Read Sangir PĚNDARIADI 26 Bible Online

PĚNDARIADI 26 - Sangir bible

PĚNDARIADI 26

¹Su wanua ene tangu piạko kal᷊ahutung nariadi nạung kere su tempong Abraham. I Ishak nẹ̌tengong Abimelekh, datun tau Pilistin, su Gerar kụ nẹ̌dorong loahe mẹ̌deạu ipakawala matanạ sene.

²Ene kinoạ e ual᷊ingu MAWU seng nẹ̌tengkatodẹu watangengʼE si sie apidu něhengetang, ”I kau abe kakoạ sol᷊om Misirẹ̌; katanạ e su wanua ini, kerẹewe Takụ nipaul᷊i si kau.

³ Iạ e sarung maněntanudẹ̌ dingangu měngal᷊amatẹ̌ si kau. Kasěllahu wanua ini e Takụ ionggọ su hitenu. Iạ e sarung maněhụ u kědoku e nạung Takụ nionggọ si Abraham i amangu.

⁴Iạ e sarung mangonggọu anạ pulung kakěpal᷊e kere wituing su l᷊angị e ringangu hitenu, ringangu kasěllahu wanua ini sarung Takụ ionggọ si sire. Kal᷊awọu umatẹ̌ su dunia e sarung mẹ̌gausẹ̌ si Siạ tadeạu Iạ měngal᷊amatẹ̌ si sire kerẹewe hitenu e seng Takụ nial᷊amateng.

⁵Iạ e sarung měngal᷊amatẹ̌ si kamene, watụ u i Abraham seng dimaringihẹ̌ si Siạ dingangu nẹ̌sěmpị kal᷊awọu tita-Ku ringangu tiaha-Ku.”

⁶Tangu natanạ e i Ishak su Gerar.

⁷ Ene sarangke taumata sene nakiwal᷊ọeng Ribka e, tangu i Ishak simimbang u i sie kai wawinene wal᷊inewe kawinge. I Ishakẹ̌ e kai mạtakụ i sire ene kiwuạ u měmate si sie ual᷊ingu i Ribka e kawe kereng kaholẹ e.

⁸Ene sarangke i Ishakẹ̌ e natanạ diọ marěngụ sene, tangú piạ sěnsul᷊e Datu i Abimelekh kai kukakělla wọu těbane kutẹu kai nakasilo si Ishak mědẹ̌darěngu ringangʼi Ribka.

⁹Tangú nikuiange i Ishak kụ i sie nẹ̌bera, ”Mahunẹu kai kawingu wawine ěndaị e ěng? Kawe unụ e i kau kawe naul᷊ị u i sie kawe wawinenu?” Angkuěng i Ishak, ”Iạ mạngěnnau, iạ sarung pateěng kereu iạ kawe maul᷊ịu i sie kai kawingku.”

¹⁰”Kai apạ e seng nikakoạu si kami e?” angkuěng i Abimelekh. ”Sěngkatau wọu tal᷊oarang kawanuaku e botonge wue mětikị dingangu kawingu, kai kamagengu hal᷊ẹ̌ ene nariadi e, ute seng i kau masingkạ u pẹ̌sasal᷊agʼi kami ene.”

¹¹Bọu ene i Abimelekh něgěllịu tatumbal᷊ung su kawanuane patikụ e kere ini, ”I saim manengehẹ̌ tau ini arau kawinge, mambeng sarung ihukung pateěng.”

¹²I Ishak nanawuhʼu wine waugu mahěnsinuang su wanua ene, kụ su taung ene nakapěnsạ mahasụ su sul᷊ene kal᷊awọe wọu nisawuhe, batụu MAWU e něngal᷊amatẹ̌ si sie.

¹³Kakakalạ e mangkeng kạpahuntinambane kụ i sie hakịu nakalạ tạ sihinge.

¹⁴Tau Pilistin e sụsingking i sie, ual᷊ingu i sie piạ ěllange mal᷊awọ, dombane ringangu sapine měngkate měgẹ̌gapaěng.

¹⁵Mase i sire němpěngambungkeng ěntana su kal᷊awọu pahighi nạung seng niwangkang manga ěllang i Abraham nạung deng i sie wědang biahẹ̌.

¹⁶Bọu ene i Abimelekh nẹ̌bera si Ishak, ”Dakọe pangal᷊ing bọu anung kami, u i kau e kai tumanịu makawasa limembong kami.”

¹⁷Tangu i Ishak dimal᷊eng bọu ene kụ nẹ̌daseng su Wal᷊ang Gerar. Sene i sie nẹ̌tanạ diọ mararěnna.

¹⁸I sie saụ němangka apam pahighi nạung niwangka su tempong Abraham kụ nạung seng niambungangu ěntana kahian tau Pilistin su l᷊ikudʼi Abraham. Pahighi tamai ene nighěllirangu arenge kere nạung nisěbạ i amange.

