Read Sangir PĚNDARIADI 21 Bible Online

PĚNDARIADI 21 - Sangir bible

PĚNDARIADI 21

¹MAWU e něngal᷊amatẹ̌ si Sara, timuhụewe kere seng nikědonʼE.

² Su tempọewe seng nipoěngu Ruata e, piạ i Abraham nạung seng maghurang tangu i Sara e piạ e kapapia kụ něhěndingkeng anạ e esẹ.

³I Abraham tangu nẹ̌sěbạe areng u rariọ ene si Ishak;

⁴ kụ sarạeng i Ishakẹ̌ e umbure natimụe kaual᷊u ěllone, i Abraham nakisunatʼi sie natuhụewe su parentang Duata.

⁵I Abraham natimụe 100 su taunge umbure piạ i Ishak piněhěnding.

⁶I Sara tangu nẹ̌bera, ”Duata e seng napal᷊ěgen[38] iạ e kahian dal᷊uasẹ̌. Apạewen taumata nakaringihẹ̌ hal᷊ẹ̌ ini e sarung luměge mahul᷊uasẹ̌ dingangku.

⁷Bọu ene relaing něbera u, ”Kai i sai nạung kanini e nakawera su kawingku u iạ kai sarung mapasusun dariọ? Kutẹu nạung iạ kawe relain nakapěmantelẹ̌ manịeng kawingku e seng tumanịu maghurang.”

⁸Dariọ ene nahuntinambang kasěllahe, kụ su ěllọeng i sie manětạ e ghaẹ̌kang bọu susu e, i Abraham tangu někoạko sal᷊iwang gěguwạ.

⁹Piạ su sahěllo Ismael, anạ i Abraham dẹ̌duang Hagar wawineng Misirẹ̌ ene e kapẹ̌tẹ̌taghunalange si[39] Ishak, anạ i Sara.[40]

¹⁰ I Sara nakasilọ e hal᷊ẹ̌ ene kụ nẹ̌bera si Abraham, ”Tokol᷊ẹ̌ko ěllang bawine ene ringangu anạ e. Tawe wotonge anạ u tau wawine ene makareạ bahageange wọu rarotongu kụ makoạ pusakạ u anạku i Ishak.”

¹¹I Abraham mamben tawẹ karal᷊uase su těgu ene, batụu i Ismael kawe lai anạ e.

¹² Kai Mawu Ruata e něbera si Abraham, ”I kau e abe ghěnggangu ěllangu i Hagar dingangu anạ e ene. Tuhukeko kapulun Sara, u kai wọu anun Ishakẹ̌ e i kau sarung makahombang hitenu kerẹewe seng Takụ kinědo e.

¹³Kerene lai su anạ i Hagar sarung Takụ gěllirangu anạ pulung mal᷊awọ tadeạu i sire makoạ kawanua sěmbaụ. Batụu i sie mal᷊aing anạu.”

¹⁴Sěngkarịěllone mal᷊uka-l᷊ukadẹ̌, i Abraham něngonggọu kaěng dingangu akẹ sěngkawihẹ̌ sinasạ i Hagar suraral᷊engang. I sie nělěngkangko lain dariọ e su pal᷊ukang Hagar, kụ rimolohu wawine ene pinakapul᷊ẹ. Mase nẹ̌buạ e i Hagar kụ nẹ̌palilị su kěhu l᷊inggim Bersyeba.

¹⁵Sarang akẹ su kawihe nal᷊esạ e, i Hagar naměllọkon dariọ su al᷊ungu ghahundunge,

¹⁶mase naiangke manga piạ u mahasụ su metere karaune wọu tampạ ene. Ungkuěnge su ral᷊ungu naunge, ”Iạ e tawe makakědang makasilo kakateng anạku e.” Bọu ene kimiạ e i sie.[41]

¹⁷Duata e nakaringihe tingihʼi Ismael, kụ bọu l᷊angị e malạekatu Mawu e nẹ̌bera si Hagar, angkuěng, ”Kai apạe makasusa ral᷊ungu naungu e Hagar? Abe katakụ. Ruata e seng nakaringihẹ̌ tingihu anạ u.

