Read Sangir PĚNDARIADI 27 Bible Online

PĚNDARIADI 27 - Sangir bible

PĚNDARIADI 27

¹Su sahěllo, piạ e i Ishakẹ̌ seng maghurang tapengu l᷊ai seng buta, nikuiange i Esau, anạ e i akang, mase nẹ̌bera si sie, ”Anạku!” I sie simimbang, ”Amang!” ěndaung iạ e!

²I Ishak nẹ̌bera, ”I kau e masingkạ u iạ e seng maghurang dingangu aramanung selain tạ karěngụe mẹ̌biahẹ̌.

³Tangu pangal᷊ạko naěnakeng dingangu manga horone, kụ dakọko pěnganụ kadiongke binatang sěmbaụ e su rarukutange.

⁴Sasạko pakatemang sarangkewe mẹ̌tatal᷊ahino su lehẹku, kụ damahiko wawa su anuku. Kụ bọuten iạ kumaěng tangu iạ e reng mangonggọu al᷊amatẹ̌ku si kau těntal᷊ang iạ deng biahẹ̌.”

⁵Pẹ̌bawisarang i Ishak dẹ̌duang Esau ene kinaringihʼi Ribka. Tangu sarangke i Esau rimal᷊eng něnganụ,

⁶nẹ̌berạ e i Ribka si Yakub, ”Buhu-wuhu iạ nakaringihẹ̌ si amangu nẹ̌bera si Esau kere ini,

⁷’Dakọko anụke binatang sěmbaụ dingangu pěnasạko pakatemang kụ damahiko tonda si siạ. Kụ mạengu iạ seng nasueng idope, tangu iạ e reng měngal᷊amatẹ̌ si kau su těngom MAWU e, pal᷊ị iạ deng biahẹ̌.’

⁸Tangu amang!” angkuěng i Ribka kapia, ”pẹ̌daringihẹ̌ko, ringangu pẹ̌koạ apan takụ niwera ini.

⁹Dakọko kakoạ sol᷊ong tampạ u dombang kitẹ, kụ pěmileko anạ u kambing darua matatawa e, tadeạu ren takụ sasakeng kinạ i amangu kụ mẹ̌tatal᷊ahino si sie.

¹⁰Bọu ene ěntudẹ̌ si sie mědeạu i sie mangidopẹ̌ kụ bọu ene i sie sarung měngal᷊amatẹ̌ si kau těntal᷊ang i sie reng bědang biahẹ̌.”

¹¹Kai i Yakub e nẹ̌bera si ninange, ”Mama, kai wal᷊inewe awạ i Esau e sambulungang, arawe awạku e kawe mal᷊ěno?

¹²Kibasị u i amangku e mangumpelẹbe awạku kụ kawe makakasingkạ u iạ kawe mẹ̌tẹ̌taghunalang; kụ měntěhang i sie bal᷊inewe nangonggọu al᷊amatẹ̌ e, kaiso kawe něngane si siạ.”

¹³I ninange simimbang, ”Abe ghěnggang amang! Balạe kere kal᷊awọu ane e hědọ e katuhung si siạ. Měngkate pẹ̌koạ apan takụ niwera, dakọ e pěmpěngal᷊ạ manga kambing ene.”

¹⁴Tangu i Yakub měngkatewe nangal᷊ạ manga anạ u kambing e kụ niěntudẹ̌ si ninange, mase i Ribka něnasạ kaěng temange mapia mětẹ̌tatal᷊ahino si Ishak.

¹⁵Bọu e i Ribka nangal᷊ạ e pakeang i Esau kal᷊enggihange, nidaresọ e su wal᷊e, kụ pinakiluhene si Yakub.

¹⁶I sie reng něluheng pising anạ u kambing pinẹ̌hěmbung takiahẹ̌ ringangu lehẹ i Yakub mal᷊eno ene.

¹⁷Mase něngonggọ e si Yakub kaěng kasědapěkang e ringangu borotẹ̌ kụ seng nịkakoạ e.

¹⁸Mase tamaị e i Yakub sol᷊ong anung amange, kụ nẹ̌bera u, ”Amang!” ”Kawe,” angkuěng i Ishak, ”kai i sai i kau, i Esau arau i Yakub?”

