Read Sangir PĚNDARIADI 22 Bible Online

PĚNDARIADI 22 - Sangir bible

PĚNDARIADI 22

¹ Apam pira ěllo tuhụ e tangu Mawu Ruata namanikạ kasasatiang Abraham, Ruata e nẹ̌kui, ”Abraham!” Mase i Abraham simimbang, ”O Mawu.”

² Angkuěng u Ruata, ”Dakọe kakoạ sol᷊ong ěntanang Moria dingang i Ishak, anạu man sěmbaụ, anạu ikẹ̌kěndagu. Paị sene, su wul᷊ude sěmbua kụ sarung Takụ i těbọ si kau e tangú, gěllịko anạ u koạko kere sasěmba tẹ̌tutungang baugu Iạ.”

³Sěngkariọěllone mal᷊uka-l᷊ukadẹ̌, i Abraham němengesẹ̌ manga kalun sasěmba, mase kal᷊awọu kalu ene nịlaikị e su wowong kalidene. I sie nẹ̌buạ dingangu anạ e i Ishak dingangu ěllange ruang katau sol᷊ong tampạ kụ nipaul᷊ị u Ruata e si sie.

⁴Su ěllo katěllune tangu kinasilọeng Abraham tampạ sěmpalang ene wọu maraune.

⁵Mase i sie nẹ̌bera su ěllange rarua u, ”Katanạko i rua sini ringangu kalide ini. Iạ dingangu anạku e reng tamai maněmba MAWU e, kụ hědon saụ mẹ̌sul᷊e su anun dua.”

⁶Ene i Abraham nělěngkangkeng kalu waugu sasěmba tutungange su wěmbang i Ishak, arawe i sie ute nẹ̌bawa putung dingangu pisọ. Ene i rẹ̌dua e kạpahundal᷊enge,

⁷i Ishak nakiwal᷊o, ”Amang!” I Abraham simimbang, ”Kai piạ apa amang?” Ishak nakiwal᷊o, ”I kadua e kai seng nẹ̌bawa putung dingangu kalu, kụ kai suapa tangu anạ u domba waugu sasěmba tutungang e?”

⁸I Abraham simimbang, ”Duata e sẹ̌sane sarung manadia anạ u domba ene.” Mase i rẹ̌dua e měngkate rimal᷊eng.

⁹ Ene piạ i rẹ̌dua nahumpạ e su tampạ sěmpalang kụ nihabarʼu Ruata si Abraham, kụ i sie něndarisị u pananěmbaěng sěmbaụ kụ něhunsudẹ̌ kalu ipěndikọ e su wowone. Mase nihapuse anạ e kụ niparal᷊oka su pananěmbaěng su wowong kalu lahunụ e.

¹⁰Bọu ene i sie něngal᷊ạ e pisọ e kụ měmatẹewe anạ e.

¹¹Kai malaekatʼu MAWU e kimui si sie wọu l᷊angị e, ”Abraham, Abraham!” Sasimbang i Abraham, ”O Mawu!”

¹²”Abe pěnunsara rariọ ene arau abe pẹ̌kapurai i sie,” angkuěngu Mawu Ruata e wọu tingihu malaekatẹ̌ ene. ”Kụ ini iạ masingkạ e u i kau mạngadatẹ̌ dingangu matuhụ si Siạ e, ual᷊ingu i kau tawẹ kụdirine waugu měnarakangu anạ u mang sěmbaụ ene si Siạ.”

¹³Mase i Abraham němanda kaihi ringangu koaneng kụ nakasilọ e domba esẹ sěmbaụ nakaị u sungene su ghahundunge. Tangú i Abraham měngkatewe tamai něngal᷊ạ domba ene kụ siněmbane su MAWU kinoạ e sasěmba tutungang piněngal᷊uang anạ e.

¹⁴I Abraham nẹ̌sẹ̌bạu sěmpalang ene, ”MAWU e něndiahing[43] apang gẹ̌gausang.”[44] Kụ sarạeweng orasẹ̌ ini e lai taumata e nẹ̌bera u, ”Su wul᷊udʼu MAWU něndiahing apang gẹ̌gausang.”

¹⁵Sěnsul᷊ekol᷊ai wọu l᷊angị malaekatʼu MAWU e kimui si Abraham,

¹⁶ ”MAWU něhengetang: Iạ e mẹ̌salu ringangu areng-Ku sẹ̌saku u i kau nẹ̌koạ kerene ringangu tawẹ kụdirine měnarakangu anạ u mang sěmbaụ ene si Siạ,

¹⁷ kụ Iạ sarung měngal᷊amatẹ̌ si kau iapẹ̌dal᷊embo ringangu mapakakěpal᷊u hitenu kere wituing su l᷊angị dingangu kere kal᷊awọu ěnne su wiwihu apeng. Kụ manga hitenu e sarung mamatạ kal᷊awọu rokạ i sire.

¹⁸ Patikụewe umatẹ̌ su dunia sarung gumahiorọ su těngo-Ku mědeạu Iạ měngal᷊amatẹ̌ si sire kerẹewe hitenu e seng Takụ nial᷊amateng — batụu i kau seng timuhụ laoro-Ku.”

¹⁹Bọu ene nẹ̌bal᷊ị e i Abraham sol᷊ong anung manga ěllange rarua, kụ bọu e i sire natamai sěngkatamai sol᷊ong Bersyeba, kụ i Abraham nẹ̌tanạ sene.

²⁰I Abraham piạ tuhange isẹ̌sẹ̌bạ si Nahor. Samuring piạ apa nariadi su Wul᷊udu Moria, i Abraham nakaringihẹ̌, u i Milka, kawing i Nahor seng piạ anạ e esẹ ual᷊ung katau, kụ kai;

²¹i Us, anạ e i akang; i Bus, tuarine; i Kemuel, nạung samurine nakoạ i amang i Aram;

²²i Kesed, i Hazo, i Pildas, i Yidlaf, dingangʼi Betuel,

²³kụ bọu ene nakoạ i amang i Ribka. Kụ ene ute i sire ual᷊u anạ piněhanạ i Milka si Nahor tuhang i Abraham.

²⁴I Nahor piạ kapapuěnge i Reuma ringangu kapapuěnge ene i sie něhanạ i Tebah, i Geham, i Tahas dingangu i Maakha.