nạung seng kinoạʼE ene.

⁹ MAWU Ruata e napatuwong haghing kalu maral᷊enggihẹ̌, měbẹ̌buam buane mapia, su ral᷊ungu winal᷊aeng ene timuwọe kakaluang kụ makaonggọu pẹ̌bawiahẹ̌, dingangu kalu makạkasingkạu kawe mapia ringangu ral᷊akị e.[6]

¹⁰Sal᷊ụ sěmbua nelehẹ̌ bọu Eden, něholo winal᷊aeng ene; kụ sul᷊ikudʼu Eden tangu sal᷊ụ ene napahiạ ěpạ u kalělangeng.

¹¹Lelange humotong isẹ̌sẹ̌bạ Pison; sal᷊ụ ene nelehẹ̌ nělikụ ěntanang Hawila.

¹²Kụ sene tangu kaěbakeng bul᷊aeng sahị ringangu lai kal᷊awọu haghim běngi kụ masigěsạ kaěbakeng dingangu manga watung paramata.

¹³Lelange karuane isẹ̌sẹ̌bạ Sal᷊ụ u Gihon; akene nelehẹ̌ nělikụ ěntanang Kus.[7]

¹⁴Lelange katěllune isẹ̌sẹ̌bạ Sal᷊ụ u Tigris kụ limiu nẹ̌batụ sěmběkan daki wọu wanuang Asyur. Lelange kaěpạ e isẹ̌sẹ̌bạ Sal᷊ụ u Efrat.

¹⁵Bọu ene MAWU Ruata e naměllọu taumata ene su winal᷊aengu Eden mědeạu pělẹ̌hal᷊ẹ̌ pẹ̌kẹ̌karadiahang mẹ̌padul᷊i winal᷊aeng ene.

¹⁶MAWU Ruata e něhengetang su taumata ene, ”I kau e wotonge kumaěng bọu patikụ haghim buang kalu su winal᷊aeng ini,

¹⁷tabeạu katewe wọu kalu makạkasingkạu mapia ringangu ral᷊akisẹ̌. Buane tangu kumbahangbe kanengang batụu kamagengu i kau kumaěng, ute i kau e sarung mate lai su ěllo ene.”

¹⁸Mase MAWU Ruata něhengetang, ”Dal᷊aị taumata e mẹ̌biahẹ̌ sẹ̌sane. Iạ e kai sarung mẹ̌koạ dingangu mẹ̌tatal᷊ahino waugu mẹ̌sasumbalane.”

¹⁹Tangu i Sie něngal᷊ạ e ěntana kạdodọ dingangu něluhude haghim binatangu rul᷊unge ringangu binatangu kinoaěng. Kěbị e niwawan Duata su anun taumata e tadeạu makasilo kai areng apa sarung gěllirange su manga binatang e. Seng ene e panẹ̌takengu manga binatang u rul᷊unge ringangu binatangu kinoaěng e nakahombang arenge sěmbaụ-sěmbaụ.

²⁰Kerene taumata e nẹ̌gěllịu arenge su patikụ binatang su rul᷊unge ringangu kinoaěng. Kaiso tawẹ u sorong sěmbaụ bọu tal᷊oaran sire kụ makoạ hapị e kụ mẹ̌tatal᷊ahino makoạ sumbalane.

²¹Tangu MAWU Ruata e napẹ̌tikịu taumata pinakal᷊ěnabẹ̌, kụ těntal᷊angke i sie kạtikị e, Mawu Ruata e něngal᷊ạ husụ e sěmbua wọu wal᷊unangu taumata ene, mase ěnnạ e nitamingu ghěsi e.

²²Bọu husụ ene tangú, Mawu Ruata e něluhudẹ̌ sěngkatau wawine, kụ niwawane sorong anun taumata ene.

²³Tangu nẹ̌berạ e taumata ene, ”Ini e i sie taumata e kụ mẹ̌sul᷊ungu iạ e ruhine wọu ruhiku ringangu ghẹ̌sine wọu ghẹ̌siku. Takụ isěbạ i sie wawine, ual᷊ingu i sie kai nial᷊ạ bọu esẹ.”[8]

²⁴ Ual᷊ingu ene tau esẹ e maněntang i amange ringangi ninange, kụ mẹ̌těngkasěmbaụ dingangu kawinge kụ irẹ̌dua e makoạ sěmbaụ.

²⁵Esẹ dingangu wawine e těntol᷊e, kai i sire e tawe nakapěndang mamea.