¹⁹Angkuěng i Yakub, ”I Esau, anạu i akang; kụ toneng i amang seng takụ nituhukang. Ěndaịko kaiang, kụ pẹ̌simokol᷊ẹ̌ko kinạ u rul᷊unge takụ nianụ ěndaung seng niwawa ini, tadeạu i amang měngal᷊amatẹ̌ si siạ.”

²⁰I Ishak nẹ̌bera, ”Kai kal᷊ighạ i kau nakaěbạ amang!” Angkuěng i Yakub, ”Ual᷊ingu MAWU Ruata sẹ̌sěmbaěng i amang e nẹ̌tul᷊ung u iạ.”

²¹Bọu e angkuěng i Ishak si Yakub, ”Damahiko pakarani-rani tadeạu iạ makasaghipo si kau. Kahěngang bue i kau i Esau?”

²²I Yakub dimani si amange, kụ i amange nanaghipọ e si sie kapẹ̌berane, ”Tingihu e kere tingihʼi Yakub, arawe takiahu e kere takiahʼi Esau.”

²³I Ishakẹ̌ e wěgaweng Yakub batụu takiahe sambulungang kere takiahʼi Esau. Kai su orasẹ̌ ene i Yakub mang al᷊amatenge,

²⁴kụ i sie rem bědang saụ nakiwal᷊o sěnsul᷊e, ”Kahěngang bue i kau i Esau?” ”Kahěngang,” angkuěng i Yakub.

²⁵Mase nẹ̌berạ e Ishak, ”Onggotẹ e iạ gěsi ene, kụ bọuteng iạ kuminạ, ute iạ e měngonggọu al᷊amatẹ̌ si kau.” I Yakub něngonggọu ghěsi ene si sie dingangu l᷊ai anggorẹ̌ kadodọ mědeạu pakiinung.

²⁶Bọu ene nẹ̌berạ e i amange si sie, ”Mahiko l᷊ai pakarani amang, děngụeko iạ e.”

²⁷ Ene i Yakub naranị e kụ měnguwusẹ̌, i Ishakẹ̌ e nakaimbuko ral᷊urung pakeang i Esau, kụ nial᷊amatenge i sie. Angkuěng i Ishak, ”Dal᷊urung anạku mawěngi e al᷊ingkai ral᷊urum bimbaenge kụ seng nial᷊amatengu MAWU.

²⁸Mal᷊owọko Mawu Ruata e mangonggọu namuhẹ̌ bọu l᷊angị e si kau, kụ mapakatawang manga sasuangu. Mal᷊owọko i Sie mangonggọu gandung dingangu anggorẹ̌ e mạhěmpal᷊iung kal᷊awọe!

²⁹ Karimạko kal᷊awọu umatẹ̌ e makoạ ěllangu, ringangu kal᷊awọu haghim bansa e měmpẹ̌tahamawu si kau. Mal᷊owọko i kau mẹ̌kawasa patikụ apang anạ u sěmbaụ u, ringangu hiten ninangu e mẹ̌tumpěkuhẹ̌ su těngonu. Mal᷊owọko piạ bontoge i saiʼm měmpạngane si kau ringangu al᷊amateng patikụ taumata kụ měngal᷊amatẹ̌ si kau.”

³⁰Tawe nararěnnạ wọu ene i Ishakẹ̌ e nangonggọu al᷊amate, kụ i Yakub e wuhu-wuhu ral᷊intụ, i Esau tuhange nawal᷊ị e wọu nanganụ.

³¹I sie mal᷊aing bọu něnasạ kaěng temange mapia, kụ niěntude su anung amange, kụ nẹ̌bera, ”I Amangku e ěndaịko kaiang, kụ pẹ̌simokol᷊ẹ̌ko kinạ u rul᷊unge takụ niwawa waugʼi Amang, tadeạu i Amang deng měngal᷊amatẹ̌ si siạ.”

³²”I sai i kau tangu?” angkuěng i Ishak. ”I Esau anạ u i akang,” angkuěnge.