¹⁹Manga ěllang i Ishakẹ̌ e němangka pahighi su Wědạu Gerar ene kụ nakahombang simbul᷊u akẹ mạhěmpal᷊iu.

²⁰Kai arawe i sire mělal᷊ukadẹ̌ binatang su Gerar tangu měmpẹ̌dẹ̌darendehẹ̌ dingangu manga mělal᷊ukadẹ̌ binatang i Ishak. Angkuěng i sire, ”Ini e kai akẹ i kami!” Ual᷊ingu ene i Ishak nẹ̌sẹ̌bạ arengu pahighi ene, ”Pẹ̌dararendehẹ̌”.

²¹Manga ěllang i Ishakẹ̌ e němangka pahighi lai wal᷊ine, tangu nariadị e pẹ̌sasasighing pahighi ene lai. Ual᷊ingu ene i Ishakẹ̌ e nẹ̌sẹ̌bạeng pahighi ene, ”Pẹ̌sasitori”.

²²Bọu ene i sie nangal᷊ing bọu tampạ ene kụ němangka pahighi katěllune. Sěnsul᷊e ini e tawẹ apawe pẹ̌dararendehẹ̌. Ual᷊ingu ene i Ishakẹ̌ e něsẹ̌bạu pahighi ene, ”Karal᷊iu”. Angkuěnge, ”Ini e MAWU seng nangonggọu l᷊oahe si kitẹ pẹ̌tẹ̌tanạ su wanua ini, kụ i kitẹ e sarungbe tumei pẹ̌bawiahʼi kitẹ e sini.”

²³Bọu ene i Ishak nẹ̌buạ e kụ nahumpạ e su Bersyeba.

²⁴Su hěbi ene MAWU e nẹ̌těngkasilom batangenge si sie kụ něhengetang, ”Iạ e kai Ruatang Amangu i Abraham. Abe katakụ; Iạ e maněntanudẹ̌ si kau. Iạ e sarung měngal᷊amatẹ̌ si kau ringangu mapakal᷊awọu hitenu ual᷊ingkem pẹ̌kakědo-Ku e su ěllang-Ku i Abraham.”

²⁵Mase i Ishak napararisị u pananěmbaěng kụ naněmba MAWU e sene. I sie nẹ̌daseng sene ringangu manga ěllange němpamangka pahighi wal᷊ine.

²⁶ Piạ sahěllo i Abimelekh narěnta wọu Gerar dingangu měnanasane i Ahuzat, dingangu i Pikhol těmbonangu wuntuangu mẹ̌sasekẹ, baugu mẹ̌sombang i Ishak.

²⁷Tangú i Ishak nẹ̌bera si sire ungkuěng, ”Kai unụe i kamene ruměnta su anuku? Karạkai kạngerẹ i kamene měbẹ̌binsị dingangu měmpẹ̌nokol᷊u iạ bọu wanuang kamene?”

²⁸Mase i sire simimbang angkuěng, ”Ini e i kami masingkạ u MAWU e maněntanudẹ̌ si kau, hakịu i kami e mạngěnna u kai hinom piạ pẹ̌kakakědo sutal᷊oarang kitẹ. Pěmpẹ̌kedọ e,

²⁹u i kau sarung tawe mẹ̌koạ dal᷊akisẹ̌ si kami, kerẹewe lai i kami e tawe nẹ̌kẹ̌koạ dal᷊akị si kamene. I kami e mang kětạu nẹ̌koạ mapia si kau ringangu naparal᷊eng i kau su pẹ̌darame. Mamben nal᷊ahẹ u si kami i kau e lẹ̌al᷊amatengu MAWU e.”

³⁰Bọu ene i Ishak nẹ̌sake si sire, kụ i sire nahungkaěng dingangu němpanginung.

³¹Sěngkariọěllone mal᷊uka-l᷊ukadẹ̌ sěngkatau-sěngkatau e nasịhabareng kědone nisẹ̌garengkeng pẹ̌sasalu. Bọu e i Ishak nẹ̌katạen sire kụ nẹ̌tal᷊eị e i sire lawọ sěhapikang.

³²Su ěllo ene lai manga ěllang i Ishak diměnta su anune kụ napakasingkạ u pahighi nạung niwangkang sire. Angkuěng i sire, ”I kami e seng nakaěbạ akẹ.”

³³Mase i Ishak něsẹ̌bạu pahighi ene si ”Salu”. Kụ kai ene tětạ u soa ene nisěbạ Bersyeba.[50]

³⁴Ene piạ e i Esau umbure natimu ěpạ u pul᷊o su taunge, i sie nẹ̌kawing dingangu ruang katau wawine bọu tau Het, kụ i Yudit, anạ i Beeri, ringangi Basmat anạ i Elon.

³⁵Bawine rarua ene e nakasusa naung i Ishak dẹ̌duang Ribka.