Read Sangir PĚNDARIADI 28 Bible Online

PĚNDARIADI 28 - Sangir bible

PĚNDARIADI 28

¹Bọu ene i Ishak kimui si Yakub, kụ něngal᷊amatẹ̌ si sie ringangu nẹ̌bera, ”Kumbahang i kau mẹ̌kawingu mahualang Kanaan.

²Kakoạko sol᷊ong Mesopotamia, sol᷊ong anun sireng Betuel, i amangʼi ninangu e, kụ pẹ̌kawingken sěngkatau wọu anạ i Laban mahuaneng ninangu.

³Mal᷊owọko Mawu Kasěllahenge měngal᷊amatẹ̌ pẹ̌kakawingu e kụ mapěhiteng kau anạ pulung mal᷊awọ, kụ i kau e makoạ i upungu umatẹ̌ l᷊awọ.

⁴ Karimạko MAWU měngal᷊amatẹ̌ si kau ringangu hitenu e kerẹewe lai nạung seng něngal᷊amatẹ̌ si Abraham, mase karimạko i kau e managhuang ěntana kẹ̌katanakengu ini e, kụ seng nionggọu Mawu e si Abraham!”

⁵Kerene sahen pěndarolohʼi Ishak si Yakub apạkakoạ sol᷊ong Mesopotamia, sol᷊ong anung Laban, anạ i Betuel tau Aram ene. I Laban ute kai mahuaneng Ribka, i ninangʼi Yakub dẹ̌duan Esau.

⁶I Esau nakaringihe u i Ishakẹ̌ e kawe něngal᷊amatẹ̌ si Yakub dingangu rimolohʼi sie sol᷊ong Mesopotamia apědẹ̌deạ kawinge sene. Kutẹu l᷊ai su tempong i Ishak něngal᷊amatẹ̌ si Yakub, i sie nẹ̌sěding i Yakub mẹ̌kawingu mahualang Kanaan.

⁷Su l᷊ikudʼu ene i Esau e masingkạ u i Yakub e mararingihẹ̌ bue su wawerang amange ringangu i ninange kụ semben nẹ̌buạ sol᷊ong Mesopotamia.

⁸Tangú nakaěnnạe i Esau u manga wawineng Kanaan e tawe nẹ̌tatal᷊ahino si Ishakẹ̌ i amange.

⁹Tangú i Esau nakoạ e sol᷊ong anung Ismael, anạ i Abraham, kụ nẹ̌kawing dingangu anạ i Ismael isẹ̌sẹ̌bạ si Mahalat, tuaring Nebayot.

¹⁰I Yakub naněntangken Bersyeba kụ nakoạ e sol᷊ong Haran.

¹¹Ene matangělloe simědạ e, i sie nahumpạe su tampạ[53] sěmpalang ene, mase něhedang sene. I sie rimal᷊okạ e kụ nẹ̌tikị, těmbọ e nipangulelenge su wowom batu sěmbaụ sene.

¹² Bọu e nipị e i sie, u i sie nakasilo tumbal᷊atung sěmbaụ dụdarisị su wowon dunia e, kụ kotọ e nịdatingu l᷊angị kụ malaekatẹ̌ e měngkate mal᷊intụ-marangeng su tumbal᷊atung ene.

¹³ Kụ dimarisị e MAWU su sěndihange[54] apidu něhengetang, ”Iạ e kai MAWU, Ruata kụ dẹ̌dalong i Abraham dingangu Ishak. Iạ e sarung mangonggọ si kau ringangu su hitenu ěntana tampạ niral᷊okaěngu ini e.

¹⁴ Hitenu e sarung kere awul᷊ẹ̌ kal᷊awọe su dunia. I sire sarung mangal᷊ekehẹ̌ pẹ̌tatanakeng i sire su patikụ tampạ kụ lumiung kau ringangu hitenu e, Iạ e sarung mangal᷊amatẹ̌ patikụ umatẹ̌[55] su dunia.

¹⁵Pẹ̌tahěndung, Iạ e sarung mẹ̌tul᷊ung dingangu maněntanudẹ̌ si kau, suapạewen dal᷊engangu e ringangu i kau e Takụ isul᷊e kạpia sol᷊ong banua ini. U Iạ e tawe maněntang i kau těntal᷊ang Iạ deng ta měnggěngganapẹ̌ apan Takụ kinědo si kau e.”

¹⁶Mase i Yakub nẹ̌pětịe wọu tatikilange apidu nẹ̌bera, ”MAWU e ene sini, su tampạ ini, kaiso buhụewe orasẹ̌ ini iạ masingkạ u ene!”

¹⁷Kụ i sie mangkewen natakụ kụ bọu e nẹ̌bera, ”Kai mamben makạl᷊ahěngking sěmpalang ini e! Ini e mambeng bal᷊em Mawu Ruata, kụ ini e kai sasuěkang sol᷊ong sorga.”

¹⁸Ene sěngkariọěllone mal᷊uka-l᷊ukadẹ̌, i Yakub nẹ̌bangungke, kụ něngal᷊ạ batu pinẹ̌kapepekang e kụ nipararisị e nikoạ batu pẹ̌tatahěndungang. I sie naněboheng lanang zaitun su wowom batu ene nihaene samatang baugu Ruata e.

¹⁹Tampạ ene siněbạ e Betel.[56] (Kangerẹ arenge ute Lus.)

²⁰Mase nẹ̌salụ e i Yakub, ”Mạengu MAWU e mẹ̌tul᷊ung dingangu maněntanudẹ̌ si siạ su raral᷊engangku ini e ringangu mangonggọu kaěng dingangu pakeang,

²¹hakịu iạ e makapẹ̌sul᷊e kapia su wal᷊eng amangku e, kụ iạ e nasal᷊amatẹ̌ bue, tangú MAWU e sarung makoạ Duataku.

²²Kụ iạ e sarung mangonggọ su MAWU sěngkapul᷊ong bahageange wọu kal᷊awọu patikụ sạbarang kụ nionggọu MAWU e si siạ. Arawe watu pẹ̌tatahěndungang kụ nạung takụ nipararisị ini e sarung makoạ tampạ pananěmbaěng baugʼu MAWU e.”