³³I Ishakẹ̌ e nanětạ e kimende kạguwạu wadange, ringangu nakiwal᷊o, ”Mạeng kerene i sai tangu seng bọu něnganụ kinạ u rul᷊unge kụ nanonda si siạ e kanini? Kụ iạ e sem bọu kiminạ deng i kau ta nạsongo sini. Mase iạ seng nangonggọu al᷊amatẹ̌ku pangěnsueěnge si sie, kụ ini al᷊amatẹ̌ ene tangu seng nakoạ tataghuanenge sarang marěngụ-děngụ.”

³⁴Ene i Esau nakaringihe, i sie simangị e maihạ kụ měngkate apa masusa, bọu e nẹ̌bera, ”Al᷊amateko l᷊ai iạ, Amang!”

³⁵I Ishak nẹ̌bera, ”Tuarinu e seng diměnta kụ něngakal᷊ẹ̌ si siạ. I sie seng nangaho al᷊amatẹ̌ nạung hinong takụ ionggọ si kau.”

³⁶ I Esau nẹ̌bera, ”Ini e seng karuan sul᷊ene i sie něngakal᷊ẹ̌ si siạ. Hinone wue i sie isẹ̌bạ si Yakub.[51] I sie seng nangaho kal᷊aiakangku, kụ orasẹ̌ ini e i sie selain nangaho al᷊amatẹ̌ nạung baugu iạ. Kai sen tạ al᷊amatẹ̌ bal᷊ine si Amang e waugu iạ tangu?”

³⁷I Ishak simimbang, ”Iạ e kai seng napakariadin sie mawunu, ringangu patikụ apang anạ u sěmbaụ e takụ apakakoạ ěllange. Iạ e seng nangonggọu gandung dingangu anggorẹ̌ e si sie. Kụ orasẹ̌ ini e sembelain tawẹ manga apa hinon takụ ikakoạ si kau anạ!”

³⁸ I Esau tawe mapulu mangědo mẹ̌dorong si amange, ”Unụe si Amang kai kětạeng sěmbaụ al᷊amatẹ̌ e tangu? Al᷊amateko l᷊ai iạ Amang!” Mase saụ kapia i sie simangị.

³⁹ Bọu ene i Ishak nẹ̌bera si sie, ”Sarung tawẹ namuhu l᷊angị e si kau, dingangu sarung tawẹ dahami matatuwo si kau e.

⁴⁰ I kau sarung mẹ̌biahu pedanu, katewe kawe makoạ ěllangu tuarinu, kai kamageng i kau e něnggohaeng[52] ute i kau sarung makapěllọ bọu kawasane.”

⁴¹Tangú i Esau nẹ̌binsị i Yakub, kahiang amange kawe seng nangonggọu al᷊amate su tuarine ene. Su tiněnnane, ”Seng tawẹ karěngụ e i amange mapul᷊e asal᷊ẹ̌ kụ mạeng seng mal᷊iu wọu mělutu, i Yakub e sarung takụ pateěng!”

⁴²Piạ i Ribka nakaringihe karaking Esau ene, i sie nakikuing Yakub dingangu nẹ̌bera, ”Tuhangu i Esau piạ karakine mamal᷊isẹ̌ si kau, kụ kai mamate si kau.

⁴³Kụ koạko apan takụ iwẹ̌bera ini. Dakọko lighạ tal᷊ang sol᷊ong anung mahuaneku i Laban su Haran,

⁴⁴kụ katanạ dingange manga pira ěllo karěngụ e sarangkewe pědun tuhangu e reng mal᷊ompọ,

⁴⁵kụ i sie nẹ̌timbul᷊eng apan nịkakoạ u e si sie. Bọu ene iạ sarung měndolohu taumata pěngal᷊ạ si kau ramahi. Iạ madiri kailangengu anạku e rarua su sahěllo.”

⁴⁶Bọu ene i Ribka e nẹ̌bera si Ishak, ”Iạ seng natakehẹ̌, dingangu nasahe nakasilo manga kawingʼi Esau wọu hiten tau raghị ene. Mạeng u i Yakub mal᷊aing mẹ̌kawingu manga wawine tau Het, mapiawe iạ mate.”