¹⁸Dakọe kakoạ sol᷊ong anung anạ u e, sapuạ e kụ sal᷊iwuhẹ̌ko rariọ e. Iạ kai sarung mapakariading hitenu e makoạ sěmbaụ kawanua masěllahẹ̌.”

¹⁹Mase Ruata e namekesẹ̌ matang Hagar kụ nakasilo mal᷊ahẹ-lahẹ u kai piạ pahighi sěmbaụ. Tangu i sie měngkatewe tamai něloho kawihe ringangu akẹ, mase napěnginungu anạ e.

²⁰Duata e ruměndingang si Ismael. Dariọ nahuntinambang kasěllahe; kụ i sie nẹ̌banua su kěhu L᷊inggim Paran, kụ nakoạ tahapěnganụ pelesa.

²¹I ninange napẹ̌kawing i sie ringangu tau wawine wọu wanuan Misirẹ̌.

²² Su tempo ene Ratu i Abimelekh dẹ̌duan těmbonangu mẹ̌sasekẹ i Pikhol e němpẹ̌songo su anung Abraham kụ nẹ̌bera, ”Ruata e měngkai rụděndingang si kau su ral᷊ungu patikụ apạeweng kẹ̌koatengu e.

²³Ual᷊ingu ene tangu pẹ̌saluko sini su těngon Duata u i kau e mamben tawe měngakal᷊ẹ̌ balạewe si siạ arau walạewe su manga anạku, arau hiteku. Kerẹewe lai iạ seng nẹ̌koạ mapia si kamene, pẹ̌koạko l᷊ai kerene si siạ dingangu su patikụ banua kẹ̌katanakengu ini e.”

²⁴Ene i Abraham simimbang angkuěng, ”Iạ mẹ̌salung ene.”

²⁵Arawe wọu ene i Abraham kai nạung nẹ̌sasěsilli Abimelekh mạanung pahighi sěmbaụ kawe seng nịpapul᷊ahong manga ěllangu ratu ene.

²⁶I Abimelekh nẹ̌bera, ”Iạ e wěga wue měnsang i sai piạ kakanoạ e. Tawẹ běke reng i kau naul᷊ị u ene si siạ, kụ seng ini e kahumotongangu iạ nakaringihẹ̌ hal᷊ẹ̌ ene.”

²⁷Mase i Abraham nangonggọu domba ringangu sapi piram baụ si Abimelekh, kụ i rẹ̌dua e němpẹ̌koạ e pẹ̌kakědo.

²⁸I Abraham něhae anạ u domba pitumbaụ bọu ghal᷊ipohon dombane,

²⁹kụ i Abimelekh nakiwal᷊o si sie, ”Kawe unụe i kau nẹ̌koạ kerene?”

³⁰I Abraham simimbang, ”Daekẹ e anạ u domba pitumbaụ ini e tatialang i Tuange akorẹ̌ bue u kawe iạ němangka pahighi ini.”

³¹Kai kerene hakịu sěmpalang ene e kawe nisěbạ Bersyeba,[42] ual᷊ingu kawe sene i rẹ̌dua e nẹ̌taingu pẹ̌kakědo.

³²Bọuten i rẹ̌dua nẹ̌koạ pẹ̌kakědo su Bersyeba, i Abimelekh dẹ̌duan Pikhol nẹ̌sul᷊e su wanuan tau Pilistin.

³³Mase i Abraham nẹ̌suangu kalun tamariska sěngkalu su Bersyeba kụ nanětạ bọu ene sěmpalang ene e nikoạ e waugu ipẹ̌suba MAWU, Ruata kakalẹ̌.

³⁴Bọu ene i Abraham nẹ̌tanạ diọ mararěna su wanuan tau Pilistin.