Read Sangir PĚNDARIADI 20 Bible Online

PĚNDARIADI 20 - Sangir bible

PĚNDARIADI 20

¹I Abraham něngal᷊ing bọu Mamre sol᷊ong ěntanang Kanaan sěmběkan timuhẹ̌ kụ nangindunụ nẹ̌tanạ su wěllạ u Kades dingangu Syur. Tawe nararěnnạ wọu ene, i sie nẹ̌tanạ su Gerar,

² kụ i sie naul᷊ị u kawinge i Sara e kai tuarine. Ual᷊ingu ene Datu i Abimelekh bọu Gerar nangorọ rarolohange piněmaringang si Sara pạděnta su anune.

³Piạ su sěhěbi Ruata e nẹ̌těngkatodẹu watangenge su ratu ene su ral᷊ungu ipi, kụ nẹ̌bera, ”I kau e sarung mate, batụu i kau e něngal᷊ạbe tau wawine ěndaị e; u i sie kai seng piạ kawinge.”

⁴Kai i Abimelekhẹ̌ wědamben tawe nạnenggehẹ̌ si Sara, tangu angkuěngu ratu ene, ”U Mawu, iạ e tawẹ sal᷊aku. Kụ měnsang Mawu e sarung mapakawinasang iạ dingangu kawanuaku ngae?

⁵I Abraham sẹ̌sane naul᷊ịu wawine ěndaị e kai tuarine, ringangu kawe lai i sie naul᷊ị u kerene. Kụ iạ e nẹ̌koạ ene ringangben naungku wurẹ̌si, kụ iạ e tawẹ apawe sal᷊aku.”

⁶Tangu Ruata e simimbang su ral᷊ungu ipi u, ”Těngadẹ̌ Iạ e nasingkạ u i kau e nẹ̌koạbe ringangu naungu wurěsi. Ual᷊ingu ene Iạ e seng nametọ i kau mẹ̌koạ dal᷊awangu si Siạ, kụ Iạ e tawe mapakawalang kau e manenggehẹ̌ bawine ěndaị e.

⁷Kai orasẹ̌ ini e, sul᷊e e i sie su kawinge. Kawinge kai sěngkatau nabi, kụ i sie sarung mẹ̌kal᷊iomaneng baugi kau e tadeạu i kau tawe mate! Kai kamagengu i kau e tawe manul᷊en sie, pẹ̌tahěndung, i kau ringangu patikụ kawanuanu e sarung mate!”

⁸Sěngkariọěllone mal᷊uka-l᷊ukadě e, i Abimelekh nẹ̌kui kal᷊awọu mělẹ̌hal᷊ẹ̌ e kụ nẹ̌běke si sire kal᷊awọu apan nariadi e. I sire měngkate apa něngkatakụ.

⁹Bọu ene i Abimelekh nẹ̌kui si Abraham dingangu nẹ̌bera, ”Kai apạe nạung seng nikoạu e si kami? Kai apa sal᷊aku e si kau hakịu i kau e naparěntang hombang ini su watangengku ringangu kararatuangku? Mamben tawe hinone i kau e mẹ̌koạ kerene si siạ e.

¹⁰Unụe i kau nẹ̌koạ kerene?”

¹¹I Abraham simimbang, ”Su naungku e su sěmpalang ini mang tawẹ taumata mạtakụ u Ruata, hakịu iạ e sarung pateěngu taumata lụěnningu kawingku.

¹²Tapengu i sie kawe lai wawineku. I kandua e kawe i amang sěmbaụ, kai kawe nẹ̌dal᷊ahae inang, kụ bọu ene i kandua e nẹ̌kawing.

¹³Tangu piạ e Ruata rimolohu iạ apěnẹ̌něntang u wal᷊eng amangku mase pinẹ̌papalilị u wanua raghị, tangu iạ nẹ̌berạ e su kawingku, ’Todẹko satianu si siạ kụ paul᷊i suapan taumata u iạ ini e kai mahuanenu.’ ”

¹⁴Ene i Abimelekh nanul᷊ẹ̌en Sara si Abraham, kụ su tempo ene i sie nangonggọeng manga ěllang e esẹ dingangu wawine, domba ringangu sapi.

¹⁵Angkuěngu ratu ene si Abraham u, ”Seng ini e kasěllahu wanuaku; kụ katanạe pẹ̌banua walạewe měnsang suapa mẹ̌tatal᷊ahino su kapulunu.”

¹⁶Mase nẹ̌bera si Sara, ”Tuhangu seng bọu nighěllirangu roitẹ̌ sal᷊aka sěhiwu su kal᷊ěpane koạ kere tatiala waugu patikụ taumata u i kau e mamben těnga-těngadẹ̌ tawẹ sal᷊ane.”

¹⁷MAWU e seng napakawantọ u kal᷊awọu manga wawine su istanang Abimelekh ual᷊ingu hal᷊ẹ̌ u piạ i Sara kawingʼi Abraham ene. Mase i Abraham nẹ̌kal᷊iomaneng su Mawu Ruata, kụ Ruata e napakaul᷊eng Abimelekh, kawinge ringangu manga ěllange wawine, hakiụ manga wawine ene e nakapěhěnding kapia.