Read Sangir PĚNDARIADI 25 Bible Online

PĚNDARIADI 25 - Sangir bible

PĚNDARIADI 25

¹I Abraham nẹ̌saụko l᷊ai nẹ̌kawingu sěngkatau wawine isẹ̌sẹ̌bạ si Ketura.

²Kawinge e namantelu pal᷊ahanạ e: I Zimran, i Yoksan, i Medan, i Midian, i Isybak, dingangu i Suah.

³I Yoksan i amang i Syeba rěduan Dedan, dingangu hěnton Dedan e ute kai tau Asyur, tau Letus, dingangu tau Leum.

⁴Manga anạ i Midian ute: I Efa, i Efer, i Henokh, i Abida ringangu i Eldaa. I sire kěbị e mang pal᷊ahěntong Ketura.

⁵Manilaing i Abraham mapal᷊ohong kal᷊awọu rarotonge si Ishak,

⁶kaiso karěngụeweng i sie reng bědang biahẹ̌, i sie měgẹ̌gẹ̌llịu l᷊aonggọ maral᷊awọ su manga anạ e su manga wawine wal᷊ine. Bọu ene manga anạ e ene nirolohe sol᷊ong banua wal᷊ine su sěmběkan daki wọu Kanaan tadeạu mẹ̌těngkaraung Ishakẹ̌ anạ e.

⁷I Abraham napohong umbure seng marangẹ, kụ kai 175 su taunge.

⁹I sie nilěbing u manga anạ e, i Ishak dẹ̌duang Ismael, su liangu Makhpela kụ kaẹ̌bakeng su rahami su sěmbẹ̌kan daki wọu Mamre. Nạung kal᷊amona rahami ene e kai tataghuaneng i Efron anạ i Zohar tau Het,

¹⁰ kaiso seng niwaehang i Abraham bọu tau Het ene. I Sara kawing i Abraham e, mal᷊aing nilěbing sene.

¹¹Sarangke i Abraham napohong, Duata e něngal᷊amatẹ̌ si Ishak, anạ i Abraham. Su tempo ene i Ishak natanạ su rěduhu pahighi isẹ̌sẹ̌bạ, ”I Sie Kụ Měkẹ̌kakělla si Siạ”.

¹²I Ismaelẹ̌ e kai anạ i Abraham dẹ̌duan Hagar, bawineng Misirẹ̌, ěllang i Sara e.

¹³I Ismael piạ anạ e mapul᷊o dua su kataune pẹ̌tatuhụ bọu kaiakanenge: I Nebayot, i Kedar, i Adbẹel, i Mibsam, i Misyma, i Duma, i Masa, i Hadad, i Tema, i Yetur, i Nafis dingangu i Kedma. Kal᷊awọu manga anạ esẹ ene e nakoạ i upung kal᷊awọu hěnto mapul᷊o dua e, mase soane ringangu pẹ̌darasengang i sire e nisěbạewe timuhụ areng i sire.

¹⁷I Ismaelẹ̌ umbure nịdating 137 su taunge piạ i sie naminsul᷊u singongone.

¹⁸Hitene mẹ̌tẹ̌tanạ su wanua su wěllạu Hawila ringangu Syur su sěmběkan dakị wọu Misirẹ̌ tụtatěngo Asyur. I sire měbẹ̌biahẹ̌ mạl᷊ahae wọu pal᷊ahěntong Abraham bal᷊ine e.

¹⁹Seng ini e pal᷊ahěntong Ishak, anạ i Abraham.

²⁰I Ishakẹ̌ e umbure ěpạ u pul᷊o su taunge piạ i sie nẹ̌kawing i Ribka wawineng Laban anạ i Betuel, sěngkatau tau Aram bọu Mesopotamia.

²¹Ual᷊ingu i Ribka e tawe nakaěbạ anạ e, i Ishakẹ̌ e nẹ̌kal᷊iomaneng su Mawu Ruata waugu kawinge. Kụ MAWU e rimaringihẹ̌ kakal᷊iomaneng i Ishak, kụ i Ribkạ e nẹ̌pohiama.

²²I sie nẹ̌pohiamang anạ e hindua, kụ kal᷊amonang manga rariọ ene e piněhěnding, manga rariọ kai mẹ̌sẹ̌sasěngkelẹ̌ su ral᷊ungu pal᷊ahuanakeng. Angkuěng i Ribka, ”Unụe hombang ini e kawe naěnsạ su watangengku?” Bọu e i sie nẹ̌dorong tatualagẹ̌ su MAWU.

²³ MAWU e něhengetang si sie, ”Kai umatẹ̌ duang kawanuaěng su ral᷊ungu pal᷊ahuanakeng u; i kau e sarung měhěndingu ruang kawanuaěng kụ měmpẹ̌sẹ̌sitori; tuari e sarung limembong katoghase wọu i akang, mase i akang e mẹ̌tangkiang tuari.”

²⁴Ene nidatingken tempone i Ribka e mamantelẹ̌, kụ i sie němantelu anạ esẹ hindua.

²⁵I akang e awạ e měngkate mahamụ, dingangu pisine mẹ̌sul᷊ungu kakingkaeng dukụ u binatang. Ual᷊ingu ene i sie nisěbạ si Esau.[47]

²⁶Su tempong anạ tuari e kinawantelẹ̌, l᷊imane e měngẹ̌ngumpaedẹ̌ pakelʼi Esau. Ual᷊ingu ene hakịu i sie nisěbạ si Yakub.[48] I Ishak umbure ěnnungu pul᷊o su taunge piạ i rẹ̌dua e kinawantelẹ̌.

²⁷Manga rariọ darua e seng kakạsariane. I Esau nakoạ tahapěnganụ kụ puluange matanạ su kěhu, arawe i Yakub tangu mal᷊emudẹ̌ kụ puluange měngkate su wal᷊e.

²⁸I Ishakẹ̌ e limembom makěndagẹ̌ si Esau, batụu i Ishakẹ̌ e puluang kuminạ gẹ̌sing binatang u anụ. Arawe i Ribka e limembong mapia si Yakub.

²⁹Piạ su sahěllo piạ i Yakub kapěnẹ̌nasạ e ghul᷊e tumbuẹ mahamụ, ene nasongọe i Esau wọuten něnganụ e. I sie nahutung.

³⁰Angkuěnge si Yakub, ”Iạ e kai nahutung-hutung. Mẹ̌dorongko kadodọ gul᷊e tumbuẹ mahamụ ene.” (Kai ual᷊ingu ene hakịu i sie nisěbạ si Edom.)[49]

³¹Angkuěng i Yakub, ”Kerenẹ e, asal᷊u i kau e měngonggọu hakẹ̌ u anạ i akange kal᷊imona.”

³²Angkuěng i Esau, ”Kai anuang apa kal᷊aiakang ene e si siạ. Ěndaung iạ e seng matẹeng kal᷊ahutung!”

³³ Angkuěngkeweng Yakub u, ”Pẹ̌salụ e kal᷊amona u hakẹ̌ u kal᷊aiakangu e sarung ionggọ si siạ.” I Esau nẹ̌salụ e kụ nangonggọu kal᷊aiakange si Yakub.

³⁴Bọu ene i Yakub nangonggọu borotẹ̌ si sie, ringangu sěnggạ e wue ute kai wọu rukụ tumbuẹ mahamụ ene. I Esau kimaěng dingangu nanginung kụ bọu ene rimal᷊eng. Kerene saheng kakakoạ i Esau tawe něngarěgang hakẹ̌ u anạ i akang e.